🎀 𝒯𝓊𝒾𝒸𝒽𝒽𝓊𝓃𝒸𝒽𝒽𝓊𝒶𝒽𝒶 𝐻𝓂𝑒𝒾𝒸𝒽𝒽𝒾𝒶 🎀

Tuichhunchhuah pana kawtthler reh duk mai a zawh lai chu chhun nisat vanglai tak mai, thli thaw ve chhun pawh a lum hulh hulh lai a ni a. A ke pen tin mai chu a ritin a hahthlak em em mai a. A tui bel, hluma siam a chawi lai ai mahin a rilru hahna chuan a uai rit zawk si a. Mahni inthiamlohna, zahna leh mi hmuhsit endawng ... hengte hian a nghawngah zemin, mi hmai zawn pawh en ngam lovin, hnuailam bih ngur chungin a kal dem dem a. Khawih thianglo, biak thianglo leh hmangaih phu thlawt lo a khawtlangin an ngaih a ni si a.

Engtak ngaihtuah ang maw? ‘A pawi lo. Min mamawh loh ang bawkin ka mamawh bik lo che u’. ‘In duh ang angin min ngai rawh u. Ka tan hian thil tha engmah in ti bik chai lo’, ti te pawhin a in ngaihtuah a ni thei. A in hriat ai maha nasa zawkin a thlarau a kehchhe tawh a ni thei. A chhungril chu, ‘Min hmangaih ve rawh u. Khawngaihin ka lam lo hawi ula, min be ve hram teh u!’, ti te pawhin a rum mah na.

A enga pawh chu lo ngaihtuah se la, tuichhunchhuah kianga mi pakhat lo thu in a lo biak tak thutah chuan a ip chawih a. ‘In tur mi pe rawh’, tiin a lo dil si. Israel miin a ni Samari hmeichhia a rawn be ta mai chu mak a ti kher mai, a awmdan ah pawh a lang chhuak hial a ni. Chi leh chi inthliarna nasa tak karah Israel mi leh Samari mi mawihnai taka inbiak theihah pawh ngaih va ni suh. ‘Nang Israel mi i ni a, kei lah Samari hmeichhia, engtiziaa tui in tur mi dil nge i nih le?’, a ti hial a ni.

A chhungrilah zawhna lian tak a lo lut nghal a, ‘Mi hmuh ka duh loh avangin tun ang hun hi ka chuh tih i hre lo em ni? Mipa in hmeichhia heng ang hmun ual au taka biak hi thil tih awm a ni lo tih pawh i hre lo emaw ni?’ Chu pa in a chhanna chuan a tibuai hle mai. “Pathian thilpek leh i hnena intur diltu hi hria la chu, nangin a hnenah i dil zawk tur a ni a, tin a ni’n tui nung a pe tawh tur che a ni”. Hmeichhia chuan, “Eng thu nge i sawi tak? Tuichhunchhuah atanga khaina tur engmah i nei si lova, khawi ata nge tui nung chu i hmuh?” a ti he haw a. “Tupawh he tui in apiang an tuihal leh ang; tupawh an hnena ka pek tur tui in apiang erawh chu kumkhuain an tuihal lovang”, tih a sawi laia a mitmeng leh aw ka chhuak ngainatawm takte chuan chu hmeichhia chu a chhuntlang a ni ber mai.

Beiseina sang tak nen, “Ka pu, chu tui chu mi pe rawh, ka tui hal loh nan leh heng thleng thlenga tui chawi tura ka kal loh nan”. A rilru in ...’mite melh hrek hrek tuar tawh lova, in lama thlamuang taka ka tawmim theih nan’. Chutah a rin loh tak zawhnain a rawn phet leh ta, “I pasal va ko la hetah lo haw leh ang che”. Hmui pet sawi leh khur deuh hlat hlat chungin, “Pasal ka nei hlei nem”, an ti hram a.

