FELLOWSHIP OF THE LEAST COIN

 (Tangka nawi hmanga inpawlhona) 

Tangka nawi hmanga inpawlhona chu engnge ni? 

Tangka nawi hmanga inpawlhona chu remna leh muanna a awm theihna tur atana khawvel pumpui huap kohhran inzawmkhawmte tawngtaina hi a ni. He rawngbawlna hmang hian khawvel pumpuia Kristian hmeichhiate chuan inpawlhona neiin inrem taka awm tur leh inngaihdamtawnna nun neih a thatzia an inhriattir nawn thin a ni. ‘Te ber” tih hi a zu uar ber a, a chhan chu hei hi thawh (fund) a ni lova, remna leh muanna atana tawngtaina a ni. Tupawh, hemi bik atana tawngtaina hun hman ve duhtu chuan midang nen inthurualin, heng avanga harsatna tuartute tan hian an tawngtai thei a ni – Itsikna, huatna, dik lo taka tharum thawhna, chhungkua-a hleih neihna, khawtlang, ram tan te. Dikna atan te, muanna atan te, remna atante a tawngtai apiangin “tangka nawi” chu a tawngtai ani tih a hriattheih nan a dah hrang zel tur a ni. 

Engtik laiin nge, engtinnge hei hi tan a nih: 

He tangka nawi hmanga inpawlhona hi India mi Mrs.Shanti Solomon in Pathian hnen ata inlarna a hmuh atanga a ngaihtuah chhuah a ni a. Ani hi Pacific Mission Team of Seven Women an tih khawvel hmun hrang hrang atanga thlanchhuah, Indopui II-na hunlai September 1956-a Asia ram fangtute zinga tel ve kha a ni a. He Mission Team hi Dr.Margaret Shannon in USA-a Presbyterian Kohhran hmeichhe aiawha a huaihawt a ni. Shanti Solomon chuan Korea tlawh tura Visa a hmuh ve loh avangin a thiante’n Korea an pan laiin ani chu Manila, Philippines-ah a kal a. tah chuan indona in a nghawng Asia te chu a ngaihtuah a, inremna te, dikna a rorelte leh muanna te hi ram hian a mamawh ani tih thu chuan a thinlung chu a rawn tiharh a. 

Tichuan a team member puite an lo kir leh chuan, tawngtaina hian ramri bang min daidanna zawng zawng hi a khum  thei ani tiin tawngtaiho a rawt a. Tichuan ani chuan Kristian hmeichhia Asia rama mite hnenah leh USA atanga lokal Presbyterian hmeichhiate hnenah chuan chona siamin dikna a rorelna atan te, khawvel pum inremna atante a project (tumbik) nei turin chona a siam ta a. Chu an thiltum chu Kristiante tawngtaina, Kristian hmeichhia tupawh an sum dinhmun eng ang pawh nise, harsa lova an tel theihna tur a ni. Eng hun pawha hmeichhia tupawh a tawngtai apianga “tangka nawi” dah hran zelna hi a ni. Chu chu team memberte an ram sum dinhmun eng ang pawh nise, rinna-a an inpumkhat theihna tur atana fuihna nung tak chu a lo ni ta a ni. He tangka nawi hmanga inpawlhona hi khawvel puma hmeichhiate tan leh kawng chi hrang hranga harsatna tuartute tana an inserhhranna tur atan an zavai chuan lungrual takin an pawm tlang ta a.  

East Asia Christian Conference (EACC) tuna Christian Conference of Asia an tih hian FLC Fund hi kum 1958-1970 thleng a enkawl. Kum 1958-a Assembly of the Asian Church Women’s Conference inkhawmpui vawikhatna Hong Kong-a neihah khan Fellowship of the Least Coin hi tlangzarh tura pawm a ni. Kum 1962 inkhawmpui vawihnihna Thailand-a neihah chuan FLC hi ACWC Ramthim (outreach) programme atan hlankai a lo ni ta a, Mrs. Shanti Solomon, FLC hmuchhuaktu chu kum 1970 khan Executive Secretary of FLC leh ACWC ah ruat a ni. Chutah tang chuan ACWC hi FLC fund enkawltu atan mawhphurhna pek alo ni ta. 

