Lalbiaki hi Hrangphunga leh
Darsuaki te fanu neihchhun a ni. Novermber 1875 a piang niin Chawrahmun, Ngopa khaw chhim lama awm a lungdawh-ah a inziak. (kum 100 kardanah kan piang. Ed.) Hmarah Ngopa lal - Hrangchhuana a han nei a,
fa pali - mipa Pathum leh hmeichhia pakhat a nei. A va awm hlen ta a, a dam
tawh lo. February ni 10, 1921 ah a boral a, kuang a ur hnuhnun ber pawl a ni a, an ur tawih thei lo a, a rep tlat mai a, a kuang nen an phum ta a ni awm e.
Hrangchhuana, Ngopa lal hian ka pu Major Saibuanga ni - Lalbiaki a neih dawn hian, Ni tla senglo a roreltu Kumpinu lalte'n nupui an neih dawna an thlithlai ang thlapa thlithlaiin, lungsi takin a nei a ni.
Aizawl dintu leh lal hmasa ber chu Lalsavunga a ni a. Lalsavunga chuan Vanhnuailiana, Lalphunga, Thawmvunga, Lalchawngpuii (Laltheri) Chawngpuituali (Vanpuilala nupui) leh Ropuiliani (Chhim lam lal Vandula nupui) te a hring a. Vanhnuailiana chuan Liankhama, Lalburha, Dothiauva, Buangtheuva leh Chinhleia te a hring a. Liankhama hian Hrangchhuana, Hrangkima leh Thangkhuma te a hring leh a. Hrangchhuana chuan Lalzidinga, Phungchawnga leh Shillonga te kan ni Lalbiaki lakah a hring a ni.
Kum 1889 Vai len vawi hnihna hunlai khan Liankhama Sailo lal ropui tak chuan Zawlnghak In 1000 khua ah a lal a. A khaw tlangvalte chuan Vai lian sipai lokalte chu thihchilh tumin an lo inpuahchah nasa mai a. An lalpa Liankhama erawh chuan, ‘E! mihring kan pamhmai lua ang e, tha takin remna thu ilo sawipui teh zawk ang u’, tiin a khaw tlangval thih ngam lu-pu za tam rual chu a hmin ta hram a.
Tlangval za tam rualte chuan, ‘A nih leh vaihote chuan nang kan lalpa an man vaih che chuan sipai zawng zawngte chu kan tihlum vek dawn a ni’, tiin chemte hriam an puan hnuai ta theuh a. An lalpa chu han man vaih se zawng, an che nasa hle ang tih chu a rinawm hle mai. Mahse man ta lovin inremna kut dinglam an lo insuih ta zawk a. Amaherawhchu, an lalpa Liankhama chu rei dam lovin a thi ta mai a. A khua hi an tihtham ve bawk a, lo neih tur ram tha zuanin Rabung (tunlaia Aiduzawl kianga awm khi) ah khaw lian tak an va din leh ta a.
Hetih hunlaia an khawnbawl upate chu – Chawngkuta Khawlhring, Laizova Fanai, Chhawnthuama Pawi, Vungâra Hrahsel, Hluttuala Hlawndo, Zakapa Ralte, Bawngkawia Hniarcheng, Tinmanga Hmar te an ni hlawm a. Chutia lalpa berin a thihsan a, hmeithai lalnu hova awm chu pamhmai deuhvin an inhria a, lal fapa Hrangchhuana a lo tlangval ve ta bawk nen, nupui neihtir thuai an duh ta a. ‘Chhim leh Hmarah kan chuang kan liam awm bil love, Sang khaw sawr fe Lalsavunga thlah kan duai ngai lo: hmeithai khua nih kan duh ngai lo. Hrangchhuana a lo tlangval tawh a, khawii lal nula nge kan neih ang? Tiin Siallam dar han tum ila, naktuk a siah tluk a va chakawm ve; hmeithai dart al kha han tum teh u’, an ti a. Lalnu chuan, ’Hmeithai sarin sial a phet thlu ngai love’, a lo ti ta si a. Khawnbawl upaho rorel thu tihthluk tak ber chu, “Chhim lam lal nula hmeltha Lalbiaki, Thiltlang lal Hrangphunga Sailo fanu a awm a, chu ngei chu I va en ang u”, tih a ni.
