SAY Sunday 25 June, 2017

Rinloh takin kan Corps Salvation Army Youth te'n, SAY Sunday hunbikah SAY member nih hlawkpuina sawi turin min sawm ve teh mial a, ka hriselna lamah ka induhtawkloh lai taka a ni nachungin tihhlawhtlin ngei ka duh si a, ka han sawi ve ta a. Thinlai muhnu tam tak kaihharha a awm takah chuan, ka thinlung pheka han nemkai leh thain ka hre ta a ni.

SAY member nih ka hlawkpuina hmasaber chu suahdur leh bawngthuthlawh ka hmang thiam. Thalai ka tel tirh hian Brick thiarin kan inhlawh a, kan in intlar put a, kan inhlan chhawng zel a, building saklaia thawk kan ni a, step-ah kan awm a, vanduaithlak takin chunglam atanga Brick bung lo tla chuan ka kutzungpui a rawn tlak a. Exam tura ka inbuatsaihlai a ni a, ka exam-naah chuan pen ka hum tang tang thei. Balu leh Rawra thiar tur kan hmuh kha chuan kan lawm thei hle, mipate kha a pu hnem thei zawk annih avangin, hmeichhiate'n kan lo rut mai thin a, Suahdur leh Bawngtuthlawh kan hmang thiam ta em em a ni. Bankhur laih leh tuizem laih, lei paih tihvel atangte khan Suahdur leh Bawngtuthlawh hmanthiamna skill a in develop tha lehzual khawp mai. Boulder leh Cubit lung engemawzat kan thiar a, vengchhunga insate kha chuan min duhsak thei hle.

Ka zaithiam ve ta. Tunhmaa kan thalaite khan zaithiamloh lamah hming an lo chher tlat mai a, keini generation khan Chaltlang Corps mite'n min hriatna chu her danglamin Songster zaithiam tia lar hat khawpin kan thlak ta! Kan zir nasa em alawm le, a sak lah kan sa hnem. Chutachin chu mite hian Chaltlang Corps thalaite chu zaithiam turah an ngai vek tawh a, kei ngei pawh zaithiam ka lo ni ve ta!

Staff Notation enin Tawtawrawt ka ham thiam. Corps dangte'n hneh taka Band rawngbawlna an kalpui laiin kan hnufum tlat mai. 70's leh 80's chhoa kan rual ute chuan Tonic Solfa hmangin instrument beitham tak nen Easter Sunday tifamkimtu atan 'A tho ta!' anlo ti ve thin a. Amaherawhchu kum engemawzat Corps dangte'n min hmui azarah Easter thawm vengchhungah a awm hram hram. 90's uaithla lamah Salvation Army Youth tumruhnain kan tlailam umpawng par ta a le. Australia atang ngatin Lukhum Var nalh tak kan dawng a, hmeichhiate phei chu nalh tak kan ni, kan rimawi ham ai mahin kan inthuamna hmang khan mi kan hip zawk ta hial ang a? Band-a hmeichhia an tamna ber Corps kan ni hial maithei. Territorial Staff Band-ah pawh hmeichhia Pali lai kan tel tawh a ni.

Ziakmi ka lo ni ta. Salvation Army Youth Chaltlang Corps te hian 1992 atang khan ZOAR chanchinbu kan nei a, mithahnemngaite zarah mei mit lova kalpui a ni. Active vet vet taka kum 17 chhung thalaia inhman a, chumi kum 10 chhung Office Bearer ni a, Section Incharge kum 4 lo nih ve takah chuan lohtheihloha chanchinbu lama hmalak ngaih chang a lo awm. Editorial te ka han ziak ve chawm mai a, article leh lead item tur han puah te a ngai ve ta. Ngaihtuahnain a daihloh changin lehlin hmangte'n ziak lama rawngbawlna awihnun a lo ngai a, ka hriatloh hlanin ka lo ziak ve ta phoh phoh mai. Thiam inti lem lovin ziak lama rawngbawlna chu keimahah chawinunin a lo awm reng mai.

Lammi pawh ka lo ni reng. Thlalak hlui ka enletna atanga ka hmuhchhuah chu...Worship Dance-ah pawh ka lo tel ve reng ni-in! Kan choreographer #HmaaRenthlei a zeiin, mi kaihhruai a thiam bawk a, Brigade night velah chuan member induhthawh nen, ka lo lam ve zek zek a lo nih hi...

Kan theihnate a tlem a, tihsual hlau leh mi nuihzat chauh nih mai hlauh avanga kan up bo mai chuan, rinna leh beiseina bovin kan hun a liam ang. Che fuh theilo tak kan nih phei chuan, kimki in kan nun kan hmang reng mai dawn a ni. Amaherawhchu Pathian a rinna kan nghah erawh chuan, hnawl emaw tihnat emaw venthawn tur reng a awmlo. Pathian chuan englai pawha hmangaih leh ngaidam turin min tiam tlat asin. Kan theihnate haichhuakin, kan theihna leh thiamnate kan sawhngheh a pawimawh tak meuh meuh a ni. Sam ziaktu chuan, 'Aw Lalpa, Sipaihote Pathian, Aw JAA, nang anga mi chak tu nge awm? I rinawmna chu i velah a awm si a' (Sam 89:8) tiin a ziak.

