Thalai rawngbawlna atanga ka belhchian zingah chuan kan chanchinbu ZOAR hi ka ngaihhlut pawl tak a ni awm e. Thu leh hla ti mi ni mah suh ila engemawti takin min hip tlat mai a, a enkawltute zinga ka tel ve hnu phei chuan ka thlahthlam phal ta mang lo a ni. Hunawl tha chul nelna hun ka neih mangloh hnu pawh hian ka ngaihtuahna lamah chuan hmun zau tak a luah zawm ta zel a, a tlakhniam mawlh ka hlau thin a ni.
Kum 17 chhung zet chu ZOAR hian mi chi hrang hrang lo phuar khawmin, mawi leh bihchian tlaka a awm theihna turin finna leh thiamna chitinreng a lo hui lut tawh a. Thalai te thatna, chakna leh thiamna fawmkhawmin, mawi takin par a lo chhuang thin a ni. Hun leh ni a danglam ang zela khawvel thiamna lo thangduang ah pawh hnufum hauh lovin hmasawnna kailawn, a hun tawn mil zelin, chawl hauh lovin a lo zawh thin a ni.
February ni 2 zan khan remchang tak mai in SAY Meeting neihzan nen a inhamtawng hlauh mai a, phur takin Anniversary Cake zai meuhin ZOAR kum 17 tlin champha lawmna neih a ni. Kan cake zai laite en pahin kan chanchinbu chanchin I han thlir kir lawk teh ang.
Kum 1992 February ni 2 khan ZOAR issue hmasaber chu chhuah tan a ni a, hemi ni Thianghlimna inkhawmah hian C.O. Captain Thangkhuma’n a tlangzarh. Chanchinbu hming tur hi mi hran hran phuah an dahkhawm atangin Cadet T.Lalchhanhimi chutih laia Field Training neia awm mek chuan a pawt a, Pu Saitluanga (tunah chuan Major rank kai tawhin Central Division-ah DYS a ni mek), chutih laia SAY Secretary in a thawh chu pawh fuhah a tang a, ZOAR tih hming a pu ta a ni.
A hming hi Genesis bung 19-a Lota te chhungkua Sodom atanga hruaichhuah an nih chungchang thu a, ZOAR tlang an himna hmun kan hmuh behchhana phuah a ni.
Hetih laia YC Leader chu Pu C.Zalianzawna a ni a, Editorial Board member atana ruat hmasakber-te chu Editor – Tv.V.L.Malsawma Sailo, Jt.Editor - Tv.Lalhmangaihfawnvela, News Editor - Tv.Lalhmingliana (Major rank ni in IET ah Financial Secretary a ni mek), Cir. Manager - Tv.Lalruatkima, Patron - Pu Lalhmingdika te an ni. Issue hmasaber hi phek 2 a chhuah a ni a, issue pahnihna atang chuan rokhawlhna hran a awmloh chuan phek 4 a tihchhuah thin a ni.
Hetih hunlaia Young Crusaders memberte zingah hian Nl. Krosthangi tihloh chu khawl chhu thiam an awmlo a, tun thlenga Patron Pu Lalhmingdika te inah bul tanin, a nupui Pi H.Thanhrangi HLS- in a chhut sak a, hun engemawchen chu an nupa hian an pur reng a ni; a hnulam-ah kan Editor hmasaber Tv VL Malsawma Sailo chuan a kut zungchal pahnih hmangin a chhut chhawk ve ta a, 1995 ah te phei chuan a ri ve zat zat tawh a ni.
Engtik kum chiahah nge typewriter kan neih hi a hriat theih mai lo a, cyclostyle hi chu Chaltlang YMA chanchinbu Chalkhawpui ah her man chawiin engemawchen chu hertir a ni thin. Cyclostyle te pawh kan intodelh ve ta zel a, pahnih lai kan hmang chhe hman a ni. Typewriter hman lai atang tawh khan kan chanchinbu hawrawp rem hi a nalh em em a, a bikin kan editor hlun - Pu Mala hian a hawrawp awm zat chhut chhuak thlapin, a sir ruallo awm miahlo turin uluk takin a chhu kauh kauh thin a. Midangte pawhin rem dik hram an tum ta zel a, khawl ha remchawp ang maiin a inrual nalh thin a ni. A chhut hi a uluk em avang hian a herchhuah hi a tlai nge nge thin a, thahnemngai takin a hertu lam an meng tang tang a, khuang hmasa pawh an hre hman fo a ni.
A hertute zingah chuan Tv. Rk-a, Tv Biakte-a leh Tv. Rema te an rim thei hle a, ngawi rengin an lo nghak char char a, an inbe tamlo tlang hle a ni. A chang chuan Pu Mala te khum sira an thutkhawm raih pawhin a nupui fanuate chu khum-ah tui takin an lo mu barh barh thei a ni. Anni hi Tv. Ruattea leh Tv. Zova te’n an thlachhang an rawn dawl leh a, rim taka inpe kan nei thin hian he chanchinbu hi a la tinung ta reng a ni.
Kum 2003 atang khan a remchan ang angin mimal Computer hman tangkai tan a ni a, computer-a chhutchhuah chu Dot Matrix printer-ah print chhuak in cyclostyle-a her a ni thin a, hna pawh a zai sawt hle. Tichuan, kum 2003 kumtawp-ah SAY memberte’n Sound System Project ngawrh taka kan tuak azar-ah Computer multimedia set leina tur kan nei thei ta hlauh mai a, phur takin hemi kumtawp hian Dot-matrix printer nen lei a ni. Khawvel thiamna changkang zelah cyclostyle pawh chu hluihlawnin computerized Offset Press-ah kan chhuttir chhawm ve thei ta a, tun thlengin Efatha Offset Press, Dawrkawn ah chhuttir a ni.
Kum 2006 khan Division chhunga Newsletter tha thlanna neih thin-ah - a vawikhatna atan tel ve in kum 2005 issue chu thehluh a ni. Kum 2006 SAY Rally-ah Lawmman Pahnihna hlan kan ni a, a kum-leh 2006 Issue pawh kan thehlut veleh a, kum 2007 khan Central Division huapa Newsletter tha thlanna ah Lawmman Pakhatna kan dawng ve a ni.
Kum 2006 khan mellung thar kai a ni leh ta a, March ni 6 zan SAY Meeting ah http://zoarweekly.com website tlangzarhna Captain Lalhmingliana Financial Secretary, THQ (News Editor hmasaber) in a nei a, Corps chhung leh post office kaltlang-a kan thawnchhuah bakah, khawvel puma chhiar theih turin chhawpchhuah a ni tan ta.
ZOAR chhuah anih atanga chhut in, kumin thleng hian mi hrang hrang mi-42 lai in an tha an lo thawh tawh a, official-a ruat ni kherlo heng mite bakah thahnemngai taka lo dawmkangtu engemawzat an awm; rim taka hertu leh chanchin lakhawmtu te, chawlhni zingtin khel lova semtu ZOAR Agent te bakah, daka thawnchhuah anih theihna tura sponsor-tu te leh website sponsor-tu ban pawimawh tak tak an awm bawk a ni. Chumi piahah chuan Chaltlang Corps SAY te fa-chuam ZOAR Weekly min hlutpuia, ngaihventu leh phur taka min lo chhiarsaktu te pawimawhna hi a nep bik hauhlo a ni.