Thiltlang lal fanu Lalbiaki en tur hian lal upate leh tlangvalte an thlangfel a, an zingah hian Chalnghaka Khiangte pawh a tel a ni. Chung hunlai chuan inkalpawhna kawng a la mumallo hle a, Aizawlah vai an lal tawh si a, Lunglei kawng pawh an sial tan tawh a. Kuli-a man an tawh loh nan Chhawrtui leh Vancheng lam hrutin an chhuak ta a.
Thiltlang khua an thlen ni tur hrilh turin zualko an tlan tir hmasa a, an thlenin turte an lo ruat sa diam a. Lal nula pawh chu amah en tura lokal annih thu an hrilh lawk bawk a ni. Kawtchhuahah chuan zu um nen an lo hmuak a, an thlenna inah chuan zu belpui dawnkawnin an lo siak dir tur tur bawk a ni. Upate chuan zu chu an han in a, tlangvalte erawh chuan, ‘lal nula chu ilo va en hmasa teh ang’, tiin Tv.Chalnghaka hovin an kal thung a.
Lal nula chuan an lokalna chanchin leh chanchin dangte chipchiar taka a lo zawhfiah hnu chuan inchhunga leng lut turin a sawm ta a. Lal nula Lalbiaki chuan sahriak um a khai thla a, a kutphah in a nuai a, khumpui leh tapchhak inkar dawhchhovah a thu thluang a, “Hrangchhuan ka kapkarah hian lo thu teh; Sailo tlangval pawh I ang love, I lu a thur em mai, sahriak ka lo thih ang che” a han ti a. Lal nula chuan sahriak chu a luah a han thih ta a. Samkhuihin a han khuih mam pial ta zen mai a. A sam te chu a zial sak ta a; luhkapuiah chuan an thukhawm leh ta a. Tichuan tlaiah chuan lal upa a lo kal a, ruai theh turin a rawn ko ta a; lal nula erawh chu a kal ve duh ta lova. Zanah chuan an kal hah bawk a, an mu ta mai a. A tukah chuan Hrangchhuana leh a Upate chuan kim takin Lal nula chu en an tum thu chu Thiltlang Lal upa leh lal chhungkua chu an hrilh lawk a. Tukthuan eikham chuan lal nula pawh inchei peih diamin a awm a; Hrangchhuana leh a Upate chu an va leng a. Tichuan Thiltlang Lal leh a upate chuan Hranden zu belpui, a thlum tha tha kha dawhkawnin an lo siak ang ngun mai a; an lo siak peih diam tawh a; an lo thu bial luih mai a.
'Lal nula chuan kawng lo hawn sak sela, Hrangchhuana lut hmasa rawh se', an ti a, a lut hmasa ta a. Khawnbawl Upate chuan, 'Thu rawh u, thu vek rawh u. In tan zu hi kan lo siak a ni e, in rawh u', an lo ti a. 'In lo va thleng har ve; kan lo nghakhlel teh che u asin le!', an ti a, zu siak khat chu an tlak ta a. Hrangchhuana Upa min chuan, 'Khai le, Sailo danin sum, man leh mualte kan sawi hmain kan naute'n tih tur an neih chu han ti teh se', a han ti a.
Sailovin an nupui tur an lo in en dan chu i han sawi law law teh ang. Aw le - England Lalber nupui tur an en dan nen enge a danglamna bik? (English aia kan Lalte an lo mawlna bik a awm lohzia pawh kan la khaikhin dawn nia). Thiltlang Lal Hrangphunga fanu Lalbiaki, nula hmeltha hmingthanga an sawi chuan thil awmzia tur chu a lo hre lawk ve vek a. A sakruang leh fuke engkimte chu fai takin a lo insingsa lawk diam a ni.
Tichuan tlangval hote chu bahzar lamah an phei ta vek a. Lal inpui banglai chhungah puan zar hliah phui tlat chhungah an in enfiah (kheh fai) vek dawn a ni. Amaherawhchu an lu chhip erawh a lang thei reng tur a ni. Lal nula leh Lal tlangval chu pindan puanzar hliahah chuan an lut dun ta a. Lal nula chuan a thawmhnaw inbel zawng zawng chu a inhlip ta vek a; saruak ngalngatin a han ding ta a. Lal tlangval Hrangchhuana chuan a kephah atangin a han enchho leh a; a sir tawn tawnin a han enfiah leh ta vek bawk a. Amaherawhchu hmangaihna leh hmeichhiat-mipatna chu an chawk tho tur a ni lo.
Chutia an envel lai chuan, 'Ka chhip chhuakin min han en teh. A bal reng reng a lang lova. Kutchuk leh panser a lang hek lo', a lo ti a. He Lal nula hi kum 1873 thli chhe thleh kuma piang a ni a, a mawng bawr lai hi a buk tha hle a (a mawng bawr a lian a ni awm e). Lal tlangval chuan, 'I mawng bawr chu a va lian em!', a han tih chu an hria an ti a; chumi hnuin pindan atangin an lo chhuak ta a.
Khawnbawl Upa chuan, 'Engkim a tha maw?', tiin a lo zawt a. A chhanna chu "Tha" tih a nih hnuin man leh mual chu an sawi ta nghal a. A lam hlat em avangin sial, belpui leh thi-hna te, thimal te chu pawisa in an tel ta zung zung a, an in rem ta thuai a. 'Sailo nupui nei chuan vawkpui an tlei e', an tih thin angin rei tawk tak an cham hnuin Lalbiaki, Hrangphunga Sailo Lal fanu chu ran lu kimin an lawi a; Lal nula chu Rabung Lalnu ni turin an hawpui vang vang a ni.
[Hei hi pi Lalbiaki lungdawh a nih hi Chawrahmun, Ngopa khaw chhim lama awm a ni e. Pi Lalbiaki kha kuang a ur hnuhnun ber pawl a ni a, an ur tawih thei lo a, a rep tlat mai a, a kuang nen an phum ta a ni. Source - Chhuantea Khawlhring (facebook friend)]
[Pi Lalbiaki thlanlung hi ka Pu Lalthuama, Kanaan Vengin a thlalak tha deuh siamin a Museum-ah a lo display kalh mai a, vawiin 23.10.2023 hian ka zuk hmu hlauh mai]
Hrangchhuana leh Lalbiaki fapa Lalzidinga hi Aizawlah lehkha zira a awm laiin Pu Chiangdailova te chhungkua belin Mission vengah a awm a, Pu Chiangdailova nupui Pi Ngochhuni (Vanapa tunu) kha Khawdungsei khawchhuak a ni. Sipai Pawl chhungkua pahnih - Pu Kawlkhuma te chhungkua leh Pu Chiangdailova te chhungkua Mission veng atanga hnawhchhuah annih khan, an thuam phurh puiin a kal ve zel a, Ratu lal Lalhleia khan Sailo lal fapa meuhvin a rawn kalpui chu tiin vawk a lo talhsak hial a ni. Hrangchhuna lalna hmun tak chu Khawdungsei a ni a, a khawper Ngopa-ah Lalzidinga hi a lal ta nghe nghe a ni.
Ka pu Major Saibuanga hi, a ni neihchhun Ni Lalbiaki te khua atang hian lung an rawn kensak a, ka ni Lalbiaki 'Hmui lungdelh' (La an kaih a Hmui delhnghehna atana hman thin) a ni tiin chhuang takin a sawi thin a, an inneih Golden Jubilee lung bawmah dahin uluk taka vawnthat a la ni.
[Adapted from the writings of Pu V.Thangchuanga dated 21.11.1991]
Jean Ralte
