"Annie Laurie"

Hun tir lamah khan, a hunlai ang zela hla thluk lar mila hlaphuah lamah Salvation Army khan hriat a hlawh hle mai. General William Booth-a pawh in, 'Engvanginnge hla thluk tha zawng zawng diabola'n a neih vek bik ang?', a tih thu an sawi hial reng a. George Leybourne leh Alfred Lee te hla lar tak mai 'Champagne Charlie' thluk mila siam 'Bless his name, he sets me free' (S.A. Songbook Chorus 149) te chu chorus lar leh sak hlawh tak a ni thin. Scottish Salvationist, Robert Johnson pawh khan Here’s to good old whiskey hla thluk hmangin, tun thlenga kan raldona hla 'Thim lal kulh bei ula, thiat rawh u', Lieut-Colonel Kawlkhuma lehlin (S.A.Hlabu 435) hi a lo phuah a ni.

Kalvari a Krista (The Christ of Calvary) hla pawh hi mipa leh hmeichhia inhmangaihna hla mawi leh hriathlawh tak 'Annie Laurie' thluk hmanga siam a ni a. Anne Laurie hi nula pakhat hming niin, amah hmangaih em em tu Scottish mi William Douglas-a thu-hlaril phuah chu Lady Jane Scott-i hian hla-ah chantirin, a thluk hmingah 'Annie Laurie' puttir a ni ta a. He hla thluk hi Mizo-te phei chuan kan hre larin keimahni ta ang hiala kan neih a ni. A chhan chu 'Annie Laurie' hla thluk hmang hian kan hla phuahtu lar Durra Chawngthu (a hming tak Hrangthuama) chuan 'Tleitirah Tleitiri' a lo phuah a. Mizo Lengzem hla chi thumte zinga a chi hnihna, Sap hla thluk rinchhana Lengzem hla zingah, 1926 kuma Durra Chawngthuin a phuah, Tleitirah Tleitiri' hi a hmasa ber ni a hriat a ni nghe nghe. Vanlalruati'n thiam tak maia a sa ngaihthlak phei chuan hmulthi a kai ding sung sung thei a ni.

Kalvari a Krista phuahtu Nathan Atkinson Al­ders­ley hi Methodist thuhriltu thin, 1879 atanga Salvation Army zawm ta a ni. Keigh­ley Corps, York­shire-a an sergeant thin a ni a, eizawnna lamah chuan hlumbel zuartu a ni. Kum 1884 khan New Zealand lamah a pem a, arthritis avangin inah a awm deuh chawt a, hla tam tak phuahin kum 1883 War Cry-ah a hla tam tak phochhuah a ni.

Hringmi kara hmangaihna duhawm tak lo piang mah hla-a an chawi a, khawvel a dengchhuak anih si chuan, Kalvari-a Krista'n hringfate tana hmangaihna a leihbuak, a nun zawng zawng hlana a inphat ral vekna tluka kan tana thu mawi leh ngaihnawm a awm thei dawn em ni? Krista hi ka tana hming mawi ber a lo ni.

A thluk lah kan hriat lar sa a lo ni bawk a, Mizo tawnga J.K.Dawngzuala'n min lehlin sak hi Pathian chibai bukna atan fianrialah mahni chauh pawhin han sa hlerh hlerh phawt mai ila, amah aia thlan tur chuang kan nei law'ng e.

1. Lei leh van hmun zawngah hian,

Ka tana hming mawi ber;

Kalvari a thi Krista chu

Ka tan a hlu ber e.

 

Chorus:

Kalvari a Krista,

Ka tana hming mawi ber;

Hmingdang zawng aia mawi ber chu,

Kalvari a Krista.

 

2. Thildang reng ka thlang theilo,

A hmangaihna ka puang;

Sual ata min tlantu chu,

Kalvari a Krista.

 

3. Amah lova nun neilo,

Hmangaihin nun min pe;

Ka hlan ka nun thisen lei,

Kalvari a Krista.

Hla Copy link

 

[Pi Vanlalruati (fam) tluk zeta lem-thiam-aw nei T.Vanlalhmangaihi'n thiam tak maia 'Kalvari a Krista' a sak hi han ngaithla ve teh!]

[Headphone nena ngaihthlak a man hla, a satute hi IET Musical Force - Territorial Staff Songster, Central North Division Songster, Central South Division Songster te an ni a, Music nalh tak tumtute hi Territorial Staff Band te an ni e]

Jean Ralte [14.10.2022]