SAY Raising Day

Kum 1954 hmalam pawh khan Corps thenkhatah chuan thalai inpawlkhawmna hi a lo awm tawh ngei niin a hriat a. Young People Corps hnuaiah vek awmin, Corps/Society/Outpost hmalakna engkimah Thalaite kha sulsutu pawimawh tak an ni thin. International Headquarters atanga beihrual lo awm thinahte pawh Thalaite chu a kul ataia hman ber leh phusa ber an ni. Amaherawhchu, kum 1954, October ni 8 khan Calcutta THQ (North-Eastern India Territory) ruahmanna-a Thalai khawmpui, Saitual-a an neih chu a chhinchhiah tlakin, India hmarchhaka Sipai Pawl Thalaite tan rahbi thar pawimawh tak a ni.

August 1954 Sipai Tlangau-ah chuan Thalai Inkhawmpui tura Zoram Sipai Pawl Thalaite Kohna! tiin puanzar a ni a. Hetih hunlai hian North-Eastern India Territory tan 37 Dharamtala Street, Calcutta-13 chu Territorial Headquarters a ni a, Colonel Ivar Palmer chu Territorial Commander niin Major J.M.Rand chu TYPS (Territorial Young People Secretary) a ni a, Lushai Hills Division-ah Brigadier Walter Merry Divisional Commander leh Major Sapliana DYPS (Divisional Young People Secretary) te hunlai a ni.

Lushai Hills-a Youth Congress hmasaber hi October ni 8 - 11, 1954 chhungin Thalaite buk, Saitual-ah neih a ni. January leh February 1955 Sipai Tlangau issue-ah te report kimchang tarlan a ni a, report petu hian Torchbearer tiin a hming a dah tlat mai. Hetiang ang Thalai inkhawmpui lian hi Mizoram-ah a la awm ngailoh thu pawh ziah a ni. He khawmpui hi TYPS Major J.M.Rand-a hova neih a ni a, Zoram Corps 54 atangin palai inziak mi 321 an awm a, chhimtu mikhual 506, langa lokal 295 leh Saitual Corps sipai 260 an tel a ni.

1954    -           Youth Congress, Saitual

Inkhawmpui-na atan hian Saitual Government Middle School Headmaster Pu Zawnghuala phalna te, Private High School Headmaster Pu Thantluanga I.Sc. leh Government Primary School Teacher Pu Sela phalna te laiin School 3 hmun hman a ni. October ni 8, Inrinni chawhnu atangin inkhawmna neih tan a ni a, 'Tunlai hian Krista chu Thalaite tan kawng a ni' tih chu Khawmpui thupui ber a ni. DYPS Major Sapliana chuan thalaite fuihna thu tha tak sawiin Thalai Fangrual din a rawt a, thalai 50 zet an inpe nghal a ni. Company Orders fel zawk leh tha zawk neih dan turte an ngaihtuah nghal a, hei hian Zirlaibu a kawh hmel, a chhan chu Sipai Tlangau-ah hian International Company Orders tihchhuah thin a ni a, chumi-ah chuan Bible Lesson tarlan thin a ni.

Inrin zan inkhawmah hian Baktawng Corps Thalaite'n 'Talent tehkhin thu' atangin Drama an chang a, darkar 1 zet entir a ni a, mipui an tam lutuk avangin an lenglo a, pawnlama awmte hriat turin YPSM Lalzuala chuan a lo sawi chhawn zel a ngai hial a ni. Chumi hnuah mual zawl-ah an insawn leh a, Baktawng Corps tleirawl hoten 'cheraw' an kan a, kawrfual var ha-in form puantlang an bat a, lukhum var an khum bawk a, cheraw kan dan chi thum lai an entir a. Mipui lamin ngawi renga en chu harsa an ti aniang, an lo au ruih ruih a ni. 

[The Salvation Army Thalaite - Source Sipai Tlangau 1955]

Hemi zawh hian, Saitual Corps Thalaite an che veleh thung a, puanchei ropui tak tak sina mawi taka inthuamin lukhum var an khum a, hla nena guitar rem meuhvin cheraw an kan ta a ni. An mawi zia leh an hlasak leh guiter nen a inchawih mawi zia chu sawiin a siak lo. A ziaktu phei chuan 'Pualhrang, phunbung zuan an iang mange', a ti hial a ni. Saitual Corps tlangval 30 rual lai tur te'n khuallam an entir veleh a, a mual virin an vir mup mup a ni ber mai. Hetianga Zoram hmasang nun hlui thlirkir tir thei tura lamte chungah hian palaite pawh an lawm hle mai.

