A night with Territorial Staff Band

A vawikhatna atan 18 November 2019 zan khan SAY Chaltlang Corps leh Territorial Staff Band te'n 'A night with Territorial Staff Band' tiin SAY Meeting-ah Corps Sipaite sawm telin hun hlimawm tak hman a ni.

 

'Inpekna kimah lawm a kim thin' tiin fakna hla kan lo sa thin ang hian, SAY Chaltlang Corps te inbuatsaihna a tha viau a, TSB Bandsmen-te pawh an lawm a, inkhawm chhimtu zawng zawng te nen Pathian fakna hun tha tak an hmang.

Band te hi Musical item nei tawrh tur hian mipuite hian an beisei thin a, hemi zan zet hi chuan Brass instrument nen music inchawih mawi tak hmangin, Praise & Worship hun nung tak an hmangho tlat mai. Corps Band-te lakah pawh Corps mipuite beiseina thar a siam a, hunthar min hruai kai ngei an beisei a ni.

Territorial Staff Band te hian rimawi ngaihthlak nuam tak an chhawpchhuah piah lamah, ril takin thlarau malsawmna kalkhawmte nunah an thlen a, inkhawm chhimtute tan a inchhir awmloh tak zet a ni. An hruaitu Captain Charles Chalrimawia'n hnehsawh taka inkhawmte lam zirtira a kaihruaite chuan sipaite a chawk phur in, khamlo takin hun an hmang a ni.

Remhre taka SAY Chaltlang Corps memberte inbuatsaihna, TSB bandsmen te tan dawnsawn a nawm hmel hle bawk. Veng kara kik tak tak atanga lo kal bandsmen-te chaw ei hmanlo tan pawh, ei leh in hnianghnar tak an lo buatsaih bakah, mimal tinte puala key-chain, photo-booth ni pah nghal, an lo siamte chuan lawm a hlawh tak zet a ni. TSB tan pawh zan danglam bik, nghilh har tur tak a ni ngei ang.

TSB puala SAY memberte'n thil an lo buatsaihte hi, an practice room-a dah turin TSB te hian an khawm vek nghe nghe a ni.

Jean Ralte

Right at the Heart Conference 2019

Youth and Children lama thawktute pualin Right at the Heart Conference 2019 chu 26 August atanga 1 September 2019 thleng hian Sunbury Conference Centre, Sunbury Court, London-ah neih a ni dawn. He Conference-ah hian India Eastern Territory aiawhin Captain K Rohlupuia Territorial Youth Secretary leh Captain Charles Chalrimawia Territorial Children’s Officer te chu an tel ang. Conference hi General Brian Peddle leh Commissioner Rosalie Peddle World President of Women’s Ministries hovin bul tanna leh a kharna hun hman a ni ang.

Rilru hrisel tak nei turin tunlai naupangte leh thalaite hian chhuan lo awm tawhte aia nasa in an nunah tawnbuak tur an ngah a, Social Media chak tak leh Technology sang tak in lumlet karah hian kaihruaitu an mamawh takzet a ni. Mordekaia'n lalnu Estheri hnena, 'lal nihna i lo chan hi hetih hun atan ngei hian a ni dawn lawm ni?', [Estheri 4:14] tia a lo zawh ang khan, kan tunlai huna naupangte leh thalaite kaihruai tur hian Salvation Army hi Pathianin dinhmun pawimawh takah a dah a, chumi atana kaihruaitu turte lo thuam chakna atan he hunbik hi buatsaih a ni.

He Conference-ah hian khawvel pumpuia Territory leh Command tin atanga TYS leh TCO, mi 100 an kalkhawm dawn a ni. Conference chhung hian kan naupangte leh thalaite rawngbawlna tihchak dan turte, rinna kawnga intuh ngheh zawk dan turte, him zawka an awm theih dan turte, rilru hrisel zawk an neih theihna tura enkawlna pek dan turte zirho a ni ang. Zirtirna hi mithiam bik, khawvel hmun hrang hrang  atanga thlan bik te’n an pe dawn a, heng bakah hian Bible Study leh Zone hrang hrang anga sawihona hun neih a ni bawk ang.