A beiseina rinhlelhnain a hliahkhuh tawh chu, mak tihna leh zahnain a rawn thlak leh zo ta. A chhungril nun a rawn ker sak tlat si a. A ngaihtuahna a buai ta hle mai. Hemi hi tunge ni? Engtinnge ka nun dan te lam a hriat? An titi thlak dan a ngaihtuah a ngai, a nungchang sawi zawm zel chu a duh bik lo. Sakhuana lam sawipui a tum ngial pawhin, chu mi chuan a chungchang thu ah bawk a kir pui leh thin. Puithuna lam ngaihven lovin a mimal nun a ngai pawimawh zawk tih a hrethiam ta mai a. Chu pa ang tluka pathianna midangah reng a la hmu ngai lo. Israel leh Samari miten an nghahfak ‘Messia’ a ngaihtuah chhuah tir ta hial a.

A beiseina chu sawi chhuak in,”Messia a lo kal dawn tih ka hria, a ni chu a lo kal hunah engkim min la hrilh ang”, a han ti ngawt a. A mit-ah tak, a thlarau lam entlang khawpa mawia a melh chuan, a khur zawih zawih a. “Keimah a betu che hi amah chu ka ni asin”, a han ti zui lehnghal a. Tunah chuan a hrethiam ta. Hemi hi mi naran mai a ni lo, zirtirtu emaw zawlnei emaw satliah mai a ni lo. He mi hi Krista, Pathian Fapa Thianghlim a ni. Lalpa hmangaihna hmaa a han din meuh chuan a zahna leh a inthiamlohna zawng zawng chuan a kiansan ta duak mai.

A tuibel a kal san a, khuaah a kal ta a. Mite hmuh hlau tak leh inthlahrung taka a lo zawh tawh kawngah ngei chuan phur taka mituemaw tal hmuh beiseiin a kal vah vah mai a. Mite sawi nawmnah reng a hlau ta lo. Tunah chuan hna thar a nei tawh miau a; Isua Krista, Messia thu kengtu a ni tawh tlat a lawm. A kimki tawh lo, huai taka au in, “Lo kal ula, en teh u, ka thil tih apiang min hrilh zeltu mi pakhat a awm a, Krista a ni thei awm em!” A rin loh tak pawh a ni mahna, mite chu an lo chhuak a. Mi tam tak a ni lo kal, Bible min hrilh danin he hmeichhe khawlo tak hriatpuina avang hian Samari khuaa mi tam takin Isua chhandamna chanchintha an lo dawn phah ta a ni.

He hmeichhia hi beiseina leh damchhan reng nei lo a ni. Amaherawhchu Isuan a nunah thil danglam tak a rawn thlen tlat. Thil awm lo ber kha Samari khua a danglamna thlen turin a thu kengtu ah Isuan a thlang tlat a ni. Chumi chu amah mamawh bertu a ni miau si a.

The Chosen season one ah hian 'I am He' tiin Isua leh Samari hmeichhia  Jakob-a tuichhunchhuaha an inbiakna chungchang hi alo awm hlauh mai a, en ve ngei rawh.

ᑎᑌᑎᗪᗩᑎGᒪᗩᗰᑎᗩ’ᑎ ᗩ ᒪᗩ TᒪᗩI ᒪO ᐯE

Isua hmun pakhata a thut laiin Uire lai man - hmeichhe pakhat hi mipuiin an rawn um dul dul a. Thlaphang takin Isua ke bulah a rawn tlu rup mai a. Israelte danah denhlum ngei tur a nih avangin lung an hum far a. Isuan ‘Sual nei lovin deng rawh se’ a tih chuan a mal mal in an tawlhbo zo ta a. 

 

Chu hmeichhia Mari hnenah chuan ‘Keipawhin thiamloh ka chantir lo a che, kal la tisual leh tawh suh’ a ti a. A nuna danglamna thleng turin a la tlai lo. A laizawn Marthi leh a nuta Lazara pawh Isua ke bulah hruaiin, ‘A hmangaihte’ tia sawi hial an lo ni ta. A rawngbawlnaah hlim taka lo mikhualin an tawiawm thin. Mari hi hriak rimtui to tak Isua kea leihbua a, a sama hru tu ngei kha niin an sawi. 

 

Isua khawvela hringmi a chan lai khan Lazara-te unau leh thian thate nen hlim taka lengza in rawng an bawl ho thin a. Lazara-te unau hi Isuan a hmangaih in a ngaina em em a ni. Khawdangah te Pathian ram thu hrila a kal hlanin Lazara thih ngamin a na ta tlat mai. Awm ni sela zawng Tidamtu zarah a tuar hauh lovang le. Nimahsela a damloh thu a hriat pawhin Isua a la khawtlai tlat mai, engvangnge ni ang le? 

 

Ni li lai thlana an zalh tawh hnuin Isua a lo kal dawn tih thawm Marthi in a hriat chuan, a lo hmuak a. A hmaah a lungngaihna a leihbua a ni. ‘Khawiahnge in zalh?”, tiin Isuan a zawt a. A damloh lai kha chuan lo thleng se a tidam ngei ang tih Mari leh Marthi hian an ring a. Nimahsela, tunah zawng a tlai zo tawh, ni li lai a liam tawh a, a ruang pawh a rimchhe tawh ngei ang. 

 

“I rin chuan Pathian ropuizia I hmu ang, ka ti lo che em ni?”, Isuan a ti mauh mai. Thlan lung an lum sawn a, ‘Lazar lo chhuak rawh!’, Isuan a han tih chuan thlan puana tuam chungin Lazara chu a lo chhuak ta. A va ropui em! 

 

He leia kan cham chhungin kan nunah manganna a thleng thin. Thenkhat damdawi hmansual vangin dai kil karah kan tawm bo a, chhungkua kehchhiatna avangin lanute'n eizawnna atan zanthim lam kan chuh a, rilru hah luatah zuapan kawng ngil kan chhuih kawi mek bawk a, fate seilenna tur ngaihtuahin chhungpuinu tul taka kan parvul a ngai nen. Hetiang tak hian awm mah ila chhungrilah chuan Mari leh Marthi ang khan rumin kan van ruai a ni. 

 

Manganna leh harsatna ten min tuam vel lai hian, chhantu ngaiin Lalpa kan au thin. Min tanpui turin lo thawk thuai se kan duh laiin… a reh vung vung hian i hre ve thin em? Nimahsela, unau beidawng mai suh, Isua a ngai reng fo, lung lian tak do tu che, I hmaa khaw dur kha vai kiangin I hmingin a ko dawn che a ni. 

 

Kan nuna nundanglamna rawn thlenna turin Isua a tlai ve ngai lo, remruatpuitu kan ni lo hi A ropuina famkim kan channa hnar a lo ni zawk e.

 

[Inspired by 'Four Days late' Kum 2004-a Mizote zinga a lar vang lai khan Skit puitu atana siam a ni]

 

 

Quavadis?

Chinese Emperor ropui tak, the Great Wall of China sa tu Qin Shi Huang Di kha, huaisen lamah a hmingthang hle a, a thatlai hunah khan hlauh a nei ngai lo. Nimahsela, a hun tawp dawnah hlauhna in a khat tlat mai. A thih hnu-ah khawnge a kal dawn a hre lo tlat a ni.Khawvel mifingte a rawn kual a, tumahin an hrilh thei si lo. A mangang chuan a thlan veng turin, hluma siam milim sipai rual sang tam tak (8000) a din a, chung milimte chuan a thih hnuah an veng thei in a ring a ni. 

 

 

Keini hian a thih hnua a kalna tur chu kan hrilh thei angem aw? Nang unau duhtak I thih hnuah khawnge I kal dawn? Kristian te'n tihduhdahna nasa tak an tuar a, Petera’n a sa himna tur zawnga Jerusalem a chhuahsan lai khan, Isua aw a hre ta.. – ‘Peter, khawnge I kal dawn? Ka mite tan hian ka thih nawn leh a ngai dawn em ni?’. Petera chuan, a kawng zawh lai a diklo tih hria in a kir leh a, a chhandamtu tuarna tawmpuiin a nunna a lo hlan ve ta a ni. 

 

Keini pawh hian kan thih hun tur kan hre hauh lo, mahse kan la thi ve ngei dawn. Hun tha kan neih chhung hian thil tha ni awm taka lang leh thil thalo tinreng, kan nun khawih buai thei te hmang hian kan nun kan titawi mai dawn em ni? Duhthlan tur pahnih kan nei [Matthaia 7:13-14] Eng zawk nge kan thlan dawn le? 