Pathian thu leh hla a inpawlkhawmna hun hlimawm takte neih a ni. Thawhtanni tlaiah mual inkhawmna benglut takte pawh an nei. Hun lo kal zelah hei hi kan Territory-a thalai rawngbawlna bul tan nan pawm a lo ni ta hial a. TSAY General Council vawi 8 leh 9-na chuan ngun taka a ngaihtuah hnuin India Eastern Territory-a SAY-te hman vek turin October ni 8 chu Raising Day atan a pawm a, tun thlengin he ni hi hmanzui a lo ni ta a ni. Raising Day pual hian vantlang tana rawngbawlna leh mite tana luanchhuahnate neih thin a ni. Tichuan, India Eastern Territory-a Salvation Army Youth Raising Day atan October ni 8 chu tun thlengin serh a lo ni ta a, kum 2014 khan Diamond Jubilee pawh ropui taka lawm a ni.

He Thalai Khawmpui hi Aizawl lamah October ni 16-18, 1954 chhung khan chhunzawm leh a ni a. A vawikhatna atan Thiamthil Entirsiakna Thalaite'n an nei a, Corps 47 atangin an thilsiam entir thalai 556 zet an awm. Chungte chu Violin te, guiter te, khuang te, thil phiar lam te, thil thui mawi te, puantah lam thil te, S.A.Uniform lukhum te, lallukhum leh thildang tam tak a ni. Mizo District Deputy Commissioner Mr. K.G.R.Iyar I.A.S. chu Entirsiakna hawngtu a ni a, Bawrhsap chuan, 'Hetianga thalaite hmasawnna leh thatna tura in beihna kawngah ka tanpui theihna kawngah chuan tanpui che u ka lawm em em ang', a ti hial a ni.

Bazar Corps Biakin-ah palai lenglo khawpin Y.P. Council vawi-3 na neih chhunzawm a ni a, TYPS-in ho zelin thiltih benglut tak takte a awm. D.C. nupui Mrs. Bigadier Merry hnen atangin Pathian thuchah ngaihthlak a ni. Inkhawmna hnuhnung berah hian - August 10-23, 1950 a International Salvationist Youth Congress, London-a neih film chu chhuah a ni a, Biakin lenglo khawpin mipuiin an thlir a. Band rualte, thil ropui tak tak relte, in chhawng sangte chu mipuite'n hmuhnawm an ti em em a, General Albert Osborne-a screen-ah ban vaia lo langte chu an mitthla-ah a cham ta reng a ni.

 

Kum 1961 khan Saitual-ah vek Thalai Khawmpui lian a awm leh a, Youth Camp tia hriat a ni a, Pathian Thu leh Hlaa inpawlkhawmna bakah Sports lama inelna hun hlimawm tak hman a ni. Kum 1968 khan RM.Hall Bazar Corps-ah Local Officer Council April 4-7 chhungin neih a ni a, Corps/Societies 22 atangin Local Officer 50 zet an kalkhawm tih Sipai Tlangau June 1968 issue-ah report a ni a, April ni 6 bik hi Thalai puala hun hman a ni a, Thupui hi 'Krista nen hma lamah' tih a ni.  Kum 1968-ah khan Major Tuliana DYO (Divisional Youth Officer) anih laiin Major Joan Ransom-i Territorial Youth Secretary hnenah Thalaite kaihhruaina dan fel tak neih a tul thu thlen a ni a. T.Y. Secretary hian Sapram-a an hman Torchbearer Group Movement (TGM) Dan bu a lo pe a. Tichuan, Dr.H.Thansanga, Bazar Corps chuan Mizo tawngin a letling a, cyclostyle-a a chhutchhuah hnuah hman theih a nih leh nihlo zirchianna neih a ni. T.G.M. Dan Bu hi 13th September 1971-ah published a ni a, Thalai rawngbawlna atana inkaihhruaina bu kan neih hmasak ber a ni. [Link-ah hian TGM Dan Bu, Bazar Corps T.G.M. te buatsaih chu a entheih https://issuu.com/home/published/tgm_dan_bu_1971 ]

March Ni 11-14, 1971 khan 'Krista chu vawin atan kawng a ni' tih thupui hmangin Rust Memorial Hall, Bazar Corps-ah Thalai khawmpui lian neih leh a ni a, hetih lai hian Major Chianghnuna chu T.Y.S. a ni a, khawmpui report pawh Sipai Tlangau May 1971 issue-ah a ziak nghe nghe. Chawlhniah Central Corps-ah inkhawmna neih a ni a, Chawlhni chawhnu hian kawng an zawh nghal a ni. 1965-a The Salvation Army Centenary kawngzawh film lo en tawhte anni bawk a, mumal taka inremin kawng hi zawh a ni. Thalai bik palai inziaklut hi 361 an ni a, curfew avangin inlawmna inkhawm pawh tlai Dar.4.00 pm ah an nei a, chhimtute nen mipui 1000 chuang an kalkhawm a ni. 

