Tablet of My Heart: June 2022

Kum 1954 atang khan Lushai Hills Division huap leh Region leh Territory nih hnuah te Thalai pumhuapin, a hnuaia mi ang hian Thalai khawmpui lian buatsaih a ni:

1. Youth Congress Hmasaber 1954 @ Saitual

August 1954 Sipai Tlangau-ah chuan Thalai Inkhawmpui tura Zoram Sipai Pawl Thalaite Kohna! tiin puanzar a ni a. Hetih hunlai hian North-Eastern India Territory tan 37 Dharamtala Street, Calcutta-13 chu Territorial Headquarters a ni a, Colonel Ivar Palmer chu Territorial Commander niin Major J.M.Rand chu TYPS (Territorial Young People Secretary) a ni a, Lushai Hills Division-ah Brigadier Walter Merry Divisional Commander leh Major Sapliana DYPS (Divisional Young People Secretary) te hunlai a ni.

Lushai Hills-a Youth Congress hmasaber hi October ni 8 - 11, 1954 chhungin Thalaite buk, Saitual-ah neih a ni. January leh February 1955 Sipai Tlangau issue-ah te report kimchang tarlan a ni a, report petu hian Torchbearer tiin a hming a dah tlat mai. Hetiang ang Thalai inkhawmpui lian hi Mizoram-ah a la awm ngailoh thu pawh ziah a ni. He khawmpui hi TYPS Major J.M.Rand-a hova neih a ni a, Zoram Corps 54 atangin palai inziak mi 321 an awm a, chhimtu mikhual 506, langa lokal 295 leh Saitual Corps sipai 260 an tel a ni.

Inkhawmpui-na atan hian Saitual Government Middle School Headmaster Pu Zawnghuala phalna te, Private High School Headmaster Pu Thantluanga I.Sc. leh Government Primary School Teacher Pu Sela phalna te laiin School 3 hmun hman a ni. October ni 8, Inrinni chawhnu atangin inkhawmna neih tan a ni a, 'Tunlai hian Krista chu Thalaite tan kawng a ni' tih chu Khawmpui thupui ber a ni. DYPS Major Sapliana chuan thalaite fuihna thu tha tak sawiin Thalai Fangrual din a rawt a, thalai 50 zet an inpe nghal a ni. Company Orders fel zawk leh tha zawk neih dan turte an ngaihtuah nghal a, hei hian Zirlaibu a kawh hmel, a chhan chu Sipai Tlangau-ah hian International Company Orders tihchhuah thin a ni a, chumi-ah chuan Bible Lesson tarlan thin a ni.

Inrin zan inkhawmah hian Baktawng Corps Thalaite'n 'Talent tehkhin thu' atangin Drama an chang a, darkar 1 zet entir a ni a, mipui an tam lutuk avangin an lenglo a, pawnlama awmte hriat turin YPSM Lalzuala chuan a lo sawi chhawn zel a ngai hial a ni. Chumi hnuah mual zawl-ah an insawn leh a, Baktawng Corps tleirawl hoten 'cheraw' an kan a, kawrfual var ha-in form puantlang an bat a, lukhum var an khum bawk a, cheraw kan dan chi thum lai an entir a. Mipui lamin ngawi renga en chu harsa an ti aniang, an lo au ruih ruih a ni.

Hemi zawh hian, Saitual Corps Thalaite an che veleh thung a, puanchei ropui tak tak sina mawi taka inthuamin lukhum var an khum a, hla nena guitar rem meuhvin cheraw an kan ta a ni. An mawi zia leh an hlasak leh guitar nen a inchawih mawi zia chu sawiin a siak lo. A ziaktu phei chuan 'Pualhrang, phunbung zuan an iang mange', a ti hial a ni. Saitual Corps tlangval 30 rual lai tur te'n khuallam an entir veleh a, a mual virin an vir mup mup a ni ber mai. Hetianga Zoram hmasang nun hlui thlirkir tir thei tura lamte chungah hian palaite pawh an lawm hle mai.