Pathian a rinna kan nghah chuan hmalam hun atan lungkham tur a awmlo, hlim ni leh ngui ni kan tawng ngei ang. Amaherawhchu, kan Pathian hi thafamkim, a rinawmna tawp ve ngailo anih avangin, kan nun him takin a kutah a awm tih hriain, keimahni inrintawkna piaha Amaha-inrintawkna nen engpawh kan hmachhawn thei a lo ni.

Pate Ni

Mipate hi chi thlah tura khuanu duan anni ngei ang, amaherawhchu chhungkaw puipa ni tur chuan mi bik nih a ngai thung.

Naupangte’n PA an chawimawina NI bik hmang tura ruahmanna hi Spokane, Washington-ah a intan a. Kum 1909-a NUTE NI thuchah Sonora Smart Dodd-i’n a ngaihthlak atanga rawn inmun a ni. Sonora-i hi a nu in a thihsan hma avangin a pa William Jackson Smart-a’n a enkawl seilian a, atana a hlutzia hi a PA hriattir ngei a duh. Nu leh Pa nih fawmin huaisen leh inpumpek, hmangaih taka enkawlin a pa hian an unauza a chawilian a. A pa pian thla June chawiin PATE NI hmasaber hmanna atan June ni 19, 1910 chu a thlang ta a ni.

 

Kum 1935 khan PATE NI Silver Jubilee pualin lehkhabu buatsaih a ni. Chu lehkhabu te-takte ah chuan tihian a inziak, ‘He NI lo chhuahna hi kum 37 liamta a Washington tlang pakhat Big Bend an tih, huan pilril taka awmah khan a ni. March thla thli na tak thawt vuk vuk na kara lungngaihna namenlo lo thlengah chuan a ni.

Khawhar takin pa pakhat hi a indawm kun a, a velah chuan a fate’n tap chungin an bawr laih bawk a. Vur thli lo tlehin an tukverhte a khuh luk a, thlipui a inmun mek lai chuan, a fa tlum ber chu thawklehkhatah pawn lam panin a NU au chungin a tlanchhuak ta vut mai. Chu hraichawi awrawl chuan a chunnu, thihna kutin a chelh tawh chu a au ei(h) zo si lo!

Hmanhmawh takin a pa chuan naupang chu a thlazar hnuaia awm turin a umzui vat a, tichuan thanghnih lian zet chu William Jackson Smart-a chuan chun lovin, nu leh pa dinhmun chelhin a fate a lo awpkhawm ta a ni.

Senora Louise Smart-i, Mrs.John Bruce Dodd lo nita tan he thil thleng hi, PATE tana Ni bik siam tura a ngaihtuahna khalhtu pawimawh tak a ni. A pa hmangaihna leh inpekna te, a pasalin a fapa a hmangaihna a hmuh leh hriatte atang chuan PATE NI serh chu tihpuitlin ngei tumin a bei a, ram pum huapin hman a lo ni ta.’

Kum 1926 khan New York khawpuiah National Father’s Day Committee din a ni a, kum 1956-ah America rama Congress Joint Resolution in a pawm. Tichuan, kum 1972 khan US President Richard Nixon-a chuan June thlaa Chawlhni vawi thumna chu America ram pumah PATE NI bika serh turin a lo nemnghet a ni. Salvation Army te pawhin kan ni bikah dahin khel lovin kan lo hmang ve ta.

Pa neite tana pa an hlu tluk zetin pa neilote tan pawh pa an hlu. Zua tello-a chawilen ka ni a, Pa neilo chu ka ni hauhlo. Pa uapna tawnhriat ka nei tlem hle a, ka tawnchhun erawh ka thlamuanpui thung. Chuvangin ka tan PA a hlu bik riau in ka hre thin. Nu tana nu leh pa kawp chu thil namai a ni hauhlo ang. Ngai teh u, Pain min hmangaihna chu a va nasa em! ‘Pathian faahte’ min vuah tak hi; chutiang chu kan ni reng e. [I Johana 3:1] He thu hi a va hlu em!

Vawin Pate Ni ah hian Pathian lehkhabu Rom 8:12-17 thu hi lo thangmawi lehzual se a va tha em! “Abba! (Ka pa!)” tiin khawi hmunah pawh, enghunah pawh kan au thei a, kan thatna tura min thawhsak tur hian ‘super power’ ni mai lovin ‘Supreme Power’ neitu a la ni zui. Khawvel leh a chhunga awm zawng zawngte hi a kutphah chhungah kan awm asin!

Pa?

v ‘PA in a fate tana a tih theih hlu ber chu - a fate NU a hmangaih hi a ni”

v ‘Nu te ang bawkin PA tur renga piang an awmlo a, mipa te hi PA ah an lo thanglian zawk thin a, PA nih hi an thanlennaa hun pawimawh tak a ni’ - David M. Gottesman

v ‘A fa hrechiangtu chu PA fing a ni” – William Shakespeare

v ‘Ka pa kha engang mi nge a nih a pawimawh ber lo, a pawimawh zawk erawhchu engang mi niin nge ka hriatreng’ – Anne Sexton

v ‘Naupangte nunah PA uapna aia thlamuanpuiawm zawk awm theiin ka hrelo’ – Sigmund Freud

v ‘Thilpek hlu ber chu Pathian hnen atanga ka dawn a ni a, chu mi chu ka PA tiin ka ko thin’

Jean Ralte

 

2017 Pate Ni puala ka pa hova kan thlalak hi kan tarlang ve ange: