Tunhnaia
ka zinna ah, ka lirthei chuanna tukverh-a ka dah lai chuan, ka vela thil awmdan
leh mipui mimir nunphung chu ka ngaihtuahnaah a rawn lut nguah nguah a. Ngaihsam
tak leh Pathian zahlo, langsar taka nun chen, chatuan huna an awm dan tur reng
dawn pha lo anni tih ka hmu a. Tukverh atang chuan, ka hmu vek hian ka hria -
mi nuaih tam tak chinlem neilo hlimna neih beiseia zu in chiam te, lamte leh
zaite, tul taka hnathawk, rilru hah, ram inrelbawlna leh an buaina in a delh
mekte an ni. Ngaihsam - kawng tam taka ngaih sam lui - kawng thenkhatah a dik
hrereng chunga ngaihven duh hauh si lo. An zavai mai hian Pathian Lalthutphah
diriam taka deuh sawh ang mai hian ka hmu a ni. Chutianga ka ngaihtuah mek lai
chuan, he inlarna hi ka hmu a.
Tuipui
thim tak phul bulh bulh mai ka hmu a. Chhum dum chhah mup hian a awp run a;
engemaw changa kawl rawn phe zawr zawr in, tek a tla dur dur bawk a, namen lova
thli thaw chuan tui a rawn vawrh chiam a, tla leh thin mahse, tla tur bawkin a
rawn invawrh kang leh thin a.
Chu tuipuiah chuan mi tam tak, an pil lohna
tura khawngaihthlak awm taka in vai chiamte hmuin ka inhria, mangang taka
awrawl chhuahin an rum a, sawichhiatna tinreng chhakchhuak chunga rumin an
invawrh a, au vawn vawnin, a țhen chu kang leh tawhlo turin an pil vawng vawng
a ni.
Chu
tuipui lungawilo tak atang chuan lungpui to-lurh mai rawn chhuak hi ka hmu a, a
pawng chhuak zel a, luipui phul bulh bulh chhunga chhum dum zam vel nuai pel
rakin a inhung ta ruau a.
Chu lungpui thuthmun velah chuan dawhsan ang
deuh hian hmun awl zau tak hi lungpui hual velin a awm a. He dawhsan pan hian
mipui tam tak, tuipui atanga rawn in saseng ka hmu chu ka lawm hle a. Him taka
dawhsan rawn kai thenkhatte chuan hmun hima hruai kai turin, tuipui phul bulh
atang chuan midangte an kaichhuak pawh ka hmu a.
Ka
han bih hnai deuh a, chhanchhuah tawh țhenkhat chuan, leihlawn te, hrui te leh
lawngleng te hmanga tuipuia pil mekte chhanchhuak turin an thiamna leh
theihnate an thawhkhawm a. Hmun thenkhatah chuan, ‘boralte chhanchhuak r'u',
ti a kohna chhangin chu tuipui rap-awm taka zuang lutte pawh ka hmu a. A
enginnge min tilawm zawk pawh ka hrethiam lo – tuipuia tlahlum mai turte
lungpui dawhsana an lawn kaia chhanchhuah an ni ta chu nge, chu ‘Mi Ropui'
takin anmahni chhandamna tura a inhlanna leh inpumpekna chu!
Ka
thlir reng lai chuan, chu dawhsana awmte chu mi chi tinreng anni tih ka hmu a.
A awmzia chu, pawl hran hran, an lawmzawng leh an hnathawhte pawh inanglo tak
tak an ni. Amaherawhchu, mi tlemte chauhvin tuipuia la tang mekte chhanchhuah
chu an tihturah an ngai.
Hriatfiah
har ka tih ber chu, heng mite hi an hun kal tawhah khan chu ‘tuipui' atanga
chhanchhuahna lo chang tawh ni si in, an zavai mai hian an theihnghilh zo ta em
ni? Eng pawh ni se, a thimna leh hlauhawmnate kha an hrechang tawh lo. Mak leh
awih harsaa ka hriat leh chu, heng mite hian an hmuhphak maia boralna lamtluang
zawha pil mek khawngaihthlak takte veina reng an neilo chu a ni – a tam zawkte
chu an nupui/pasal ngei te, an unaute leh an fate ngei an ni si a.
