HLA THLAN KHAWMTE 2:1-7
Nula
Ka lo ni e, Saron rose pâr leh phaizâwla lili.
Tlangvâl
Hling zînga lili ang hi ka hmangaih chu a ni, Lanute
zîngah.
Nula
Ngaw hnuai thing zînga apple thing ang Ka duh tak chu a ni, tlangvâlte zîngah. A hlimah chuan ka ṭhu, nuam takin, A rah chu ka tân a thlum ngei e. Ruai ṭheh inah chuan kei mi hruai a, Ka chunga a puan zâr chu hmangaihna. Grêp thei chhanga mi tungnungin Mi tiharh teh u, apple theiin, Hmangaihnaah ka uai zo ta e. A kut vei lam chu lukhamin, A kut ding lamin mi pawm teh se!
Ka ngên tlat che u aw Jerusalem fanute, Saza leh ramzukpui chhâlin, Hmangaihna chu chawk thova tiharh lo tûrin; Amahin a duh hma chuan.
‘Phaizawl Lily Parmawi’ tih hla hi Pathian fakna hla, sak hlawh leh Kristian hlabu tam tak luahtu a ni. A phuahtu Charles Fry-a hi May ni 30, 1838 khan Alderbury, Wiltshire, England-ah a lo piang a. Music lama tui, violin, cello, piano, cornet leh harmonium tum thiam tak a ni a, Alderbury khuaa Wesleyan kohhranah lawiin orchestra leh band kaihruaitu a ni thin.
1878 kuma the Salvation Army te’n Salisbury-a rawngbawlna an tan khan diriamna nasa tak an tawk a, artui uih leh chawhmeh tawih te’n vawm an ni thin a, helai hmuna cheng Pu Fry-a khan a hmuhin pawi a ti hle a. Tichuan, brick rema engzawng Pu Fry-a leh a fapa pathumte chu the Salvation Army rawngbawltute venghim turin an rawn inpe ta ngawt mai a. A tukah chuan an venhimna ‘hmanrua’ dangdai tak mai – cornet 2, trombone 1 leh tuba tereuhte 1 nen an rawn thawkchhuak ta. Tibuaitute an hnawh karlakah chuan Rimawi an lo tum thin a, an Rimawi tum chuan mak tak maiin mipui a hipkhawm ta tlat mai, the Salvation Army thlaraubo chhandam hna thawk mekte thusawi ngaithla tur chuan mipui an rawn fuankhawm ta teuh mai a ni.
Fry Chhungkua te hmalakna chuan tharaubote chhanchhuahna kawngah kori nasa tak a tu a ni tih hriain, the Salvation Army hmuchhuaktu General William Booth-a chuan ‘thlaraubo manna campaign’ hmun tam takah a hruai thin. Fry Chhungkua mai bakah Salvationist dangte pawhin Band Rimawi chu chawinung zelin, the Salvation Army rawngbawlnaah ‘Band’ chuan hmun pawimawh tak a luah chho ta a ni. Charles William Fry-a chu Bandmaster hmasaber niin, Fry Chhungkua chu the Salvation Army Band hmasaber an lo ni ta.
Tarlan tawh angin, Band rawngbawlna mai bakah hian Charles Fry-a hian kan hriatrengna tur dang pawh min hnutchhiah a. Kristiante thinlung fan raih raih thei Hla, chuai ngailo tur ‘Phaizawl Lily Parmawi’ tih chu a lo phuah bawk a ni. A hla hi Solomon-a Hla Thlankhawm 2:1 ‘Ka lo ni e, Saron rose pâr leh phaizâwla lili’ behchhana siam niin, kum 1881-a dodalna tam tak hmachhawntu, thuhriltu lar William Booth-a, mimal taka Isua nen inlaichinna thuk tak an neih chungchang chawia siam a ni. December ni 29, 1881 khan the Salvation Army national magazine, the War Cry-ah phochhuah a ni.