 

Kan kawngzawh lai hi bihchiang ila, HREMHMUN panna a lo nih hlauh chuan, a tlai hma ngei hian I kir leh ang u. [Luka 13:23-27] Kan tlantu Isua Krista'n, ‘In tan hmun siamin ka kal dawn a, tin, ka lo kir leh anga, ka hnenah ka hruai ang che u’, tiin min tiam. A kawng min siamsak hi kan zawh ve mai dawn lawm ni. A zirtirna te zawma kan nun kan siamthat phawt chuan a hnenah kan kal ve ngei ang.

 

Krista chu NIMIN-A thia, VAWIIN-A tholeh a, NAKTUK-A lokal tur anga ngaiin kan nun I hmang tha ang u.

Nute Ni Lehkhathawn

Ka nu duhtak,

Vawin ni I pual bik liau liaua hun kan hmanna ni a lo herchhuah leh hian, kum tina lo tih tawh zawk tur mah nise, sap hovin ‘better late than never’ an tih iangin, ‘Nang leh kei kan lo intawn avanga lawmna chhiarsenloh ka nuna lo thlengte avangin, ka lawm a ni’ tih hi mi lo hriatsak turin ka ngen hmasa duh che a.

Pathian chhungte ah Pathian Pathian zia a lo lang thin ang hian, kan chhungkaw tan pawh leia kan hmuhtheih Pathiannu I ni takzet a, I hmangaihna in min awp khawm thin a ni.

Siamtu min rel anga ka lo parchhuah ve theihna turin, tuisik ka nih lai ata tawh hmangaih takin mi lo pai a, thanlenna atana ka mamawh tinrengte ka dawn theih nan mi lamkhawm sak thin.

Lei nun ka chhiar tirh ata, ka ke pen tin min hriatsak a. Nghakhlel taka ka seih hun I chan chhuah ni te, ‘nu’ tia ka aw-ka I hriat hmasakber ni te leh chhuang taka ka tih ve theih chhun chhun ka tih tan ni a chimlo taka mi thlir laite kha I theihnghilh phal mawlh si lo.

Dammawh hritlan nikhua ah lah, ka na-lai ka hriattir theih hma atang tawhin, duat taka min chul in, ka tawrh ai tuar theitu nih I chakzia I lantir thin a, I kut lum ther ther leh anka nem takte khan damdawi aiin an thawkchak zawk asin.

Lalpa laka I rochan hlu ka ni tih I hriatreng avangin kawng laka ka bo lohna turin min veng reng a; a pung zawng zawng nena a petu hnen thlen leh ngei I tum tlat thin. Nangmah mai chuan min humhim zo lo tih hriaa dilna tinreng nen ka tana I tawngtaina zozaite khan ka nunah malsawmna tam tak a thlen a, ka chakna hnar a ni.

Mite rahbeh-a ka awmloh nan hmsawnna kailawn ah rahbi min tuk sak thin a, mite chunga ka len mailoh nan thu tha tinrenga min fuihin nun tlawm min zirtir thin. Ka nu, tun hun ka thlen theihna atana I thawhrimna leh I mi enkawlna zawng zawngte avangin ka lawm e.

Phutlet nei lo Hmangaihna-a min chawiliantu ka nu duhtak, ka nuna min thlen tawhte zawng zawng kha, ka damchhung zawngin rul let dawn ta che ila, engtik-ah mah ka rul seng theilo ang. Ka tana I inpekna leh I mi hmangaihna te hian ka damchhung zawngin min hualhim ang a, leia I rohlu ka ni ang hian, van-ah pawh I lallukhum timawitu ka nih ngei theihnan Lalpan min tanpui rawh se.

Ka nu ‘KA HMANGAIH CHE’.

Full Moon

Sun setting in the horizon, Brings hope to my dearest heart; Came a promise yet to be fulfilled: Of the wonderful scene of love. Love that I have from infancy; That will stick with me to the grave; Delight springs in my heart, Whenever I see him. Cherished I have for every moment, Of being in union with him. 

 

 

 

 

 

 

 

Day before yesterday, as I was walking home, it was just about to turn dark but on top of the mountain, the moon was just turning up and gazed at me with powerful beam. Around me I saw the freshness of the dying day, which will be very gloomy if not for the full moon sprouting up. My heart leap at the thought of a full moon and it never ceased to brighten up my heart with its brilliant look and radiant smile. I am drunk with its soft and tender touch; hoping that its richness will feed me of the love that I am missing. 