CS Lewis- a chuan, 'Naupangte hi hna pawimawh tak laka min la pengtu an ni lo. Anmahni hi kan hna pawimawh ber chu an ni' (Children are not a distraction for more important work. They are the most important work), tiin a sawi. Kan Territorial Commander, Commissioner Lalzamlova pawh hian kumin atangin Facebook-ah Salvation Army thalai kum 30 hnuailamte pual group - Youth of SAIET a siam a, thalaite ngaihdan leh an harsatnate hriatpui a, ngaihven zuina atana siam a ni. A kum huamchhunga awm i nih hlauh chuan lo join ve ngei i tum dawn nia.

Right at the Heart Conference hi kum 2015 khan Sunbury Court-ah neih alo ni tawh a, tuna Conference neih tur hi a vawi hnihna a ni. Captain Charles Chalrimawia, kan Territorial Children’s Officer chu Right at the Heart Conference Programme  Committee-ah hian South Asia Zone aiawhtu a ni mek bawk a ni.

Jean Ralte

LEAGUE OF MERCY 2022

Heng ka unau te berte zinga mi pakhat chunga in tih chu ka chunga ti in ni (Matthaia 25:40)

Hmuchhuaktu William Booth-a fapa - Commandant Herbert Booth-a, Canada-a Territorial Commander anih lai khan Toronto-ah League of Mercy (Khawngaihtu Pawl) hawnna inkhawm December 16, 1892 a an neih thu ziak a ni a, an inkhawmna chanchin hi December 31, 1892 khan Canada War Cry-ah tarlan a ni. He pawl lo ding tharin a tum chu -  Sipai Pawl-a hmeichhiate in-unauna tichak a, damdawiin te tlawhin, Krista hnathawh chu mamawhtute hnen thlengphaka thawk chhuak tura din a ni.   February 4, 1893-a War Cry chhuakah chuan League of Mercy chuan hna a thawk ta ngei a ni tih a puang a, hemi hnu hian ramdangahte pawh League of Mercy chu a darh zau ta zel a. He hmangaihna leh khawngaihna rawngbawl hnaah hian mipa leh hmeichhiate an thawk tlang a, khawvel hmun thenkhatah chuan Community Care Ministries tih a ni bawk.

League of Mercy hi Corps-a Women Ministries peng pakhat, mipa leh hmeichhia te thawhhona a ni a, a tum ber chu Tanpuina rawngbawl hna thawh a ni. He rawngbawl hna hi mahnia awm te, khawhar te, piansualna emaw, bawrhsawmna emaw leh thil engemaw bik tak avanga dah hran, mi tlawh mang lohte tan a ni a. Mi, anmahni chauhva chengte emaw Dahkhawmna in - Lung In te, damdawiin te leh tanpuina pek tura lakkhawm te hnen thleng phaka rawngbawl hi a thiltum ber chu a ni.

Mi tupawh, mipa emaw, hmeichhia emaw kum 14 chunglam, Krista tana inpe, midangte lainatna leh hmangaihna an neihzia hmuh theiha tilang te reng reng chu member-an ni thei vek a, member ni duh chuan dilna ah hming an ziak a, Corps Officer-in a dilpui (recommend) thin. League of Mercy chhinchhiahna chu rawng sen chungah Geneva Kros var a ni a (Geneva Cross chu, a dung leh a vang inchen kros hi a ni), in-an tlanna chhinchhiahna a ni a, LOM memberte'n mite an kanvelnaah bel ngei tur a ni.

 

Kum 1983, Eastern India Territory ni a, Lenin Sarani, Calcutta-a Territorial Headquarters awm lai khan kan Home League President Commissioner Ruby Mannam Samuel-i kaihhruaina hnuaiah League of Mercy rawngbawlna hi Calcutta-ah chuan neih a ni tawh a. Sipai Tlangau January 1984 issue-ah Major Zamawii, Secretary for League of Mercy, Central Division chuan October ni 22, 1983 a League of Mercy din anih thu a lo ziak a ni. An din tirh hian League of Mercy member atana inpe mi 22 an nei a, October ni 29-ah member thar 4 in an belh leh a, November ni 5-a member thar 1 nen an zavaiin member 27 an awm thu a tarlang. Heng an inhmuhkhawm hian memberte chuan thawhlawm an kengkhawm a, a hmasaber hian Rs.73/-, a dawtah Rs.44/-, a tum thumnaah Rs.80/-, avaiin Rs.187/- an ngah a ni.