Pathian thu leh hlaa inpawlkhawmna hun hlimawm takte neih a ni. Thawhtanni tlaiah mual inkhawmna benglut takte pawh an nei. Hun lo kal zelah hei hi kan Territory-a thalai rawngbawlna bul tan nan pawm a lo ni ta hial a. TSAY General Council vawi 8 leh 9-na chuan ngun taka a ngaihtuah hnuin India Eastern Territory-a SAY-te hman vek turin October ni 8 chu Raising Day atan a pawm a, tun thlengin he ni hi hmanzui a lo ni ta a ni. Raising Day pual hian vantlang tana rawngbawlna leh mite tana luanchhuahnate neih thin a ni. Tichuan, India Eastern Territory-a Salvation Army Youth Raising Day atan October ni 8 chu tun thlengin serh a lo ni ta a, kum 2014 khan Diamond Jubilee pawh ropui taka lawm a ni.

He Thalai Khawmpui hi Aizawl lamah October ni 16-18, 1954 chhung khan chhunzawm leh a ni a. A vawikhatna atan Thiamthil Entirsiakna Thalaite'n an nei a, Corps 47 atangin an thilsiam entir thalai 556 zet an awm. Chungte chu Violin te, guiter te, khuang te, thil phiar lam te, thil thui mawi te, puantah lam thil te, S.A.Uniform lukhum te, lallukhum leh thildang tam tak a ni. Mizo District Deputy Commissioner Mr. K.G.R.Iyar I.A.S. chu Entirsiakna hawngtu a ni a, Bawrhsap chuan, 'Hetianga thalaite hmasawnna leh thatna tura in beihna kawngah ka tanpui theihna kawngah chuan tanpui che u ka lawm em em ang', a ti hial a ni.

Bazar Corps Biakin-ah palai lenglo khawpin Y.P. Council vawi-3 na neih chhunzawm a ni a, TYPS-in ho zelin thiltih benglut tak takte a awm. D.C. nupui Mrs. Bigadier Merry hnen atangin Pathian thuchah ngaihthlak a ni. Inkhawmna hnuhnung berah hian - August 10-23, 1950 a International Salvationist Youth Congress, London-a neih film chu chhuah a ni a, Biakin lenglo khawpin mipuiin an thlir a. Band rualte, thil ropui tak tak relte, in chhawng sangte chu mipuite'n hmuhnawm an ti em em a, General Albert Osborne-a screen-ah ban vaia lo langte chu an mitthla-ah a cham ta reng a ni.

[Hetih hunlaia Salvation Army Thalaite hlimthla

1955 Sipai Tlangau-a hmuh theih chhun a ni]

2. 1961 - Saitual

Kum 1961 khan Saitual-ah vek Thalai Khawmpui lian a awm leh a, Youth Camp tia hriat a ni a, Pathian Thu leh Hlaa inpawlkhawmna bakah Sports lama inelna hun hlimawm tak hman a ni.

[1961 Thalai Khawmpui Mual Inkhawm thlalak]

3. 1968 - RM.Hall Bazar Corps

Bazar Corps-ah Local Officer Council April 4-7 chhungin neih a ni a, Corps/Societies 22 atangin Local Officer 50 zet an kalkhawm tih Sipai Tlangau June 1968 issue-ah report a ni a, April ni 6 bik hi Thalai puala hun hman a ni a, April ni 7 Thianghlimna Inkhawm-ah phei chuan Biakin ah an lenglo hial a ni. Hemi tum hian Local Officer kum 10 chhung chawl lova rawngbawlte hnenah chawimawina hlan a ni nghe nghe a ni. Hemi kuma Thupui hi 'Krista nen hma lamah' tih a ni.