Hetiang
taka ngaihsaklohna hi hriatloh vang a ni theilo, a chhan chu an hmu phak reng
a, a sawi pawh an sawi ve fo alawm. A tam zawk phei chuan heng boral mekte
chungchanga zirtirna leh thusawite ngaithla hian inkhawm an țhulh ngailo.
Ka
sawi tawh ang khan, he dawhsana awmte hi thil chi hrang hrang buaipuiin an in
awmtlei hlawm a. Thenkhat chuan chhun leh zan zawma hlawkna umin an sumdawng a,
an hlawhchhuah sum leh paite, a him thei ang berah an dah tha a ni. A țhen
pangpar huan siamin lungpui pangahte chuan an tlar del dul a, lemziak mawi tak ziaka
lo hmanhlel te, rimawi tum te, leh mite mit titlai tur a thuamhnaw chi hrang
hrang inbel kuala lo intheh țhil tawk an awm bawk a. Ei leh in duhtawka lo
inhnawhpuar te, bo pil mai tur chhanchhuah takte chungchanga lo inhnial tawk
lah bo lo.
Chung
zawng zawng aia mak ti taka min siamtu zawk chu, dawhsana awmte zinga A kohna ‘aw' hriaa zawm tur annih inhria – aw ni
e, niin an inhria – Amah hmangaiha inchhal leh A khawngaih rawngbawl hnaa, A
nghawngkawl bahpui inti – Amah betu nia inchhalte hi an hna leh eizawnna, sum
peipunna leh nawmchenna, an chhungkhat laina leh țhian inpawlhonaah, an
rawngbawlna leh inhnialna, leh himna hmuna kal tura an inpuahchahna lamah te an
hmanhlel luatah, chu Mi Ropui-in a koh lawm lawm an hriat theihloh avanga, amah
ngei tuipuia a zuang lut chu a ni. A enga pawh chu ni se, an hria anih pawhin
an bengkhawn der si lo. An ngaihven hauhlo a ni. Chuvangin mipui nawlpui chu an
hmuhphak maiah namenlova tuarin an rak chel chul a, thim hnuaiah an pilbo mek a
ni.
Chutah
le, inlarna mak tak ka hmuh a, mak ti a ka lo thlir tawhte khum rak thildang, chu
inlarnaah chuan a lo lang leh ta. Chu ka thil hmuh maksak em em mai chu,
dawhsana awm tawh mipuite, Mi Ropui takin, boral mekte chhanchhuah hna hautak
tak mai thawhpui tura a koh lawm lawmte chuan, bang lova țawngtaiin an hnena
cheng tura 'Mi Ropui' an lo au chamchi chu a ni. Țhenkhatin an kianga cheng a,
A hun leh chaknate anlo hlim lehzual theihna tura hlana, anmahni chenchilh tlat
turin an duh a. A țhenin, a thutak lehkhathawn-a thuziak thenkhat an hriat thiamloh
leh man fuhlohte hrilhfiah turin an mamawh a. A țhenin chu lungpuiah chuan
thlamuang leh him taka an awm reng a – chu tuipuia an kir leh tawh hauhlohna
tura phun nghet turin an ngiat a. Chung zinga tamtak chuan, engtik hun emawah
chuan himna hmun (Vanram) an thlen ngei theihna tura an inrintawk theihna tura
an ngaih ti ngam turin an duh; a chhan chu țhenkhat an kal fimkhurloh em avanga
dawhsan atanga tla-hawlh palh, tuipui rap-awm taka bo pil leh an awm si a.