 

Tichuan, Torchbearer Group Movement (TGM) hming a put hma hian Thalai Khawmpuilian tum 4 neih hman a ni. Kum 1971 April ni 14 khan Chaltlang Corps-ah, Aizawl-a The Salvation Army Thalaite kalkhawm a ni a, Mizo Hills Division huapa Torchbearer Group Movement (TGM) din a ni ta, sathau khawnvar eng keng chungin thutiam chhamna hun an hmang. A hming put chhan ang ngeiin Meichher chhi a kawngzawhna neih a ni nghe nghe. Corps dang dangah Torchbearer Group Movement (TGM) hming pu hian thalaite'n rawngbawlna an kalpui chho ta a. Thalai rawngbawlna hian hma a sawn hle a, heihi a chhan ni a lang chu inkaihhruaina dan mumal tak a neih tak vang a ni thei ang. Activities hrang hrang chin thar a ni a, Kohhran huang chhunga sport hmanga rawngbawlnate pawh TGM hunlai hian chhawmnun zel a ni a, kohhran dangte chuan an hrethiam vaklo niin an sawi nghe nghe.

 

                              [TGM Flag]

Torchbearer Group Movement (TGM) hunchhung hian, 1973 - 1979 (kum 6) kumtin Thlai Khawmpui neih a ni a, T.G.M. Council tih a ni thin. Thalai hruaitute nikhata kal hmain rorelna hun leh Programme buatsaihna atan an hmang tlangpui. Kum 10 zet T.G.M. hming a put hnuin a hming thlak duhna a lo awm ta a, Corps hrang hranga Thalaite a hming thar tur rawtna siam tura hriattir an ni a. Chung rawtna zingah chuan Saitual Corps atanga rawtna lo lut 'The Young Crusaders' tih chu thlan a ni.  

Command Headquarters, Calcutta hnuaia kan awmlai khan Youthquest International Crusade hawnna turin Youth Congress, Rust Memorial Hall, Aizawl-ah 10-14 January, 1981 chhung khan neih a ni a. 'God's Soldiers Session' Cadet commissioning neih nghal anih avangin Programme bu pawh kaihkawp a ni. Hemi Youth Congress neih tur chungchanga circular-ah chuan T.G.M. tih thin chu December 31, 1980-ah a tawp ta a, Thalai pawl hming thar atan 'THE YOUNG CRUSADERS' niin, a lamtawi T.Y.C. tih a ni. January ni 1, 1981 atangin he hming thar hi a pu a, Youth Congress-ah inkaihhruaina bu thar pawh tihchhuah nghal a nih tur thu tarlan a ni.

Kum 1981 ah vek hian 'The Young Crusaders Khawmpui' Rust Memorial Hall-ah October ni 8-11 chhung khan 'Alive in Christ' tih thupui hmangin neih leh a ni. The Young Crusaders-ah hian kohhran dang atang pawhin member a nih theih a, thalai tam tak kan rawngbawlnaah hipkhawmin an awm a, Salvation Army-a awm hlen phah tate pawh an awm nual a ni. The Young Crusaders hunchhung hian 14-16 October, 1983 chhungin Youth Congress hlimawm tak Lunglei Corps, Citadel, Lunglei ah te; 26-28 October, 1984 Lamka Corps, Manipur ah te; 11-13 March 1988 chhungin Regional Headquarters, Aizawl bultumin 'Krista tana Nungin' tih thupui hmangin Aizawl Temple Corps-ah te leh 3-6 October, 1991 chhungin Saitual Corps-ah te Youth Congress neih a ni bawk a ni.

Amaherawhchu, kum 13 zet a vei hnuah kohhran tan leh thalai rawngbawlna-ah a him tawklo deuh nia hriatna a lo awm leh ta a. Territory dinhmuna hlankaite kan lo ni ta bawk nen, inkaihhruainate ennawn leh tihdanglam ngaite tidanglamin Kolasib Tumpui Field-a Youth Congress kum 1994 a neih a nih lai, ni 7 October T.Y.C. Congress Palai rorel inkhawmah palai rorelte'n lungrual takin The Young Crusaders tih chu Salvation Army Youth (SAY) tiin thlak an rawt a. India Eastern Territory-a kan Territorial Commander hmasaber Colonel Sawichhunga chuan IET Finance Board-ah pulut in, hming thlak rawtna hi pawm a nih hnuah hman zui a lo ni ta. Heihi vawiin ni thlenga thalaite hmunkhat a min phuarkhawmtu a lo ni ta a ni.

Salvation Army Youth hming a put hnu hian Youth Congress hetiang hian neih a ni tawh : October 16-19, 1997 khan A.R. Lammual, Aizawl-ah Youth Congress neih a ni. General & Mrs. John Gowans-a te nen October 12-16, 2000-ah khan Millennium Congress High School Field, Aizawl-ah neih a ni. 26-28 April, 2002 chhungin Lunglei Playground No.2-ah Youth Congress neih a ni a, tuipuiral atanga lokal Captain Basil Meinjeis chu Speaker atan hman a ni. October 11-16, 2005 chhungin Tumpui Field, Kolasib-ah Youth Congress neih a ni. 31st October - 2nd November, 2008 chhungin Chaltlang Field-ah Youth Congress neih a ni. November 4-6, 2011 chhungin Thenzawl-ah Youth Congress neih a ni bawk. October 8-12, 2014 chhung hian Vaivakawn Joint YMA Field-ah Territorial Youth Congress neih a ni a, Diamond Jubilee lawmna hun ropui tak neih nghal a  ni. India Eastern Territory Centenary lawmnaah SAY te pualin 27-28 April, 2017 chhung khan khan Youth Congress neih tel nghal a ni bawk.