Hemi kum vek September thlaah khan Hyderabad-ah All India Youth Camp neih a ni a, Seventh Day School ah an camp. Hetah hian Lushai hills Division aiawhin Mizo thalaite, Central Corps atangin Remlalnghaka leh H. Zadawla, Bazar Corps atangin, Lalramthanga, J.H.Thangliana, Ramfangzauva leh V.L.Hruaia, leh Calcutta a lehkha zir lai - Lily Vaikhuma, Th. Vanlalreia leh Ramhluni te pawh an kal ve a ni.

4. 1971 - Bazar Corps, Dawrpui, Aizawl.

11-14 March 1971 chhung hian Thalai Khawmpui 'Krista chu vawin atan kawng a ni' tih thupui hmangin Major Chianghnuna TY Secretary anih laiin Aizawl Bazar Corps-ah neih a ni a, Chawlhniah Central Corps-ah inkhawmna neih a ni a, Chawlhni chawhnu hian kawng an zawh nghal a ni. S.A. Centenary kawngzawh film lo en tawhte anni bawk a, mumal taka inremin kawng hi zawh a ni. Thalai bik palai inziaklut hi 361 an ni a, curfew avangin inlawmna inkhawm pawh tlai Dar.4.00 pm ah an nei a, chhimtute nen mipui 1000 chuang an kalkhawm a ni. [Source - Sipai Tlangau May 1971 issue]

Thalai pual liau liaua inkhawmpui buatsaih kum 1961 hnuah, hmun hrang hrangah Thalai khawmpui ruahmanna awm mahse rambuai avangin puitlin theih a ni lo a, kum 10 hnuah he hun hi an hmang thei ta chauh a ni. He thalai inkhawmpui hnu lawk April 14, 1971 atang hian thalai pawl chu TGM (Torchbearer Group Movement) tih hming a lo pu ta a ni.

A hnuaia link-ah hian TGM Dan Bu, Bazar Corps TGM te buatsaih chu a entheih e.

TGM Dan Bu 1971

5. 1973 - Central Corps, Kulikawn, Aizawl.

Ni 30 November - 2 December, 1973 khan Central Corps ah Thu leh Hla lama intihsiakna neih a ni a, hemi tum hian Bazar Corps TGM te Pakhatna an ni a, Central Corps TGM Pahnihna niin, Chaltlang Corps TGM te'n Pathumna an hauh a ni.

6. 1974 - Kolasib

1974 TGM Council atana circular hmuhlet theih-in a tarlan danin October 23, 1974 hi Council Board Memberte thlenkim ni niin, an ni hian programme leh a tuldangte an rel fel a. Commanding Officer, TGM Leader, TGM Secretary leh midang pakhat Corps tin atanga ruatte chu Council Board Member an ni. Section Centre 3-ah inthenin, Bazar Corps Centre hnuaiah Zemabawk, Chaltlang, Bethlehem, Central leh Tachhip Corps-te an tel a. Kepran Corps Centre hnuaiah Khawruhlian, Khawlian, Darlawn, Ratu leh Zohmun Corps-te an tel a. Thingdawl Corps Centre hnuaiah Kawnpui, Bukpui, Hlimen, Diakkawn, Kolsib, Bilkhawthlir leh Vairengte Corps-te an tel thung a ni.

October 24 zan, Inlawmna Inkhawmah hian Corps tin in TGM Report an pe a, October 25, Inrinni ah Zaipawl intihsiakna leh Thu lama intihsiakna an nei thung. Inrinni zan leh Chawlhni nilengin 'Chhandamna Campaign' neih a ni a, Pathianni Zan-ah Lawmman semna leh Campaign tawpna hun hman a ni.

Hla pahnih - 'Kan Pathian hmangaihna thukzia' leh 'Lalpa thlipui a tleh chiam a' te hi Zaipawl intihsiakna hla a ni a, Malzai intihsiakna 'Nangmah min hmangaih tir ang che' tih hla hmanga neih a ni bawk. Thu insawisiakna, minute 8 zel, 'Thalaiten engtinnge Pathian ram an zauh theih ang', tih hmangin a awm bawk a ni.