FLC Logo: 

FLC chhinchhiahna chu Lotus par pianhmang anga kut insuiha tawngtai lai ang hi a ni. Hei hi Mrs. Rayann Ma, Hong Kong, ACWC khawmpui hmasa ber a chairperson ngaihtuah chhuah a ni. He ngaihtuahna diktak petu chu Mrs. Rayann-i  pasala unaupa James Ma Commercial Artist ina a thilpek a a pek a ni. 

Circle of Prayer: 

FLC ina tawngtaipuina a mamawh avangin ACWC chuan Hong Kong-a hmechhiate chu tawngtaina lehkhabu te “Circle of Prayer “ siam turin a ngen a,  he circle of prayer bu hi FLC lakkhawm ni-a hman atan tih a ni. Chumi ni atang chuan Circle of prayer bu hi FLC tan hian hmanraw pawimawh tak a lo ni ta a ni. Kum 2 dan zelah International Committee chuan khawvela hmeichhe hrang hrang te ziak, inhlanna leh tawngtaina 24 a buatsaih ziah a ni. 

A thanlen dan: 

He FLC ngaihdan hian pawm a hlawh hle mai a, Asia khawmual a hmeichhia chauh te ni lovin  khawvel ram bung hrang hrang te pawhin an pawm a. Kum 1966 a FLC ina a kum tlin a lawmna ah chuan khawvel hrang hrang ram 24 atangin palai te an lo kal khawm a, kum 1980 a Silver Jubilee ah phei chuan ram 75 in FLC hi an zawm a ni. Kum 1986 ah phei chuan ram 80 in FLC kum 40 tlinna an lawm. 

Fellowship of the Least Coin danglam bikna : 

Fellowship of the Least Coin tawngtaina hi mawl tak si, awmzia ril tak nei, danglam bik a ni. 

Vun rawng avang te, kohhran hrang nihna avang te, hnam hrang nih avang te a inthliarhranna awm hauh lova tawngtai inpawlkhawmna hmanga Kristian hmeichhiate insuihkhawmna a ni. 

Thilpek (thawhlawm) pawh hi a danglam bik a ni. Hausa leh rethei, lehkhathiam leh thiam lo, mi mawl leh changkang a tupawhin a neih zinga te ber an pek avangin. 

Hei hi thawhlawm a ni. Khawvel pumpuia hmeichhia ten tawngtaina nena an thawhkhawm pawisa nawi te te hi a lo tlinkhawm chuan hna ropui tak inremna atan te, dikna a rorelna atan te, muanna atan te a lo thawk thei thin a ni. 

Tawngtaina-a inpawlhona hian mak tak maiin mi a phuarkhawm a, kan pe chhuak a, kan dawng bawk a. Ngaihdamna thu min hriatchuah tir a, mimal leh a huhoa thawhho dan min zirtir bawk a ni. 

Tangka nawi hian inngaihtlawmna min zirtir a, thil te tham pawh a hlutzia leh Pathian tan chuan thil engmah harsa a awm lova, thil te tak te leh thil awm lote nen lam atang pawha thil ropui tak ti theitu a nihzia min hriattir bawk a ni. 

Pathian kan hnena awm reng tura intiama chuan kan mamawh zawng zawngte min pek leh hmangaih tawp lo, min ven leh min hruai a thulh lo. 

India Eastern Territory-ah hian Women’s Ministries hmalakna hnuaiah kum 2004 vel atang khan he Fellowship of the Least Coin hi zawm ve a ni a. THQ-a hmeichhe officer pakhat Territorial FLC Secretary atan hian ruat thin a ni. Tangka dahkhawmna tur bawm siamin, sem a ni thin. Memberte hian an tawngtai apiangin an pawisa nawi zinga ‘a te ber’ chu thlakin, a lakkhawmna hun hi kumkhatah vawikhat hman thin a ni. Tawngtaina neihzat theuhte chhinchhiahin, chung pawisa nawi tlingkhawmte chu National Office-ah thehluh a ni thin. 

He rawngbawlna hi Corps leh Centres-ah te kalpui a lo ni ve ta zel a, Chaltlang Corps-ah pawh kum 2006 atang khan Pi Lalrinfeli AHLS-in thahnemngai takin a kalpui a, DHQ-a an lakkhawmna hun a zawm mai thin a, zawmtute a nei ve ta zel a ni. Kum 2015 ah phei chuan Corps FLC Secretary hialte ruat a lo ni ta a. Pi Zomawii ruat hmasakber niin, Pi Hmingthanmawii hian kum 2002 atang khan a thlak a ni. 
x

SUAL THUK BER PAWH A CHHANDAM

Commissioner John Lawley-a 31 December 1859 a piang, 9 September 1922 a ropuinaa kaisang ta kha SA Officer huaisen tak a ni a, officer-te tana rank kai theih sang ber dawttu leh pek theih sang ber thleng pha a ni. Kum 1877-ah khan The Salvation Army a zawm a, chutih lai chuan Christian Mission tih a la ni. Kum 1890 – 1912 chhung, General William Booth-a thih ni thlengin a ADC (aide-de-camp) a ni a, kum 1912 – 1921 chhung khan General Bramwell Booth-a ADC a ni zui bawk a ni.

John (Johnny tia hriat lar) Lawley hi Foulden, Norfolk-ah kum 1859 khan a lo piang a, John Lawley-a (1835–1918) fa pali te zinga naupang ber a ni. A pa hi huan hnathawka eizawng a ni a, a nu hi Anne-i a ni thung. A pa hian zu ngawl a vei tlat mai a, kum 1871 a lo herchhuah khan ‘miretheite chenkhawmna hmun’ Swaftham, Norfork-ah an chhungin an chen ve a ngai ta hial a. Hemi hnu hian Bradford lamah hna zawngin an insawn a, Johnny-a pawh chu buh herna hmunah bobbin ligger hna a thawk phawt a, khawl tifaitu-ah a ṭang leh a ni.

Kum 1877 khan kum 17 mi a nihin Bradford khuaa Christian Mission inkhawmnaah James Dowdle-a thusawi kaltlangin a piangthar a, reilote-ah Christian Mission evangelist 40-na a ni ve ta. Khawvel hmuha Pathian tana serh-hran a nih lantir na’n missionary-te hak ṭhin coat fual dalh mai, nghawng-awrh dum, lukhum parh tung dum hlarh leh nihliap hawl chi-a vai lauh lauh fo te chu inthuamna atan a hmang ṭhin.

Spennymoor Christian Mission Station 28 April 1878 a hawn tharah rawngbawlna bul a ṭan a, karkhat chhungin sermon 14 a sawi ṭhin. Kum 19 a nihin Captain rank a kai a, kum 1891 khan Colonel a ni tawh. Jarrow, Sutherland-ah salvationist pakhat nen tirh luh an ni a, he hmunah hian dodalna nasa tak mai an tawk a, police superintendent, sergeant pahnih, leh constable 7 pawhin an thunun zawh loh buaina te a ni.

An muallai inkhawm pakhatah phei chuan Lawley chu chhuat charah an theh thlu a, mipuite chil tura an inhawrkhawm lai takin piantharna chang thar nu pakhat a rawn in zep lut hlauh a, Lawley-a kawr awmah ṭhamin a kai tho a, kut hum ruh chunga rum el-awl-a melh kual pahin, a tawk hmasa sa a bitum tur thu a sawi ta mai a, a him phah ta hlauh a ni. Heng hunlai chungchang thuah Lieutenant-Commissioner Unsworth-a khan Lawley-a chu mipuite’n a thusawi an dawnsawn ṭhat tak zia leh an ngainat zia a sawi ṭhin. Jarrow leh a khaw chhehvel a mi rothap leh zu-ngawlvei tam tak chu a awrawl ring tak, nelawm tak si chuan a ti tuiral zo va, ngaina takin ‘Johnny Lawley’ tiin an ko duat ta hial a ni.

Thuhriltu dangdai tak a ni. Ṭumkhat chu Pathian hmangaihna leh khawngaihna nasat zia chu tuifinriat anga zau anih thu a sawi laiin platform aṭanga rawn chhukin chhuatlaiah chuan thusawi zawm zel chungin, tui hleuh ang chiahin a tal chiam mai a. Ṭum dang lehah chuan Biak In pawna awmte’n an ngaihven lehzual beiseiin a nihliap kap parhin a tlankual chiam bawk. Diabola hian a man beh theihte a nghaisak dan a sawi phei chu a ṭang nasa lutuka, a hlabu ken lai a pawt sawm-darh vek a ni.