 

I feel bare and transparent under its gaze. It has bared my soul since my childhood days and I always enjoyed its company whenever I have time to steal. Memories flash back of its amazing catwalk back in 2005 when we visit Arunachal Pradesh. It was then a tiny beam, but amidst the sparks of millions of twinkling stars was a thrilling sight leaving us all speechless. We just lay flat on the road and gazed and gazed, forgetting our hunger and tiredness. The sights enchant us and we forgot all our worries and pain. 

 

Then yesterday, due to thick cloud I was not able to see it loom out as I walk home in the evening.  

Chhawrpial eng no riai in, 

Kan sumtual a chhun eng e. 

Rauthla in ka hmu, I sakhmel

- Ka nun ram tieng tu. 

Thlir ve che maw 

– Arkaiden Chhawrthlapui.

ZOAR

Thalai rawngbawlna atanga ka belhchian zingah chuan kan chanchinbu ZOAR hi ka ngaihhlut pawl tak a ni awm e. Thu leh hla ti mi ni mah suh ila engemawti takin min hip tlat mai a, a enkawltute zinga ka tel ve hnu phei chuan ka thlahthlam phal ta mang lo a ni. Hunawl tha chul nelna hun ka neih mangloh hnu pawh hian ka ngaihtuahna lamah chuan hmun zau tak a luah zawm ta zel a, a tlakhniam mawlh ka hlau thin a ni.

Kum 17 chhung zet chu ZOAR hian mi chi hrang hrang lo phuar khawmin, mawi leh bihchian tlaka a awm theihna turin finna leh thiamna chitinreng a lo hui lut tawh a. Thalai te thatna, chakna leh thiamna fawmkhawmin, mawi takin par a lo chhuang thin a ni. Hun leh ni a danglam ang zela khawvel thiamna lo thangduang ah pawh hnufum hauh lovin hmasawnna kailawn, a hun tawn mil zelin, chawl hauh lovin a lo zawh thin a ni.

February ni 2 zan khan remchang tak mai in SAY Meeting neihzan nen a inhamtawng hlauh mai a, phur takin Anniversary Cake zai meuhin ZOAR kum 17 tlin champha lawmna neih a ni. Kan cake zai laite en pahin kan chanchinbu chanchin I han thlir kir lawk teh ang.

Kum 1992 February ni 2 khan ZOAR issue hmasaber chu chhuah tan a ni a, hemi ni Thianghlimna inkhawmah hian C.O. Captain Thangkhuma’n a tlangzarh. Chanchinbu hming tur hi mi hran hran phuah an dahkhawm atangin Cadet T.Lalchhanhimi chutih laia Field Training neia awm mek chuan a pawt a, Pu Saitluanga (tunah chuan Major rank kai tawhin Central Division-ah DYS a ni mek), chutih laia SAY Secretary in a thawh chu pawh fuhah a tang a, ZOAR tih hming a pu ta a ni.

A hming hi Genesis bung 19-a Lota te chhungkua Sodom atanga hruaichhuah an nih chungchang thu a, ZOAR tlang an himna hmun kan hmuh behchhana phuah a ni.

Hetih laia YC Leader chu Pu C.Zalianzawna a ni a, Editorial Board member atana ruat hmasakber-te chu Editor – Tv.V.L.Malsawma Sailo, Jt.Editor - Tv.Lalhmangaihfawnvela, News Editor - Tv.Lalhmingliana (Major rank ni in IET ah Financial Secretary a ni mek), Cir. Manager - Tv.Lalruatkima, Patron - Pu Lalhmingdika te an ni. Issue hmasaber hi phek 2 a chhuah a ni a, issue pahnihna atang chuan rokhawlhna hran a awmloh chuan phek 4 a tihchhuah thin a ni.

Hetih hunlaia Young Crusaders memberte zingah hian Nl. Krosthangi tihloh chu khawl chhu thiam an awmlo a, tun thlenga Patron Pu Lalhmingdika te inah bul tanin, a nupui Pi H.Thanhrangi HLS- in a chhut sak a, hun engemawchen chu an nupa hian an pur reng a ni; a hnulam-ah kan Editor hmasaber Tv VL Malsawma Sailo chuan a kut zungchal pahnih hmangin a chhut chhawk ve ta a, 1995 ah te phei chuan a ri ve zat zat tawh a ni.