Chungte
avang chan, lungpuiah lawn sang zelin, an inpawlkhawm a, chunglama himna hmun (Mi
Ropuia awmna nia an ngaih) lam thlirin, ‘kan
hnenah lo kal la, min pui rawh', tiin an ngen chiam a. A ni erawh,
(thlarauvin) mangang taka tuipuiin a lem pil mek khawngaihthlak takte
chhanchhuah tumin a kuah khawm a, boralna lak ata khaichhuah tumin, beiseina
sawtlo taka lungpuia mipui awmte chu thawhpui atan a sawm ve thung a, ‘Lokal
ula, min rawn pui teh u', tia a au-na lamah A aw a chhang zo ta.
Ka
thilhmuh chu ka hrethiam ta. Hriatthiam awlsam tak a ni. Chu tuipui ka hmuh chu
kan chenna khawvel hi a ni – hringfate tuallenna hmun ngei hi. Țek de zawr
zawrte chu Jehova Lalțhutphah atanga thutak hriam tak rawn puanchhuah chu a ni.
Kawlphe chuan Pathian thinurna ro-va tak a entir . Chu tuipui lungawilo taka
mipui tlim hmur mai, natuara chiau vawng vawngte chu mi awmtha duhlo, boral mek
sang tam tak, an nawmsipbawlna khura inhnim pil, zu ruih hmang leh ruih tûr
zuartute, ruk hmangte, dawheh, sawichhetu leh Pathian ngaihsaklo, ramtin,
chitin, țawngtin amite an ni.
Aw!
Tuipui thim a va ni em! Ni e, hausa leh rethei – a nuaihtel teh meuh, hre duhlo
leh thiamna sang tak nei te an ni. An pawnlam landan leh dinhmun inanglo tak
tak, chhunglamah erawh thil pakhata dinhmun thuhmun – Pathian ngaiha misual –
tlinlohna nei leh engemawa inham buai, milem biak chak tlat, ramhuai
ngamthlemnaa in sal behtir, khuarkhurum mawng neiloa roreltu thuhnuaia tang an
ni.
“Thil
pakhata dinhmun thuhmun a?!” Ni love, thil pahnihah zawk a ni – an sualnaah
chauh dinhmun thuhmun an nilo, chhanchhuah an nih loh chuan manganna vawrtawp-a
pilbo tur țheuh pawh an ni asin.
Lungpui
to-lurh hian Kalvari tlang a entir a, mitin tlanna tura Isua thihna hmun ngei
kha. Chu himna lungpuia mipuite chu chhandamte an ni. An chakna, talent leh hun
an hman dante chuan an hnathawh leh an lawm zawng an entir a, sual leh hremhmun
laka chhanhim tawh, Lalpa Isua Krista zuitute chu. Amaherawhchu, an zinga mi
tlemte, beidawng duh hauh lova, rim taka boral mekte chhan tura an nun thap
mekte chauh chu Isua tana kros sipai
rinawm an ni. Mi Ropui tak tuipui raw-va tak atanga rawn kotu chu Pathian
Fapa ‘niminah nen, vawinah leh chatuan
pawha danglam lo' chu a ni a, tunthleng pawha bei fan fan, sawipuitu
rinawm, boral mekte chatuan hremna laka chhandam tura dingnghet tlat; rimawi,
khawl ri, thawm bengchheng tak karah pawh khawvel chhandam tura chhandam tawhte
rawn ko vau vautu aw chu a ri fiak țha asin.
Kristaa
ka unau duhtak, tuipui atanga chhanchhuah I ni a, lungpui hmun hima I awm mek
lai hian, A ni chu tuipui thim takah zuang lutin, thawhpui atan a sawm che a
ni. I zui ang em? Han thlir ve teh le. Nunna tuipui phul bulh bulh, mipui nuaih
zatel boralna lamtluanga liam mek an kat nuk nuk a, I dinna bul maiah khan a
ni. Inlarna lam chu dahțha in, tunah chuan thil tak tak ka sawi dawn – Bible a
tak anih tlukzeta thu tak, kros-a Isua khenbeh anih thu tlukzet a thu tak,
rorelna ni a awm ngei tur thu tlukzet a thu tak, a hnua vanram leh hremhmun a
awm ngei tur thu tlukzet a thu tak chu.