Jarrow-a a awmlai kum 1879 aṭang khan hla a phuah ṭan a, kum 1916-a chhuah The Salvation Army Songbook-ah khan a hla phuah 19 zet a awm hman. Mizo SA Hlabu-ah hian a hla pakhat ‘Sual thuk ber pawh a chhandam’ No.208 na, Thianghlimna hla ropui leh thinlung chhun tlang, The Salvation Army zahngaihna ṭhutphah-a tarlan hlawh tak mai, Lt.Colonel Kawlkhuma lehlin a chuang a ni.

General William Booth-a’n, ‘Sawmna min siam puitu ka mamawh a ni, zahngaihna ṭhutphaha ṭawngṭaia inhlanna hun hawngtu tur. Tu emaw thlaraubo man tura a nun pumpui hlan inhuam. Nangmah hi I niin ka hria a, I inpeih em le?’, tia a zawhna chu, ‘Tehreng mai, General, Pathian khawngaihna zarah chutiang mihring mantu chu ka ni thei ang, amaherawhchu tunah tak hian ka aw te hi a chak lo hle mai’ tiin John Lawley-a chuan a chhang a. An pahnih chuan an ṭhingṭhi dun a, Hmuchhuaktu chuan a darah kut nghatin a hna thar atana Pathian malsawmna dilin a ṭawngṭai sak a. Chuta ṭang chuan damlohnain a tlakbuak anih chauh loh chuan General William Booth-a kalna khawii hmunah pawh ṭawiawmin, zahngaihna ṭhutphaha kun tura mite sawmna hun buatsaihin, Pathian fakin a lo zai ṭhin – kum 22 chhung zet – Hmuchhuaktu 'Ropuinaa a kaisan' ni thleng khan.

Kum 62 mi niin 9 September 1922 khan Commissioner Lawley chuan Watford-ah a lei thuam a dah ve ta a, Salvationist mi hmingṭhate zingah Abney Park Cemetery-a zalh a ni. A vuinaah hian Salvation Army Band rual hrang hrang 8 laiin an thlah liam. Amah hriatrengna inkhawm Clapton Congress Hall-a neih ah General Bramwell Booth-a chuan, ‘He khawvela a nun chu fak-hla sak nana hmang zo in, fak chung zelin Chatuan hmunah a lawi lut ta’, tiin a chanchin sawina a tlip. Isua ke-bula inhlan tura mite a sawmna zai-ri hi YouTube-ah ngaihthlak tur a awm.

A hlaphuah Territorial Staff Songsters te'n mawi taka an sak hi lo ngaithla ve ta che...

SUAL THUK BER PAWH A CHHANDAM TO THE UTTERMOST HE SAVES ( Kalvari tlang i kal ang - Come with me visit Calvary) Phuahtu : Commissioner John Lawley Letlingtu: Lieutenant Colonel Kawlkhuma Kalvari tlang i kal ang, Chhandamtu thihna kha; A thisen tuikhur hlu chu a thûk, a zau, a liam, Thinlung leh nun dân sualte min bân turin a thi; A ke bula chêngte zawng a chhandamin a vawng. Sual thûk ber pawh a chhandam, Sual thûk ber pawh a chhandam; A hmangaihna chu i ring thei tawh em? Sual thûk ber pawh a chhandam. Pathian chhandamna kim chu tûnah a inhawng e: Thisen tlanna famkim chu tûnah i nei thei ang. Rinna bânte lo phar la faina lui a luang ang; Rinnain lo dâk chhuak la, a tamzia i hmu ang. Tûnah ka inpe tawh ang Lalpa'n min duh angin; Tûnah min silfai ṭan ang, Amahin ka khat ang; A malsawmna ka dil a, min chhandam tih ka ring; A thlarau tûnah ka nei, ka thinlungaah a khat. Muanna mak tak ka nei ta, a chhûnga tuikhur nen; Kumkhaw chawlhna a lo ni, hneh ni a chhuak ṭan ta, A vân tehna min pe a, nem mukin a liam e; Chatuan ro, man nei lo chu ropui zual zel rawh se.