India Eastern Territory-ah hian thalai rawngbawlna hian hmun pawimawhtak a luah a. Territory chhunga SAY member-te kan inkhaikhawmna tur leh hmalakna rualkhai zawk kan neih theihna turin Territorial Salvation Army Youth Council-hi kum 2002 khan Territorial Headquarters remtihpuina in din tan a ni. Council hmasaber hi May ni 2, 2002 khan khatih hunlaia TYS Major Laithanmawia kaihhruainain TYS room-ah neih a ni. SAY-te hmalakna chu kan Territory huapin inkaihhruaina mumal zawk nen a lo kal chho ta a, tun thleng hian tha takin a kal chho ta zel a ni. 

TSAY Council kaihhruaina hnuaiah hian Division, Bial leh Corps/Society-te'n inthlunzawmna tha tak neiin rawng kan bawlho mek a. Kum thum dan zelah Youth Congress neih thin a ni a, kum 2006 atang khan SAY Zirlai kumtin siam a ni a, tawng dang hmangte tan English version siamtel thin a ni. Kum 2005 atang khan TSAY Songster din a ni a, 2009 atang khan THQ kutah hlanin Territorial Staff Songster tih a lo ni ta. Kum 3 dan zela ennawn turin India Eastern Territory chhunga SAY zawng zawngte hman tur inkaihhruaina dan mumal tak kum 2002 khan duan chhuah a ni a, "Manual of Operation for Youth Work-in India Eastern Territory (SAY inkaihruaina)" tiin hman mek a ni.

                                      [SAY Logo 2022]

  

Tun dinhmunah hian Territotrial SAY Council hnuaiah Division SAY Council tha tak tak Division paruk (6) leh District pakhat (1) ah kalpui mek a ni a, SAY Member pawh kan Territory-ah hian mi 12,871 lai an awm mek a, Mipa - 7789 leh Hmeichhia - 5082 chiah an ni.

 

Jean Ralte

[As published in the Young Salvationist October 2022 Issue and Raldona October 2022 Issue] 

Also available in issuu - SAY Raising Day

The Maiden Tribute of Modern Babylon [Mizo]

Kum 1885 kum khan, tuk khat chu, 101 Queen Victoria Street, London-a Salvation Army Headquarters-ah chuan, zing lam dar 7:00 bawr velah hian kawngkharpui hmehrik chu a rawn ri ral ral a. In enkawltu chuan va chhawnin, hmeichhe tleirawl kum 17 awm vel, kawr senlar nalh tak haa lo ding hi a va hmu a. Chu tleirawl chuan, ni tlemte kalta khan mi in-a awm turin thingtlang atanga a lo thlen thu a sawi a. A ruaitu turte hnen alo thlen chuan nawhchizawrhna hmun lamah an dah ta daih mai a.

Nawhchizawrhna enkawltu chuan mi mit la thei tur ang berin a cheibawl a, dawrtute lo mutpui tur erawh chuan nawrlui chiahlo in, midangte ang bawka ama thua inzuar mai turin a nghak a ni. Chu hmun chu chhuahsan dan tur a dap nasa hle a, London khawpuiah lah hmelhriat tumah a nei si lo. An khuaa a awm lai khan Salvation Army inkhawmnaah a lo tel tawh a, a thawmhnaw bawma Hlabu kawm hnunglama Salvation Army Headquarters Address awm chu hrechhuakin, in humhim nan pan a tum ta a. A ruk tein zing dar 4:00 ah nawhchi zawrhna hmun chu chhuahsanin, kawr senlar haa Hlabu keng chungin a rawn zawng ta a ni.

Chu tleirawl lokal takah chuan, Bramwell Booth-a pawh hmuithla hmu ang maia sawinghinin a awm a, langsar si lovin an velah mihring hmanga sumdawnna thuk tak a awm ngei a ni tih a chiang ta hle mai. Whitechapel-a mi harsate awmna hmun Salvation Army-in a siama lokalte hi Bramwell-a nupui Florence-i hian alo titi pui thin a. Chuta awm tleirawl pakhat chuan, mi pakhatin a hrai rui a, a harh chhuah chuan nawhchizawrhna hmuna a lo awm reng thu a sawi a. Hmeichhia awm vete chuan Europe khawi emaw bera thawnchhuah annih tur thu an sawi a hriat hnu chuan, tukverh-ah lawn liamin a tlanchhiatsan thu a sawi a ni. England-ah nawhchizawrhna hmun a awm a, ramdanga thawnchhuah an ni thin tih chu an hrechiang leh zual ta a, chu mai piah lamah hmeichhia - naupang kum 10 tling awrhte lamin khawihchhiat an nih tih han hriat chuan a thawng hle mai.  Hnathawh tur tha tak tak tawk tarhin, chumi beiseite chu an lo man a, an duhlo chung man luih te pawh an awm a ni. Hengte hi lo thleng palh ni lovin, felfai taka ruahmanna hnuaia sumdawnna lian tham tak a ni.

