ᕼᖇEᗰᕼᗰᑌᑎ ᕼᒪᗩᑌ ᖇᗩᗯᕼ

Vanram hi a awm I ring em? I ring anih chuan, Hremhmun pawh a awm ngei tih ilo hre tel dawn nia. Kum zabi 21-naa Thil Hlauhawm lo thleng tur William Booth-a sawi lawk zingah khan, 'Hremhmun tello Vanram' tih hi a tel asin. Kan hunbi hman mek a thil hlauhawm tak chu, Hremhmun a awm tih reng hre changlo a nun hi a ni awm e. 

Chanchintha Luka ziak (16:19-31) ah hian Mihausa leh Lazara chanchin kan hmu a. An thih hnu ah, Lazara chu Abraham-a angchhung (Vanram)-a a awm tak thu leh, Mihausa chu mitthi khua (Hremhmun)-a a awm tak thu kha. He thu hmang hian, Lal Isuan chiang takin, kan lei taksa a boral hnua kan awmna tur Hremhmun emaw, Vanram emaw a awm ngei tih min hriattir. Tin, he Hremhmun leh Vanram-a awmte an in kal pawh theihlohna tura, an inkara leikak nasa tak a awm thu pawh tarlan a ni. 

Chanchintha Mathaia ziak (25:31-46) ah hian Khawvel Tawpa Rorelna lo awm tur chungchang Isuan a sawi bawk a. A ding lama mite hnena, 'ka Pa vohbik te u, lo kal ula, khawvel siam tantirh ata in tana ram buatsaih (Vanram) chu chang rawh u', tih leh, a vei lama mite hnenah thung, 'Anchhe dawngte u, kum khaw mei (Hremhmun), diabola leh a tirhkohte tana buatsaihah chuan mi kal bosan rawh u', a tih tur thu kan hmu a ni. 

Hremhmun chu engtiang taka hrehawm leh țihbaiawm tak ni ang maw? 

Tunlai hian natna hrik țihbaiawm tak, Corona Virus-in khawvel a chawk buai mek a. Covid-19 Positive an pung a, a tuar na zualte phei chuan, chu natna in a țham dan hrehawmzia leh mangan thlakzia an sawi chamchi a, a enkawltu lam pawhin la vei ve lote fimkhur tura an chah lawm lawm, thihna tùr ang maia thawk a ni. Mizoramah pawh reilote chhungin hri kai 14743 zet awmin, mi 61 in nunna an hloh tawh a ni. He hri in a mante, reilote chhung pawha a nghawng nat dante pawh kan hmelhriat tlang tawh a. Thenkhatte chu dam lehin, natna em em neilova Negative leh ta maite an awm a, tam tak hri avanga mual liam an awm bawk a ni. Kan damchhung reilote, Sam 39:5 ah phei chuan -'ka damchhung hi kutphah bawk chen lekin i siam a', ti a sawi, chumi hmun engemawzata thentet hunchhunga tuarna pawh hi manganthlak a ni si. 

Hremhmunah phei chuan, tuarna a tawp ve ngai lova, kumkhua atan a ni asin. A rei dawn ngar ngar a nia aw. Chanchintha Marka ziak (9:48) ah chuan, '...an lung thih ngai lohna leh mei mih ngai lohna..', tiin Hremhmun (Gehena) chungchang sawiin, Isuan chu hmuna kal ai chuan kan taksa peng tan zawk hial turin min fuih a ni. Chu mai a nilo, Mihausa-pa khan rilru fim karin, mei-sa a tuar a, tui farkhat lek pawh a thlahlel em em a ni. Khawvela la awm, a pianpui unaute a vei a, an tan thahnemngai takin a ngensak hial a, a sawt tawh si lo. 

Khawvela kan awmchhung reilote, mitkhap kar lek atan hian nachhawkna zawngin, in awm tleina kan dap a, ngaihtuahna fim hmang duh lovin, min pawlh nu tur kan fawmkhawm thin. Hremhmunah chuan chutiang beisei tur a awm dawn lo, beiseina bo vek, rilru fim kar si in, a hauva tuar tlawk tlawkna hmun a ni. Pathian a awm ve silo a, kan hriatrengnate chu min tina zualtu a ni dawn. 

Hremhmun pana kan liam lohna tur hian dai theuna Pa Pathianin min buatsaih sak a, A lungawina zan Krista Isua thisen hmangin Chhandamna min siam sak a ni. Zawlnei Isaia (53:4-5) lehkhabuah, ' A ni chuan kan natnate phurin, kan lungngaihnate pawh a phur ngei a, nimahsela keini chuan lungngaihna tlakbuakah, Pathian vuakah, tihretheihah kan ngai si a. Nimahsela ani chu kan bawhchhiatnate avangin hliamin a awm a, kan khawlohna avanga vuak thitlinin a awm a; kan thlamuanna tura thununna chu a chungah a tla a; a vuakna vualtea tihdamin kan awm ta.' tia ziak ang khan. 

Heti mai hian Krista zarah Chhandam kan ni. Chanchintha Johana 3:16 ah, 'Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna  an neih zawk nan', tiin Isua ngeiin min hriattir a ni. Isua chauh hi kawng leh thutak leh nunna a ni si a, Amaha kallo chu tumah Pa hnen an thleng dawn lo. 

Hremhmun nena kan inkara zuang lut, Nazaret khua tlangval hmeltha- Isua ruang, ruang azawnga ruang ropui leh hlu ber, zuan ka-hlenin Hremhmunah i zuang lut țalh dawn em ni?

ʝɛǟռ ʀǟʟȶɛ

ℤ𝕚𝕣𝕥𝕚𝕣𝕥𝕦 ℂ𝕙𝕙𝕦𝕒𝕟𝕒𝕨𝕞

Thil thleng zen zen lo niin ka hria a, an phalna la lemloin ka han post chhawng ngawt mai teh ang.

Tleirawl pakhat a pa-in a thihsan, a nu hova khawsa chu Manipur atangin Sawleng-ah hian an rawn pem thla a. Manipur-a an awmlaiin Matric exam tawhin, Maths subject-ah a lo fail tawh nghe nghe a. Sawleng-a an rawn pem hnu hian Matric chu bei nawn lehin, Captain Vanramthianghlima, Sawleng Corps Commanding Officer-in zirlai 20 rual zet free tuition a pek zingah a tel ve a. Tichuan, kum 2021 Matric result chhuakah khan he rawlthar hi Ist Division-ah pass-in, Maths subject-ah Letter a rawn hmu ta nghe nghe a ni.

A nu, hmeithai nu ve mai lawm lutuk chuan, Sawleng CO te chu han lenchilhin, chini te, bawnghnute te lawmthu sawi nana a pek bakah hnukulh țeuha lawmthu sawiin an hnam dana chawimawina sang Thangchhuah puan a han bah tir ta a ni.

Hetiang taka inpekna hi a ropui êm a, upbo mai atan chuan ka ui tlat mai. Chutihrualin, tun hmaa kan mihuai kal hmasate inpekna han tarlan tel hi inhmeh hlein ka hria a,  mi pahnih chauh ka han tarlang ange.

𝕾𝖊𝖓𝖎𝖔𝖗 𝕮𝖆𝖕𝖙𝖆𝖎𝖓 𝕿𝖍𝖆𝖜𝖒𝖆:

Aizawl atanga Sipai Pawl hnawchhuah an nih khan Sawleng dai-ah an han inbengbel kha a ni a, chumi hmun chu kan hmun pawimawh tak, Zoram Chhandamna Sipai Pawl tana Holy Land a lo ni ta. He hmuna inbengbelte hi kum 1919 khan , Senior Captain lo ni ta Pu Thawma khan Khawruhlian atanga zawm vein, pu Kawlkhuma hnua Officer Training batch hmasaber 'Pioneers Session'-ah  a tel a. A hmun ruatna hmasaber Sawleng Corps-ah hian, amah L.P. pass alo ni bawk a, Sikul a hawng a ni. A thlawn vekin a thiamnate rawngbawlna atan hmangin, Corps enkawl bakah naupangte zirtirin a inpe a ni. He Sikulah hian Brig.Ngurliana pawh kha a zirchhuak nghe nghe. Ratu khuaa Sorkar zirtirtu awm khan, Sipai Pawl Naupang a zirtir duhloh avangin a pemsan a, zirtirtu an neih takloh avangin Sawleng-a Pu Thawma Sikul hi a chhehvel khua naupangte tan chuan zirna hmun pawimawh tak a ni.

𝕮𝖆𝖕𝖙𝖆𝖎𝖓 𝕿𝖚𝖆𝖑𝖌𝖔:

Sipai Pawl a luh hma pawha zirtirtu hna lo thawk tawh Captain Tualgo-a khan kum 1938 khan a Corps awp hmasaber Khawlian Corps-ah, an khua in zirtirtu an neihloh avangin hlawh hran nei miah lovin Corps awp bakah zirtirtu hna a thawk a, 'A' pawl atang Class V thleng a zirtir a, Pawl IV leh Pawl V naupangte chu English Coversation tlangpui hmang thei turin a zirtir thiam vek a ni. A sikul hi Pawlrang, Sawleng, Khawlek, Vanbawng, Bungpilion, Tlangnuan, Daido leh Khawdungsei atangin naupangte'n an rawn pan khawm a ni.

Kum 1947 atanga kum1949 a thihni thlengin Ngopa Corps a vawn laia Ngopa khua Middle Anglo Vernacular (MAV) ram tawh tungding lehin hlawh hran nei hauh lovin zirtir hna, Corps enkawl bakah a thawk leh a. A Sikul naupang mi 8, Corps Cadet-a a kaihhruaite chu Salvation Army Officer an ni ta nghe nghe a ni.

Hetiang taka mahni thiamnate uipui hauh lova midangte tana luangchhuak thin te hi an ngaihsanawm tak meuh a, fak an phu ngawih ngawih a, THANGCHHUAH puan sintir hi an phu a ni.

ʝɛąŋ ཞąƖɬɛ