En
rawh! Thil landan maia bumin awm suh – mihringte leh thilte hi an landan hi an
nihna tak a nilo ania. Lungpui hmunhima awmlo zawng chu, boralna tuipuiah an
awm asin! Ropuina Lalțhutphah Var atanga a landanin han thlir teh le, a va lang
chiang em! Isua Krista, Pathian Fapa chu, Thlarauvin boralna tuipuia pil mekte
zingah hian awmin, anmahni chhanchhuak turin theihtawp a chhuah mek a ni. A ni
chuan, he indona thianghlim bei tur hian, a kianga zuang lut ve turin a sawm
che a – tunah ngei hian A mamawh che a ni. I zuang lut ve ang em? A awmzia chu,
A ke bulah bawkkhupin, engtikawng pawha A thu zawma chechhuak turin I inhlan
ang em?
Tumkhat
chu, Kristian nula pakhat hi ka hnenah alo kal a, a theihna, tawngtaina leh
sumte Lalpa hnenah a hlan țhin thu min hrilh a, tunah erawh a nun pum hlan a
duh a ni. Indona hmunah ngei zuan luha, a nun zawm zawng hlan a duh anih chu. A
awmzia chu, Amah țanpui tura tuipuia zuan luh ve a duh a ni. Tuipui kama awm
mekin, tui tla a hmuh veleh, chhanchhuahna kawnga dal thei a inthuamnate phelh
a, chhan tura a zuang lut ang hian, nang, tuipui kama him taka awm tawh,
boralna tuipuia pil mekte lainatna nei – ngaihtuahna, fakhla leh tawngtainaahte
chham țhintu chuan – zahna, chapona, midangte ngaihdan dawnna, nawmsak duhna,
mahni inhmangaihnate avanga kum tam tak chelhbeha I awmnate thing thlain, mi
nuai tamtak boral mekte chhanchhuak tur hian muangchang lovin, I pen chhuak ve
dawn lo'm ni?
Chu
tuipui chu a thimin a hlauhawm em? Zawh
ngailoa hriatsa a ni. I hmabak chu midang zuanglut tawhte ang bawkin thil harsa
leh tuarna namenlo pawh a ni thei. I tan phei chuan chu aia nasa, thih phah
hialna pawh a ni thei. Tuipui atanga rawn kotu che hian, nang aiin a hrechiang
a, chutiang hre chung chuan a ko che a, a hnena thawk ve turin a sawm che a ni.
I
kal ngei tur a ni! Chhuanlam I nei thei tawh lo. Kristianna ah I in awmtlei rei
ta. Lungmuanna te, fakna hla sakho te, inkawmhona hlimawm leh thiltihkhawm nuam
tak takte I hlimpui tawh a. Mihring tak pawha thil hlimawm tam tak, kut ben dur
durte, fak leh chawimawina hmanga auchhuahte, lei hmuna vanram tem lawkna tam
tak I nei tawh alawm le.
Tunah
chuan Pathian lam hawi la, hengte leh thildangte pawh hnuchhawn tur hian I
inpeih tih hrilh rawh le, I hun la awm zawng chu boral mekte chhanchhuahnaa
tuar ve turin, eng anga hautak pawh ni se I huam tih hi.
I ti
ngei tur a ni. I thinlung tihvara alo awm takah chuan, I benga kohna rimawi tak
rawn thum nawn tluk tlukte, I mihmuha sawmtu in a hui I hmuh mekte hi, thlan
tur dang a awm ta lo. Boral mekte zinga zuan luh chu I ko-a innghat a ni ta.
Tun atang chuan, an hrehawmna I peizawnna hi I hlimna ber a ni tawh anga, an
natna I tuarpuina chu I hahdamna, an kross I put pui chu I lallukhum niin, I
tana vanram chu an hremhmuna zuang luta I chhanchhuah hi a lo ni tawh ang.
Tunah, enge I tih ang le?
Lettu
- Jean Ralte
https://issuu.com/jeanralte/docs/who_careshttps://issuu.com/jeanralte/docs/who_cares https://issuu.com/jeanralte/docs/who_cares
https://issuu.com/jeanralte/docs/who_cares