Catherine Booth-i pawh khan nawhchizuar tam tak hi an duh reng vanga ti an ni lo tih a sawi uar hle a, hmeichhe naupangte heng hmunah hnim phumin an awm ngei a ni tih a tlangthan khan, a ngaihdan kha mite'n an tawmpui a ni. Tichuan, mihring hmanga sumdawnna chinfel chu Salvation Army kovah nghahin a lo awm ta a, tih makmawh a lo ni ta. Mipui ngaihdan thawng harh tur hian Bramwell-a chuan a nu leh pa thian tha tak, chanchinbu mi William Thomas Stead-a chu sangawi zawnpui atan a sawm a, a ni hi thu leh hla thiam, mite hriat hlawh tak a ni.

A bul tan nan W.T.Stead-a chuan Rebecca Jarrett-i nawhchizawrhna hmun enkawltu ni thin leh nawhchizuar thin tleirawl pathum Whitechapel-a humhimna hnuaia awm, kum 16 hnuailam thah te chu a mal te te in an tawnhriat atangin thil kalhmang hrechiang lehzual turin a zawt chhuak a. Nimahsela, ziaka tlangzarh atan chuan a tawklo tih a hria a, thil nih dan a taka tawn ngei atanga ziah chhuah tulin a hre tlat mai. Bramwell-a leh Stead-a te chuan Salvationists nula pakhat chu Nawhchizawrhna hmuna an awmdan hrechiang lehzual turin ni 10 chhung, enthlatu angin an thawn lut a. A enkawltu in a rinhlelh lohna turin, a pawisa thehluh tur Salvation Army in a tumsak a. Dawrtute lakah a him hram nain, tawnhriat duh awmlo tak tak a tawng nual a ni. An rinhlelh ang ngeiin, enthlatu hian naupang kum 13 tlinglo te pawh he hmunah hian tihluihna in an lo awm ngei tih a hmu a. Stead-a ngei pawh chuan awlsam takin tleirawl kum 16 tlinglo pahnih lai chu, nemngheh nan pound 10 in a lei a, a zilh hrep nghe nghe a ni.

Tichuan, naupangte nawhchizawrhna khura hruailuh an nih dan, W.T.Stead-a magazine 'Pall Mall Gazette' a chhuah turin, a taka tih dan tur an ruahman ta a. Hmeichhe naupang kumtlinglo lei leh tuipui rala thawnchhuah a awlsam dan leh tihfo anihzia tarlanna turin.

Rebecca Jarrett-i chuan hmeichhe naupang hralh duh a zawng ta a, nawhchizawrhna hmun lo enkawl tawh thin anih avangin atan a harsa lem lo. Hmeichhe naupang Eliza Armstrong-i, kum 13 mi chu pound 5 lekin a nu hnen atangin a lei theih a. A thianghlim ngei ani tih finfiah a tul avangin, finfiah hmain pound 3 pek a ni a, finfiah hnuah pound 2 hlan leh a ni. Tichuan, naupang Eliza chu chloroform hmanga tihruih a ni. W.T.Stead-a chuan a dawrtu angin Nawhchizawrhna hmunah chuan, room pakhatah a awmpui a. Chumi hmun atang chuan hruai chhuakin, tuipuiah lawng hmangin France ram pana thawn a ni a, an thawnchhuah hma hian a thianghlim leh thianghlim loh finfiah leh a ni. Buaina engmah tawk lovin France rama Nimes-ah Salvation Army rescue home-ah enkawl zui a ni.

W.T.Stead-a thuziak 'The Maiden Tribute of Modern Babylon' chu Pall Mall Gazette-ah tihchhuah a ni nghal a. English hmeichhe naupang kum-13 mi lek chu pound 5-a lei a ni a, nawhchizawrhna hmunah a hriat ngailohte khawih chingpen tura dah a nih mai bakah, tuipui ralah harsatna awm miah lova phurh thlen a ni, chawhmeh tel ang lek in. He hmeichhe naupang hi khawih chhiat nilo mahse, hetiang tak hian hmeichhe naupangte sumdawnna atan hruai kawiin an awm thei tih chiang takin tarlan a ni ta.

The MAIDEN TRIBUTE OF MODERN BABYLON tih thupuia hman hi a nihna takah chuan huat tura phuah a ni reng a. Khatih hunlai Victorian era Britain kha khawvel dang zawng zawng aiin an in dah chungnung a, naupang nawhchizawrh tir tihte chu thu tawmkailo ngawih ngawih, hmanlai Babulon sakhuana anga tenawm leh dukdaklo anga ngai an ni. Chuvangin, Stead-a thuziak khan khawtlang thin a khei zar mai. Pall Mall Gazette-a a thuchhuah hmang chuan England-in hmun biru thei ang bera khungbo a duh tak mai chu khawvel mithmuhah a rawn phochhuak ta si a. Chutiang anih takah chuan, British mipui thinrimna chu Stead-a demte chungah tuan zet mahse, amah Stead-a hmer tel tur pawhin a inpeih nghal at mai. Stead-a, Bramwell Booth-a leh Rebecca Jarrett-i te chu an thiltih avangin an chungthu ngaihtuah ngei a ngai ta. A ram mipuite hriat tura chung thil thleng tenawm an phochhuah duhna leh dan bawhchhetute lo humhim duhtute huatna chu vantlang rilruah a in buk tawk viau a ni.

He Maiden Tribute chungchanga article hmasaber chu July, 1885 khan tihchhuah a ni a, a zawmna article 3 te nen kar indawta tihchhuah a ni. Stead-a chuan mipat –hmeichhiatna lama sumdawnna chungchang tarlangin, a hming ‘Lily’ tia thupsak Eliza Armstrong-i hralh anih dan kimchang taka ziakin, London-ah thinrimna namenlo a kaiharh nghal a. Bramwell Booth-a chuan, ‘A tluk tur awmlo turin, chanchinbu kaltlanga British mipuite, thli nataka chhem ang mai hian a tinghing a ni’, tiin a chhinchhiah. Mipui mimir a tham nat em emna chhan pakhat chu, article chhuahtu Pall Mall Gazette hi chanchinbu rintlak, thu belhchian dawllo chhuah ve ngailo, clubmen te rawn ber a ni miau a. Chuvangin, Stead-a thuziak chu ngaihzam mai mai chi a ni hauh lo, loh theih lohvin chhiartute chuan mipat-hmeichhiatna kaihhnawih sumdawnna a awm ngei a, zalen takin England dan hnuaiah kalpui anih chu rinhlelh rual a ni ta lo.

Kum 1885 nipui laia Parliament upper house thukhawm chuan a tum-3 na atan hmeichhia-tleirawlte humhimna tur bill a ngaihtuah nawn a lo ngai ta. He bill hian mipat-hmeichhiatna chungchanga anmahni thlemtute laka thutlukna siam tura kum puitlinga a ngaihte kum bithliah tihsan chu a tum ber a ni. Europe ram dangah chuan kum 18 tih anih tawh laiin, England-ah chuan kum 13 chauh a la ni si a, Bramwell Booth-a phei chuan thil awmlo leh chimawm takah a ngai a ni. Catherine Booth-i pawhin England dan keng kawhtute’n an dan siama kak zau tak awm an tarlanna ni hialin a sawi. He bill hian tum-2 zet lower house-a sawihona a paltlang zo tawhlo a, a chhan chu upat hmel taka lang hmeichhia kum naupang zawkte’n putar hausa takte an thlem a, verther taka an rosum an laksak venna niin an ngai tlat. A tum 3 na tura lower house-in a ngaihtuah leh hun chiah tinzawnin he Maiden Tribute article te chhuah ani hian mipui-mimir chhia leh tha hriatna a kaiharh a ni. Tichuan, he bill hi pass anih hlauh chuan ‘Lily’ te ang hmeichhe naupang khuaikhem thin tute thiamloh chantir a awlsam phah dawn a ni.

Stead-a thuziakin a chawh phur mek chhem alh zual turin Sipai Pawl chuan bill pass ngei anih theihna turin thehlar lamah tan an lo la bawk a. July ni 18-a War Cry chhuak chuan chhiartute ‘Hmeichhe Naupang Humhim’ tura ngenna thuchah danglam tak a rawn keng tel a:

Hemi chungchanga House of Commons hnena ngenna atan, ramchhunga Corps leh Headquarters-ah te hming sign-na tur ni engemawzat dah a ni ang. Officer leh Sipai tinte chu hming ziak tura beisei annih bakah midang a tam thei ang ber an thlawpna hmingziak lakhawm turin a ngen a ni.

Kar hnih chhungin mi 393,000 te thlawpna hming ziak lakkhawmin a awm.

Chutih lai chuan, Stead-a tihdan dungthulin, Catherine Booth-i chuan England-a mi challang deuhte kaichhana sawm turin hma a la ve thung a. Stead-a ai maha kal thuiin, Archbishop of Canterbury ni lovin British Prime Minister leh Queen Victoria te hnenah lehkha a thawn a. Lalnu aiawhtu hnen atanga chhanna a dawnah chuan, sorkar inrelbawlnaah a inrawlh theilo naa, Army te’n hmeichhe naupangte humhimna tura an hmalakna chu a thlawp tih a rawn hriattir a. Lalnu hnen atanga thuziak a dawn te chu London-a Sipai Pawl inkhawmna hrang hrangah sawichhuah a ni.