7. 1975 - Kolasib

Kum 1975 (October thla) khan Kolasib Corps-ah Thalai Khawmpui neih a ni a, Kolasib khawpui chhungah Hriatpuina Kawngzawh neih a niin - Hmarveng atanga Diakkawn thleng zawh a ni. An rorel tam tak zingah 'Salvation Army Hlabu hi Tonic Solfa in dah ni rawh se', tih chu pass tel a ni.

Kum 1976 khan an resolution bawhzui hian Officer Training Garrison building hluiah Pu K.K. Ramthanga (PG) kaihhruaina hnuaiah Aizawl Bazar Corps atangin - Pu V.L.Hruaia, Pu Dawngliana, Pu F.Sangkhuma leh Ramhlun Corps atangin Pu Lalthakima (PG) leh Pu L.Sanglura te'n Hlabu hmanmek Tonic Solfa-a dah turin ngawrh takin an bei a, an project erawh puitlin a ni ta lo hlauh thung.

8. 1976 - Bazar Corps, Dawrpui, Aizawl.

Mizoram Hmar Bial Divisional Torch Bearer Group Movement Councils tih a ni a, 30th September-ah tanin 3rd October 1976 thleng a awh a ni.

Major Saidawla, Div.Youth Officer in November 1976 Sipai Tlangau Bu-ah report hetiang hian a ziak:

Council thlengtu Bazar Corps chuan Rust Memorial Hall chu mawi tak leh fai takin an lo buatsaih diam a. Mi sangkhat aia tam len theihna turin an lo zauh duai bawk a. Inkhawmna a lo kal zawng zawngte chhiar theih turin, beihrual thupui, 'I Rinna chu Sem Chhuak Rawh' tih chu mawi taka ziakin an tar kulh mai a. Kan Council thupui, 'Isua Krista Khawvel entu' tih pawh ziak lian pui puin tar a ni bawk a.

September ni 30 zan a lo thlen chuan, Thalai rual uniform var nalh taka inthuamte leh thian dangte chuan Biakin chu an rawn tikhat ta hmur mai a. Kan Divisional Commander chuan, kan TGM Council Pathian ropui nan leh A ram zau nan a hawng ta a. Bazar Corps Band palaite lawm tura hun rei tak atanga lo inpeih reng tawhte chuan an han tum ta a. Kutkhuang rualte chuan a malsawmtu ni awm takin an lo thing siau siau bawk a, a tel ve tan chuan, Hlimna hi kan chanvo a ni ber mai e. Pathian Thlarauvin kan hnenah hian a thawk tan ta, a ropuina puang chhuak turin kan council chu a hmang tan tih a lo lang ta a.

October ni 1-3 chhungte hi intihsiakna hunin kan hmang khat a. Hla 3 'Lalpa I thu hi a hlu ber' tih te, 'Enrawh chhum zingah a lo kal', tih leh Mipa zaina (Male Voice), 'Krista'n a Sipai raltu min ho', tihte an ni. Hla lamah thalaite'n hma an sawn nasa tih intihsiakna beitute atangin a hriat theih a. Minute 5 thu in sawi siakna a awm a, 'Tunlai khawvel thangzela T.G.M. ten kan eng tihlan dan tur', tih thupui hmanga an sawite chuan kan thalaite chhawrnahawmzia a tilang chiang hle a ni. Kan hma lam beiseina an tisang em em a, SA puanzar leh TGM puanzar in siamsiakna a an thilsiamte han en chuan, America siam kan ngai bik hauh lo mai le. [Major Sawichhunga chuan, 'Sapramah thawn ila, an lo zir ve ah a tha ang', a ti hial a ni.] Rome lehkha thawn atanga zawhna hrang hrang 25 an chhangte chu, Bible an lo kawm ngunzia tilangtu a ni a, Pathian thu hi chawtui takah lo nei tu thalai kan nei chu kan lawmna a ni.