Engtik kum chiahah nge typewriter kan neih hi a hriat theih mai lo a, cyclostyle hi chu Chaltlang YMA chanchinbu Chalkhawpui ah her man chawiin engemawchen chu hertir a ni thin. Cyclostyle te pawh kan intodelh ve ta zel a, pahnih lai kan hmang chhe hman a ni. Typewriter hman lai atang tawh khan kan chanchinbu hawrawp rem hi a nalh em em a, a bikin kan editor hlun - Pu Mala hian a hawrawp awm zat chhut chhuak thlapin, a sir ruallo awm miahlo turin uluk takin a chhu kauh kauh thin a. Midangte pawhin rem dik hram an tum ta zel a, khawl ha remchawp ang maiin a inrual nalh thin a ni. A chhut hi a uluk em avang hian a herchhuah hi a tlai nge nge thin a, thahnemngai takin a hertu lam an meng tang tang a, khuang hmasa pawh an hre hman fo a ni.

A hertute zingah chuan Tv. Rk-a, Tv Biakte-a leh Tv. Rema te an rim thei hle a, ngawi rengin an lo nghak char char a, an inbe tamlo tlang hle a ni. A chang chuan Pu Mala te khum sira an thutkhawm raih pawhin a nupui fanuate chu khum-ah tui takin an lo mu barh barh thei a ni. Anni hi Tv. Ruattea leh Tv. Zova te’n an thlachhang an rawn dawl leh a, rim taka inpe kan nei thin hian he chanchinbu hi a la tinung ta reng a ni.

Kum 2003 atang khan a remchan ang angin mimal Computer hman tangkai tan a ni a, computer-a chhutchhuah chu Dot Matrix printer-ah print chhuak in cyclostyle-a her a ni thin a, hna pawh a zai sawt hle. Tichuan, kum 2003 kumtawp-ah SAY memberte’n Sound System Project ngawrh taka kan tuak azar-ah Computer multimedia set leina tur kan nei thei ta hlauh mai a, phur takin hemi kumtawp hian Dot-matrix printer nen lei a ni. Khawvel thiamna changkang zelah cyclostyle pawh chu hluihlawnin computerized Offset Press-ah kan chhuttir chhawm ve thei ta a, tun thlengin Efatha Offset Press, Dawrkawn ah chhuttir a ni.

Kum 2006 khan Division chhunga Newsletter tha thlanna neih thin-ah - a vawikhatna atan tel ve in kum 2005 issue chu thehluh a ni. Kum 2006 SAY Rally-ah Lawmman Pahnihna hlan kan ni a, a kum-leh 2006 Issue pawh kan thehlut veleh a, kum 2007 khan Central Division huapa Newsletter tha thlanna ah Lawmman Pakhatna kan dawng ve a ni.

Kum 2006 khan mellung thar kai a ni leh ta a, March ni 6 zan SAY Meeting ah http://zoarweekly.com website tlangzarhna Captain Lalhmingliana Financial Secretary, THQ (News Editor hmasaber) in a nei a, Corps chhung leh post office kaltlang-a kan thawnchhuah bakah, khawvel puma chhiar theih turin chhawpchhuah a ni tan ta.

ZOAR chhuah anih atanga chhut in, kumin thleng hian mi hrang hrang mi-42 lai in an tha an lo thawh tawh a, official-a ruat ni kherlo heng mite bakah thahnemngai taka lo dawmkangtu engemawzat an awm; rim taka hertu leh chanchin lakhawmtu te, chawlhni zingtin khel lova semtu ZOAR Agent te bakah, daka thawnchhuah anih theihna tura sponsor-tu te leh website sponsor-tu ban pawimawh tak tak an awm bawk a ni. Chumi piahah chuan Chaltlang Corps SAY te fa-chuam ZOAR Weekly min hlutpuia, ngaihventu leh phur taka min lo chhiarsaktu te pawimawhna hi a nep bik hauhlo a ni.

Tablet of my Heart

As we journey our life's way, each of us encountered various event which makes our mood swing low at one time and swing up another time. Here is the tablet of my heart to keep my treasures of LIFE that motion me swing up and down along life's narrow way!