Ngenna an siam, mi chi hrang hrang thlawpna hmingziak chu 4 km laia sei lehkhazial a ni a, lower house-in bill a ennawn tur niah chuan thehluh a ni. Westminster lalin panin, vutbuak rawng sakawr pali in sakawt tawlailir a hnuh chuan hma a hruai a, Parliament thutkhawm laia rimawi tum phal anih loh avangin kawng chanve thlengin Band-pu 50 rualin hma an hruai a, mite hriat hlawh tak Sipai Pawl uniform hain hmeichhia 300 rual an kal bawk a. Officer 8 te’n kuang zawn angin chu lehkha zial chu an kokiah puin House of Commons chhuatlaiah an zalh ta a ni.

An ngenna siama siamthat an phut thil 4 chu:

1. Hmeichhia te mahnia thutlukna siam thei chin kum bithliah chu kum 18 a tihsan ni rawh se.

2. Nawhchizuar tura mite lak/dap khawm chu dan bawhchhiatna ni rawh se.

3. Nawhchizawrhna in ni a rinhlehte chu Police te’n luh theihna leh dap theihna nei rawh se.

4. Hmeichhiate thlem/khuaikhem chu dan bawhchhiatna ni rawh se.

Upper House rawtna kum bithliah kum 15 a tihsan chu lehthalin lower house-ah chuan vote 179/71 hmangin kum 16 ah tihsan a ni ta a, chu mai bakah nawhchizawrhna hmun zawng zawng tihtawpna dan nen. Sipai Pawl in a nawr telloh mipa leh mipa inkawp chu he dan thar hian a hmer tel nghal a, chumi hmang chuan 1895 khan lemchan-ziaktu lar Oscar Wilde-a chu man niin kum hnih chhung hrehawm taka hnathawk turin taninah khung a ni. Hmeichhiate kumtlin kum tihsan hi Stead-a leh Sipai Pawl tan chuan hnehna ropui tak a ni a, chumi piah lamah an in rawlh avang hian, ti-deka rorelna kalpui thin lower house chu chhem alha awmin, tum 2 lai alo hnawl tawh bill pass-in a awm theih phah ta a ni.

Amaherawhchu, thu thehdarh anih theih dan hailan a han nih meuh chuan mipui-mimir thinurna an chungah a fu hneh hle mai. Lehkhabu hralhchhuaktu W.H.Smith company chuan Stead-a article a tel avangin Pall Mall Gazette an hralh duhlo a, Parliament member pakhatin House of Commons-ah ngenna siamin zahmawh rawngkai a ziah avangin Stead-a chungthu ngaihtuah turin a ti bawk a. Tichuan, Bramwell Booth, Rebecca Jarrett-i leh W.T.Stead-a te chu 1861 dan hmangin naupang rubo-ah puh an ni a, he dan hmang hian naupang rubo tak tak tute chu man an la ni ngai hauhlo thung. Eliza Armstrong-i nu lah a thenawmte’n a fanu a hralh avanga an selna anka do zo lovin, mi ina hnathawk tur chauhva hralh angah a inchhal thar leh a, thubuaiah a changlo thei ta lo. Heng mi pathumte hi mipuite chuan dem thar lehin, siamthatu aiin tisualtuah puh an ni ta a ni.

London-a criminal court Old Bailey-ah Bramwell, Jarrett leh Stead-a te chu dan lo anga a nu leh pate hnen atang leh an phallo chung Eliza Armstrong-i laksaktuah puhin kum 1885 favang-ah an chungthu rel a ni ta. Rorelna hnaihah chuan mi tawrawt rual an pungkhawm a, mi pangngai chinte lahin mipat-hmeichhiatna lama sumdawnna dodal inti chungin Sipai Pawl hmalak dan erawh an thlawp duh si lo. An hmalak dan Sipai Pawlin lo thlawp velo ngawt turin engtinmah hma an la ve der bawk si lo. General William Booth-a chuan, ‘An chungthu ngaihtuaha awm chu mite seh thin sihal hrem aia hmelma an awm avanga ui lo bauh thinte hrem ang ani. Hmeichhia tleirawlte paltlang thil rapthlak tak laihlana awmte khuahkhirh tur hian engemawtal tih awm tak a ni si a…kei mi thawng ber chu an hrehawmna leh tawrhna nasa takte hi a ni zawk asin!’, tiin thubuai siamtute lakah demna thu hriam takin a phuhchhuak hial a ni.

Stead-a te thlavang hauh turin Archbishop of Canterbury pawh a lo tel ngei a, amaherawhchu thu a sawi ve phalsak a ni ta lo. Khawtlangin an do rawn takah chuan Stead-a’n anmahni pui tura kaichhan alo sawm sa te chu an tangkai ta lo. Jarrett-i tan a tawrh hlelhawm lehzual a, Armstrong thubuaia a tel vena piah lamah, inzuarturte zawngkhawmtu hna a lo thawh tawhna chinlehin a awm si a. Kum khat awrh Sipai Pawl zawma nunthar zawh ve tan chauh a ni a, nawhchizawrhna khawvelah hmelhriat tam tak a la nei si a, thenkhat humhim a tumna lamah dawtte pawh a sawi phah hial a ni.

An chunga rorelna inlumlet dan chu lungchhiatthlak leh hriatthiam har tak a ni. An dikna tanchhan tura an thusawite lah anmahni thiamloh chantir tura kawihher a ni thul. Jarrett-i phei chu rilru phili taka siam a ni, Florence Booth-i phei chuan, ‘Attorney General hian kawng tinrengin a chhaih kual a ni’, a ti hial. An ukil rawih Charles Russell-a chuan theihtawp chhuahin Jarrett-i tan darkar hnih zet a ngen sakna chuan court-a awm zawng zawng, Judge chenin an mittui a kaihchhuah sak hial a ni.

A tawpah chuan Jarrett-i chu thla-ruk, Stead-a thla-thum tang tura an chungthu rel a ni a, Bramwell-a erawh chhuah zalen a ni hram a ni.

W.T.Stead-a hian April 1912-a Titanic lawnglian pil ruala a nunkawng a zawh tawp hma zawng kha chu a lungin tan champhaah, a lungin tan kawr a ha ziah thin a, chhinchhiahna ropui takah a ngai a ni. Rebecca Jarrett-i pawh kum 87 thleng a dam a, a damchhung zawng hian London-a hmeichhia humsual daite tanpuiin a in hmang ral thak a ni.

Kum engemzawzat hnuah Pi Armstrong-i chu Eliza Armstrong-i hringtu nu diktak a ni lo tih hriatchhuah a ni a. Bramwell Booth-a chuan a lehkhabu Echoes & Memories-ah, a hunlai khan he thu hi hriatchhuah lo ni sela chu roreltute thutlukna kha a danglam ngei a rin thu a sawi. Tichuan, Bramwell-a chu Salvation Army General niin, kum 1929 a thih hma lawk thlengin he dinhmun hi a chelh a ni. A boral hma hian, hmeichhiate puitlin hun kum bithliah tihsan ani chu hnehna ropui tak anih piah lamah, a hnua hekna an tawh avanga rorelna an paltlang kha Sipai Pawl hnathawh tlangzarhna hmanrua tha tak nia a hriat thu tihian a ziak:

Rorelna kha Army tan thil tha tak a ni. Mite’n min hriat lar phah a, mibo leh chanhaite khaichhuahna kawngah, hmahruaitu dinhmunah thawklehkhatah min dah a ni. Mi thiltithei takte’n min hmelmak phah mahsela rei a daih lova, kan nghawngkawl min bah puitu tur tam tak min siam saka, chung mite nen chuan tun thlengin inkungkaihna tha kan neih phah a ni. He thil danglam tak kan paltlang avang hian hmeichhia humsual daite tana kan rawngbawlna zau taka hawnsak kan ni.

He Maiden Tribute campaign hi thil hlauhthawnawm leh theh lar nasat em em bawk si a ni a. Sipai huaisen tlemte chauh hmalakna chuan ram pumhuap khawih pha danglamna a thlen a, hmeichhe naupang tam tak hnehchhiaha an awmna tur tidanglamin kawng thar a sial sak a ni.

Stead, Jarrett leh Bramwell te inpekna leh tumruhna a ngaihsanawm hle, mihring hmanga sumdawnna (human trafficking) do tura lo penchhuakin, an hunlaia dan lo anga sumdawnna an do ngam. Mipuite’n an bengkhawm theihna turin thil hlauhawm leh hmingchhiatthlak tak an tawn tlang a, siam that ngai em em, vantlangin a hlamchhiah si chu sut-enin a awm phah ta a ni.

Tunlai hunah hian, khawvel hmun hrang hrangah, mihring hmanga sumdawnna hi a la bo lo tih kan hre theuh awm e. Catherine Booth-i chuan, ‘kan hmalam hun tieng tur chuan, kan tun hun hi kan thawn-harh/ chawhbuai a ngai’, a lo ti a. Danglamna thlen tur chuan dodalna leh sawiselna kan hmachhawn ngam a ngai a, mihring hmanga sumdawnna hluar em emna khawvelah hian pen chhuaka dodal tur kan ni. Salvationist mi hrat khawkheng, mitlemte te’n an lo tan tawh chhunzawm zel hi kan kova nghah a ni tih i hre thar leh ang u. Dolet tura theihna neilo, phuarbeh tlatte chhuah zalen a, an dikna lanchhuah tir turin, I penchhuak ang u khai!

 

[From the Book 'Insane' - Translated by Jean Ralte]