 

 

An fehchhuahna hmasaber chu October ni 29, 1983 khan Z.E.F. te enkawl Hermon Children's home an tlawh a, tanpuina Rs.140/- lai an hlan a, member 18 an thawkchhuak a ni. Hemi kum vek November ni 5 khan Civil Hospital-a damlo rethei zual mi 8 hnenah kanna thilpek Rs.5/- theuh an hlan bawk a, member 11 an thawkchhuak tih a tarlang bawk a ni. Heng bakah hian Jail tlawhna hunte pawh an hmang a ni.

Kum 1993 khan Territory dinhmun pek kan ni a, tichuan, 17 July, 1994 khan R.M.Hall-ah Territorial League of Mercy Secretary hmasaber turin Major Lalzuithangi (tuna Lieut. Colonel Rtd. ni a Chaltlang Corps-a awm mek) chu Colonel Sawngchhunga, Territorial Commander hmasaber khan a lo nemnghet ve ta a ni. Kum 1995 atangin Lamka Corps leh Saitual Corps ah te din a ni a, Corps dangah te pawh dinchhoh a lo ni ta zel a ni. India Eastern Territory-a League of Mercy din kum 39-na kan hman mek lai hian Centre 111-ah LOM a lo ding ta a, Member pawh 8541 lai kan lo tling ta. Territory level-ah harsatna bik tak nei mi 32 chhawmdawl mek niin, Corps level-ah chhungkua engemawzat hnenah LOM te hian tanpuina an hlan thin a ni.

Chaltlang Corps-ah hian kum 1995 July thla atang khan League of Mercy hi din a ni a, bialtu C.O. Major Laichhingi kaihhruaina hnuaiah din ni in, kan LOM Secretary hmasaber chu Pi Hmingduhawmi a ni a, LOM Treasurer hmasaber Pi Nukimi a ni thung. Tun dinhmunah LOM member 136 Chaltlang Corps-ah kan awm mek a, hemi-ah hian member 36 chu non-Salvationists an ni.

League of Mercy tihtur ber chu vantlang zinga mimal tinte thlarau lam leh tisa lama tanpui an tulna taka va tanpui a ni. Tualchhung mamawhna dan a zir te, memberte dinhmun a zir te in League of Mercy chuan a rawngbawlna chu a her danglam thin a ni.

Enge Harvest Festival chu?

‘Harvest’ tih hi Old English thumal ’hærfest’, atanga lak niin, sap-in “autumn” an tih mai, favang tihna a ni. Lo-a thlai thar lakkhawm runpui hun a kawk deuh ber. Favang hunlaia thlabial hi Harvest Moon tiin an vuah a, Harvest festivals chu Harvest Moon hnaih ber Chawlhni-ah an hmang thin a ni. Thlai a lo puitlin tak avanga lawmthu sawina leh rim taka hnathawh rah seng theiha awm ta avanga hlimna lo thleng lawmna hun a ni.

Kan mamawh tinreng min pek avanga Pathian hnena lawmthu kan sawina hunbik Harvest Festival-ah hian, kan thlaithar leh dehchhuah tinreng atanga kan dahhrante  Biakinah kan kengkhawm thin a, chungte chu pawisaah chantirin, chumi tlingkhawm chu kan vela mamawhtute hnenah semdarh a ni thin.

American hovin Thankgiving hmasaber nia an sawi pawh kha, America ram an hmuchhuah hnua an Thlaithar hmasaber lawmna October 1621-a an neih kha a ni a, Harvest Festival a ni. Tichuan, chumi chu chhawm nung zelin ‘Thanksgiving Day’ tia hmangin, kum 1864 atang khan President Abraham Lincoln-a chuan an ram ni pawimawhah puangin an hmang zui ta zel a ni. British ho chuan kum 1843 atang khan Biakin-ah Harvest Festival an hmang tan a, Cornwall-ah Rev. Robert Hawker-a chuan a kohhran mite kokhawmin lawmthu sawina hunbik an lo hmang a ni.