A thluk hi the Salvation Army chin than angin, a hunlaia hla lenglawng lar tak "The Little Old Log Cabin in the Lane" kum 1871 a William Shakespeare Hays-a (1837-1907) siam 4/4 Moderato beat chu hman a ni. American evangelist Ira D. Sankey-a (1840-1908) kha he hla chawilartu pawimawh tak a ni a, Protestant Fakna Hlabu hrang hrang a luah ta reng a. A thluk siamtu Will Hays-a, hla lenglawng lama miril pawh ‘Phaizawl Lily Parmawi’ hla zarah Kristiante hriat a hlawh phah ta a ni. Hlabu thenkhatah chuan a tune (hla-thluk) hming hi ‘Salvationist’ tia hriat a ni bawk a, the Salvation Army Band tune book (Blue book) ah ‘the lily of the valley’ tiin no.860-na ah a awm.
Kum 40 a tlin tawh hnua huaisen taka thutlukna siam a, hma a lakna avanga hmingdai tawh ngailo tur, Charles Fry-a chu kum 44 mi chauh niin, August 24, 1882 khan a lei thuam dahin Ropuinaah a lo kaisang ta a, Park Hall, Polmont, Stirlingshire, Scotland-ah phum a ni. Kumthar ni tak, 1884 khan ‘The Salvation Army Bandmaster Hmasaber’ thlanlung hi zah taka phun leh tlangzarh a ni a, chu lungphun ah chuan ama thuziak ngei hetiang hian ker a ni.
Hmanlai thilte chu an her liam a,
Tin, tawrhna pawh a tawp ta,
A tawpah chuan in ka thleng ta!
Nun tawp lovin ka nung!
Mizote hian “Phaizawl Lily Parmawi” hla hi Mizo Zaipawl te atangin ‘Isua thianah ka chhar ta’ tiin kan hmelhriat tan a, 1963-64 bawr khan an lo sa tawh a ni. Mizo tawnga lettu hi Pu R Vanlalzawma (1942-1995), Kulikawn a ni a, Ira D Sankey Hlabu siam (No.58-na) James Ramsey Murray (1841-1905) hla thluk hmang 6/8 beat a siam atanga lak a ni a, a thluk leh tempo a danglam hret a ni.
Kum 1990 the Salvation Army International Congress - London-a zaia rawngbawlna neia kal Mizo Salvationist Zaipawl te khan the Salvation Army Zaipawl pakhatin ‘Phaizawl Lily Parmawi’ an rawn sak, ‘Salvationist’ thluk – kal sawt euh euh mai an ngaihthlak chu an duh tlang hle mai a, staff note sheet chu hawnin, Mizo tawnga lehlin lo awmsa hmang chuan an sa ve ta a, record mumal a awmloh avangin an zai erawh ngaihthlak tur a awm ta lo. Tun hnu lamah Central South Division Songster te’n ‘Phaizawl Lily Parmawi’ thiam taka an sak chu YouTube-a an dah ngaihthlak tur a awm thung.
Nula leh Tlangval emaw, nupa emaw kara hmangaihna aia thuk zawkin Pathian nena inhmangaihna leh tudang ngailova lendunna hi a awmthei a ni tih, he hla ‘Phaizawl Lily Parmawi’ hian a tarchhuak mawi ngei e.
Isua thianah ka chhar ta, ka tan engkim a ni,
Ka thlarau tan sang sawm zingah a tha ber;
Phaizawl Lily parmawina Amahah chauh ka hmu,
Min silfaina leh min siam that famkimna.
Lungngaiha min thlamuantu, buainaa ka rinchhan,
Buaina zawng Amah bel turin min ti.
Phaizawl Lily Parmawi a ni, Varparh Arsi eng nen,
Ka thlarau tan sang sawm zingah a tha ber.
Ka mangan lungngaihna zawng la bovin a phur ta,
Thlemnaah Amah ka kulhpui nghet a ni;
A tan engkim kalsanin, thinlung milem biak te,
Ka tikehin tunah Aman min vawng ta.
Khawvel in min phat mahse, Setanan min thlem in,
Isua zarah ka tum ka la thleng ang.
Aman hetah min phat in, min kalsan hek lovang,
Amah chu ringa a duhzawng ka tih chuan;
Meibang hual vela awmin, hlauh tur a awm tawh lo,
A ‘mana’ chuan ka thlarau riltam a chawm.
Ropuina khumtir hun chuan, A hmelmawi ka hmu ang,