SALVATION ARMY HARVEST FESTIVAL hmasaber nia hriat chu Winslow vawngtu Officer te – Captain McIver leh Lieut. Short te kaihhruaina hnuaia 1890 favang a hman kha a ni. Inrinni atanga tanin Bazar hmun lun laiah harvest festival service neih a ni a, Chawlhniah thlaithar thawhlawmte nalh taka remin urhsun takin hun an hmang a, a tukah Captain Fisher, London hovin an hralh leh a ni. 1909 khan USA-a Salvation Army pawhin an hmang tan. Kum 1929 khan Self Denial Appeal ang hian Harvest Festival Appeal siam a lo ni tawh a, Harvest Festival hi urhsun taka hmangin, thlaithar mai bakah beramno te, puan te pawh an keng khawm thin a ni.

Salvation Army emaw Kristiante chauh emaw hian Harvest Festivals hi kan hmang lo a, khawvel hmun hrang hrangah, hnam tihdan leh lawmdan chi hrang hrang hmangin, leia thil lo to avanga thlai/thingkung lo puitling ta lawmna hunbik chi tam tak a awm. Thenkhat lo tarlang ila - Chuseok - Korea, Olivagando - Italy, Incwala - Swaziland, Pongal - Southern India, Sukkot - Israel, The Moon Festival - China, Taiwan, Singapore leh Vietnam, Fiesta Nacional de la Vendimia - Argentina, Kadayawan Festival - Philippines, angte hi an thil tharchhuahte avanga intihhlimna kut an ni.

Kan Harvest Festival danglam bikna chu, tunlai hunah pawh hian ‘MIDANGTE’ kan thupui a la ni fan hi a ni. Thlaithar thawh tur kan neilo a ni thei, amaherawhchu, eitur chhe mai lo turte a kenkhawm theih a, UK leh ramdangah chuan Salvation Army te semdarh leh turin Harvest Festival-ah hian hengte hi an kengkhawm mai thin a ni. Kan ram ah chuan lo nei mi in, kan lova thlai tharte kan kengkhawm a, midangte kenkhawm sa, a man hu aia tovin kan chansak bawk a, chung pawisa tlingkhawm chu Headquarters-ah thehluh a ni a, chanhaite leh thlaraubo manna atan hman thin a ni.

Harvest hian Kristiante nunah tum thuk zawk a nei lo maw?            
Nei e, Krista tana thlaraubote sengkhawm hna leh Salvation Army te’n ‘growing saints’ (mite invawng thianghlim tura zirtir) kan tih mai, midangte Pathian hmangaihna hriatfiah tir tura zirtir hi a ni. Galatia 6:9 [KJV] 'Chuvangin, thil tha tih I ning lo vang u; kan inthlahdah loh chuan a hun takah a rah kan seng ngei dawn si a', tih ziak a ni. Tun Chawlhnia ‘Harvest Festival’ kan hman tur pual hian - mite thinlunga chi nung tuhtu ni thei tura min buatsaih turin Pathian dil ila, tichuan Pathian rinawmna leh Chhandamtu ropui chanchin zirtirin, rah duhawm tak kan seng thei ang.

IET Harvest Festivals

Jean Ralte

ᔕᗩY ᔕOᑕIᗩᒪ & ᑕOᗰᗰᑌᑎITY ᔕEᖇᐯIᑕE

Kum 1973-a lak Chaltlang Corps TGM memberte Carol Service thlalak a awm a, hmuh a nuamin thu tam tak a sawi a ni. Hnuchhamte puala Carol Service hi hemi hmalam pawh hian neih a ni tawh a, khel lova thlasik a lo thleng ang hian December thla-ah kan Home puala Carol Service hi Chaltlang Corps thalaite'n kan nei thin a ni. Hemi bakah hian kan High Day denchhenin, Sipai Pawl enkawl mai piah lamah, kohhran leh mimalin Home a neih ahte thilpek hlanin tlawh fo a ni.

Kum 2000, 26th June Anti Drug Day denchhenin SHALOM te nen Awareness Program SAY Meeting ah neih a ni a, anni nen vek hian kum 2003, 23rd October khan AIDS & Drugs dona zirchiang turin Training neih leh a ni. Kum 2005 August thlaah HIV/AIDS Awareness & Sex Education zirho in hun hman a ni bawk. CHAN Team te nen hun hmanho thin a ni bawk a, Territorial Facilitation Team tenen thawhhona tha tak neih thin a ni. Children & Youth Year kum a khawlai rawngbawlna nasa taka kalpui anih a, ruihhloa tangte huikhawmnaah pawh khan kan tangkai pui viau a ni.

Chhungkaw harsa chhawmdawlna SAY-in a neih hmasak ber chu kum 2001 Founder's Day Denchhen a Pi Roliankimi Rs.500/- a tanpui kha a ni. Heng hunlai hian section incharge pawh neih a ni lo a, SAY Council in a khaikhawm mai thin. Kum 2002 atang khan Territorial SAY Council din a ni ta a, SAY Council pawh herremin, Office Bearers tur mi 6 te chauh ruat ni tawh lovin, Executive Council Member tur mi 12 ruatchhuah an ni ta a, Social & Community Section pawh Incharge hran neiin a lo awm ta. Kum 2002 Founder's Day denchhen khan Social & Community Section hmalaknain chhungkua pali hnenah Buhfai sem a ni a, hemi kum vek hian Anti Narcotic Sunday denchhenin Bial 3-ah inthen a ni a, ruihhloa buai te tlawhchhuahna neih a ni.

Kum 2003 khan Pu Huanhmingthanga Rs.1000/- pe in tanpui a ni. Kum 2004-ah Motherless Babies Home, Aizawl Support Team te ngenna in Home naupangte Tourist Lodge-ah Advance Christmas hmanpui in, Y.P.Hall ah zanriah kilpui nghal an ni. Hemi kum vek hian kan Corps League of Mercy te tha tihchakna'n Rs.3000/- an rawngbawlna atan hlan a ni.

Children & Youth Year kum 2005-a hman anih khan Chawlhni tlai SAY Prayer Meeting-ah thawhlawm lakhawmin thlatin Rs.500/- in Home Naupang pakhat sponsor kan lo tan ve thei ta a, a kum lehah phei chuan 2 lai kan sponsor thei a ni. Hemi kum vek India ram Sipai Pawl Anniversary denchhenin Bethesda Hospital ah thutthleng sei 12 dah a ni bawk.

Kum 2007 a lo herchhuah meuh chuan Social lamah rawngbawlna zau zawk hawnin a lo awm a, Social & Community Section Sub-Council hial din a lo ni ta. USA Mission Team, kan Territory rawn tlawhtute zing a mi Andrew Garcia chu Founder's Day ah kan mikhual a, SAY member thahnem tham takte C.O. leh Local Officers te kaihhruaina in Aizawl Civil Hospital-ah thutthleng sei 22 pek a ni a, Thuampui leh a chhehvelah mi harsa chhungkua 12 hnenah buhfai Bag sem nghal a ni

Hemi kum atang hian Chhungkua 4 support pek tan a ni a, buhfai leh chawhmeh pe a kan thin an ni. Hemi atan hian thlatin SAY Meeting hnuhnungberah SAY memberte'n buhfai kenkhawm thin a ni a, Senior Corps remtihna in thlatin Thianghlimna Inkhawm chawlhni vawi 2 na ah zel Social puala bawm hun pawh tan a ni. Kum kal zelah phei chuan SAY Fund Ip-ah column hran siamin Social & Community Section hmalakna atan hian Social Fund siam a ni ta hial a.

Family kan support te hi an dinhmun enzui zelin, a thente chu an hnaih zawk Corps/tlawmngai pawl te kuta hlanchhawng te pawh an awm a, a tul anga survey neiin support belh thin a ni. An nitin mamawh ei leh in ken sak mai piah lamah hian, a remchan anga thla tin kanvelna hunah hian tawngtai rualna hun leh Pathian faka inpawlhona hun hmante hian tlawhte leh kan thlawhte tan malsawmna tam tak min thlen thin a ni. An mamawh pek mai bakah hian anmahnia an intunnunna tur ngaihtuahin; Pu Daju-a te chhung phei chu vawk man sak an ni a, an vawkin thlengin sak sak an ni.

Family Support kalpui piah lamah hian, a tul angin Ni bik denchhenin Home leh Centre te tlawh a ni bawk a, chung zingah chuan Gan Sabra te kan theih ang anga chhawmdawlin tum engemawzat chu Krismas ruai siamin, kawm hlim pahin an awmna hmunah leh hmundangahte hruai chhuakin hun hmanpui an ni.

Kumin hian chhungkua 3 SAY Chaltlang Corps te'n support pe-in kan chhawmdawl mek a, chungte chu - Pu Chhanhima - Zemabawk, Pi Lalnunpuii - Mualpui World Bank Road leh Pi Vanlallawmi - ITI World Bank Road te an ni. Hmuchhuaktu William Booth-a'n, 'Thlarau bote chhandam turin thawkchhuak la, a chhe berte thleng phak ngei turin', tia min lo chah angin, chanhaite puala kan rawngbawlna hlenchhuah anih theihna atana Corps Sipaite min dawmkanna ah lawmthu kan sawi tak meuh meuh a ni.

Jean Ralte

Patling chuan...

Thufingte 22:6 - Naupang chu a kalna awm kawngah chuan zirtir ula, A upat hun pawhin a thlah lo vang.

 

Tunge Patling? tiin in zawt ta ila, Bible thu atangte leh kan chhehvela mi pa-te kan mitthla-ah an lo lang suau suau mai thei. Pa tha chanchin ni lovin, Patling nih theih dan vawiin Pa-te Ni ah hian ilo zir ho teh ang.

Pathian a tih. Thufingte 1:7 'Lalpa tih hi finna bul a ni a; Nimahsela mi ate chuan finna leh zirtirna an hmusit thin'. Pathian a tih tlat avangin Patling nih a hlawh.

A nupui a hmangaih. A nupui laka a awm dan zawng zawng a fate'n an lo thlir reng a, chhungkua an din ve huna an nun dan tur an zir tih a hria. Nupuite zahpah lo, kutthlak ching a nih chuan, a fate'n thil nihphung rengah ngaiin an chhawm dawn si a, chuvangin a Nupui hmangaih leh duat takin a  dawm thin. A Fapa pawh pasal leh Pa nih tling takin a lo seilian ang a, a fanu pawhin chutiang mi chu pasal atan a beisei thei ang. Ephesi 5:28-ah chuan Pasal te'n anmahni taksa an hmangaih ang tluka an nupuite hmangaih turin min fuih. Mahni nupui hmangaih tu chuan amah a inhmangaih a ni.

A fate a ngaihven. An lamah bengchhi in a ngaihven thin. Mit leh beng lehlam TV/Mobile phone lama len a, lehlama lo dawnsawn ni lovin, ngunthluk taka lo ngaihthlak saktu a ni. An tet laia an hriatthiamloh chu hote a ni thei, hrethiam turin a lo tanpui a, an len hnua harsatna an tawh palhin pan hmasak berah an nei thin. Engthil pawh zalen taka an sawipui theih ni turin a ngaihven tlat a ni. Thufingte 1:5 ah chuan Pa fingin finna leh thuril sawite hriatthiamna a neih tur thu min hrilh a ni.

A fate mamawh a phuhruk sak. A chuang aliam, an duh nazawng pek tur tihna a ni lova, an nitin mamawh, an thanlenna atana pawimawh engkim a ngaihtuah sak a ni. I Timothea 5:8 ah chuan, miin a chhungkhat lainate a ngaihsak lo va, a chenpui chhungte ngei pawh a ngaihsak loh chuan rinna a phatsan a, ringlo mi ai pawhin a thalo zawk, tiin min hrilh a. Pathian awm ringlote mahin an chhungkua tan an thawhchhuah theih chuan, mahni fate mamawh phuhruk theilo chuan Patling nih a la hlat hle.

A fate a thunun thin. Mahni inchhung atangin thununna hnuaia awmdan kan zirtir a pawimawh a ni. Chutiangin Sikul thuneitute leh khawvel dan hnuaia rem taka awm dan an lo zir thei ang. Vaukhanna tawngka chhuah thlazen loh tur, thununna an chunga kan lek dan an thlir reng a, kan sawi anga kan tilo anih phei chuan, palzut dan an zir thuai dawn a ni. An laka a phut anga a awmlo anih phei chuan, Pathian thuneihna hrelo in an lo thanglian dah ange. An zah tlakin a nung a, hmangaih taka thununin a kaihruai thin.

Finna dilin a tawngtai thin. A fate hriat thiamloh leh mamawh zawng zawng phuhruk turin theihna a nei lo tih a inhria. Patling ni turin a finna, hmangaihna leh dawhtheihna te a tawk hauhlo, chuvangin, a neitu Pathian hnenah a dil thin. A fate tana Patling ni turin tanpuitu a mamawh a, tanpui theitu chu Pathian chauh a ni.

Bang lovin a fate tan a tawngtai thin. A fate awmna hmun zawng zawngah a awm ve theilo, khawikipah a humhim phalo tih a hria. Englai pawha hmutu leh humhim theitu Pathian hnenah a fate a hlan thin. Thil tha leh thalo thliar hrang turin a zirtir a, amaherawhchu, chutiang thlangfel tura thutlukna an siam a tul hunah an kiangah a awm ve thei si lo. A fate tan tawngtai in, Pathian kutah a kawltir ta zawk a ni. A hmangaih aia nasa in a hmangaih a, thil kalhmang pawh a hre zawk tih hriain, A hmangaihna angchhunga lo humhim turin a ngen thin.

A fate entawn tlakin a nun a veng tha. Thufingte 22:6 a kan hmuh angin, kan fate hi an kalna tur kawng kawhhmuhin kan zirtir an ngai a, chungte chu an upat hunah an theihnghilh hauh lo ang! A duh emaw duhlo emaw, a fate tan chuan an 'IDOL' a ni tlat, a awmdan tinreng zirin an ngaisang em em a ni. I pa i ngaihsan thin zia te kha ngaihtuah la, a ziarang i pholang ang bawkin, i fate pawhin an nunpui dawn tih hre reng ang che. Patling chuan fate entawn tlak ni turin a nun a vawng tha thin.

Hun tawp atan a fate a buatsaih fel. Thufingte 23:24 ah chuan, 'Mi fel pa chu nasa takin a hlim ang a, fa fing hringtu chuan a chungah lawmna a nei ang', tih kan hmu. A fate'n in inlum an chhuahsan hun a lo la herchhuak ang, chumi atan a theihtawp in a lo inbuatsaih lawk. Chu aia pawimawh lehzual chu chatuan hun atan buatsaih a pawimawh tih a hria. Thutlukna a siamsak thei hauhlo, amaherawhchu, thutlukna dik an thlan theih nan a kaihruai thei thung. Rawngbawltu, Doctor, Engineer, IAS ni tura buatsaih tur chauhvin ROHLU Lalpa'n a pe lo a, chatuan NUNNA ROHLU nei ngei tura enkawl chu a koah a innghat tih a hria.

Patling nih hi thil awlai ani hauhlo mai le, amaherawhchu, thil tih theihloh erawh a ni hauh si lo. Beih fan fan a ngai a, tawngtaina tam tak nen, thutlukna dik siamte pawh a ngai. Mahni chauh chuan a theiloh ang, Pathian pawhin a phut lo a ni. Patling dinhmun luah tura kan khualzin kawng kan zawh mekah hian Pathian chauh rinchhanin bei ila, mal min sawm ngei ngei ang.

Jean Ralte

48th Raising Day

Kum 1971 April ni 14 kha Chaltlang Corps-a Chhandamna Sipai Pawl \halaite tan chuan ni danglam bik tak a ni. Nilaini a ni a, hetih hunlai hian |halaite puala inkhawm hi nilai zana neih \hin reng a ni; zan lama an hun hman tur atana inpuahchahin Chaltlang Corps \halaite an hmanhlel a. Tihtur pawimawh tak an neih chu - Aizawl khawpui chhunga \halaite daih tur Meichher siam a ni. |henkhatin Zotui kawng ruamah mau an sat a, an pu sang sang a, meichher tur lak ngah hmanloh mawlh hlauin an thawk suau suau mai. Heng an thawh karlakah hian an hruaitu Pu Mangkunga leh Pu KK Rawta te, an memberte chawk phur tur tawk lekin an han infiam ta thin a, an hlim tlang dar dar hle mai. Meichher atana khawnvartui sawngbawl vel chu Pu KK Rawta kutah an dah deuh a, a chhan chu a ni hi Aizawl-a khawnvartui lei tura lokal, Chaltlang-a cham hlen ta a ni miau a.

Chumi zan chuan J.B.School (tuna Chaltlang YMA Hall dinna hmun) kawtah, Aizawl-a Sipai Pawl \halai rualte chu lo kalkhawmin, urhsun takin Lushai Hills Division huap a Torch bearer Group Movement (TGM) dinna hunbik chu hman a ni a, TGM danbu in a sawi ang thlapin meichher chhi ngeiin TGM memberte lawmluhna hun hman a ni ta. An pawl hming thar tihnghehna atan hian Chaltlang Corps |halaite’n Meichher an lo siam sa chu keng theuhvin, kawngzawhna an nei nghal a ni. He hun an hman hi Chaltlang Corps |halaite chuan ‘Raising Day’ ah hmangin 1996 khan Silver Jubilee, 2011 khan Ruby Jubilee te kan lo lawm tawh a, vawiin ni hi a kum 48 na a lo ni ta der mai. Golden Jubilee thlenna turin kum 2 chauhvin min dal ta.

Kum 1967 khan Major Tuliana DYO chuan TYPS Major Ransom-i hnenah |halaite inkaihhruaina dan bu a lo dil tawh a. Major Ransom-i chuan Torch bearer Group Movement (TGM) dan bu a rawn thawn a. Brig.Ngurliana DC phalna-in Mizo tawnga lehlin hna kalpui a ni a. Dr.H.Thansanga (Ex-Minister) Bazar Corps chuan letlingin, \halaite inkaihhruaina tha tak Official-a neih a lo ni a, 14 April 1971 khan tihpuitlin a lo ni ta a ni.

Kum 1954 hmalam pawh khan Corps thenkhatah chuan thalai inpawlkhawmna hi a lo awm tawh ngei niin a hriat a. Amaherawhchu, kum 1954, October ni 8 khan Calcutta THQ (Eastern India Territory) ruahmannaa |halai khawmpui, Saitual ah neih a ni a. Pathian thu leh hla a inpawlkhawmna bakah, Sports hmanga inelna hun hlimawm tak neih a ni. Hun lo kal zelah hei hi kan Territory-a \halai rawngbawlna bul tan nan pawm a lo ni ta a. Tichuan, India Eastern Territory-a Salvation Army Youth Rising day atan October ni 8 chu serh a ni thung a ni.

1971 kuma TGM hming a put tirha Chaltlang Corps TGM hruaitute chu:

President – Pu Mangkunga

Vice President – Pu K.K.Rawta

Secretary – Tv Ralzadanga

Asst. Secretary – Tv Ramfanzauva

Treasurer – Pu Ngurthansiama

Music i/c – Tv Lalthanchhunga

Games & Sports i/c – Tv Lalramhluna

TGM atang hi chuan Council Memberte ruat an ni ve ta a, hriat theih china TGM Council Member hmasaberte chu – Pu Thangluaia, Tv Rintluanga, Pu Dohnehliana, Pu Kawlkunga, Pu Ngurhlunchhunga, Nl Manthangi, Nl Ramnundangi, Nl Tluangzeli leh Nl Thangzeli te an ni.

Torchbearer Group Movement (TGM) Flag insiam siak a awm a, kan Corps TGM Secretary Tv Ralzadanga (PG) [Pu Lalruatkima pa] siam chuan pakhatna a hauh nghe nghe a, tunthlengin he Flag hi vawnthat a ni. TGM memberte hian khawtlang an al hneh em em a, tunlai hunah pawh Chaltlang Corps \halaite hi member tlem zawk ni mah ila, kan thawm hi a lian viau zel mai. Tun hmalama Bawngtuai Cup an huaihawtte leh Carnival an buatsaihte chu a hunlaia \halaite thiltih zinga langsar leh sawi zui hlawh ber berte an ni.

 

Kum 2011 khan Thalai Ruby Jubilee lawmna hun hlimawm tak neih a ni. Ruby Jubilee lawmnaa Young Crusaders hunlaia kan Male Voice member intelkhawm tha lehin item tha tak an rawn neih chu a hnuaia link-ah hian entheihin a awm. A hunlaia Zoram dung leh vang alh hneh hat tham Young Crusaders Zaipawl te pawh an zai bawk a, a video erawh kan hmu thei ta lo.