Zan lamah 'Hriatpuina Kawngzawh' Meichher nen mipui 12,000 zet mai chuan Bazar atanga Kulikawn thlengin neih anih thu tarlan a ni bawk. Krista khawvel Entu a ni a, chumi eng neitute kan ni tih entirin Meichher chhi chunga an kawng zawh chu thilmakte zinga chhiar tel theih hial a ni. Aizawl khawpui a phawklek a ni ber mai, thenkhatin, 'Krista lokal lehna a thleng ta hial emaw ka ti a', ti tawk an awm hial a ni.

Chaltlang Corps T.G.M. te hlaphuah siakah leh Bible intihsiaknaah pawh an tel. FLAG siam inelna pawh neih a ni a, August ni 29, 1976-a Chaltlang T.G.M. Council Minute-a a lan danin - Pu Ralzadanga (Pu Lalruatkima pa) leh Pu P.K.Handique (Lieut.Sarah Lalnunpuii pa) te kutah Flag siam hi dahin, Province huap Youth Congress-ah hian lawmman Pakhatna lak a ni nghe nghe a, he FLAG hi tunthlengin kawlthat a la ni.

[He TGM Flag hi Salvation Army Lushai Hills Division te

Flag insiamsiak a pakhatna hauhtu a ni. Tunthleng hian dahthat a la ni]

9. 1977 - Diamond Jubilee lawmna

10. 1978 - Bazar Corps, Dawrpui, Aizawl.

11. 1979 - Khawzawl

12. 1981 - Rust Memorial Hall, Bazar Corps

Command Headquarters, Calcutta hnuaia kan awmlai khan Youthquest International Crusade hawnna turin Youth Congress, Rust Memorial Hall, Aizawl-ah 10-14 January, 1981 chhung neih a ni a. Cadet commissioning neih nghal anih avangin Programme bu pawh kaihkawp a ni. Hemi Youth Congress neih tur chungchanga circular-ah chuan TGM tih thin chu December 31, 1980-ah a tawp ta a, Thalai pawl hming thar atan 'THE YOUNG CRUSADERS' (Saitual Corps atanga rawtna rawn lut) tih thlan a ni a, a lamtawiin T.Y.C. tih a ni a, January ni 1, 1981 atangin he hming thar hi a pu a, Youth Congress-ah inkaihhruaina bu thar pawh tihchhuah nghal a ni. The Young Crusaders ah hian kohhran dang atang pawhin member nih theih a ni a, kohhran dang atanga TYC member-a rawn inpe awmhlen zui ta pawh an awm nual a ni.

Kum 1981 ah vek hian 'The Young crusaders Khawmpui' Rust Memorial Hall-ah vek hian 8-11 October chhung khan 'Alive in Christ' tih thupui hmangin neih leh a ni.

13. 1983 - Lunglei Corps, Citadel, Lunglei.

Bus - 3nos., TMB - 3 nos., Taxi - 2 nos. hmangin Aizawl atangin Young Crusaders member 604, Official delegate 4 leh chhimtute an kal a, 14-16 October, 1983 chhung hian Youth Congress hlimawm tak hman a ni. Sports lama inelnate neih a ni a, hrilh lawk an nih tawk angin khawmpui palaite hian 'Chanchintha hrilna tur' atana thawhlawm an kenkhawm Rs.8600.00 chu, thalaite aiawhin Captain Lalkiamlova TYS in Territorial Commander Commissioner Manam Samuel hnenah a hlan a ni. Congress Thupui hi Marka 16:15 a ni a, Band, Zaipawl leh Dabate ngaihnawm leh benglut tak items te neih a ni. October ni 15 Inrinni in Citadel biakin hawn nghal a ni.

[Palai thenkhat khawmpui kal tur. Photo courtesy - Pu Joseph Vaikhuma]

14. 1984 - Lamka Corps, Manipur

Thalai Khawmpui - Inlawmna inkhawm 26th October 1984-ah neih a ni a, Inlawmna Inkhawmah hian Mipa Naupang 80 puanzar chi hrang hrang puin, 'Lalpa tana dotu sipaite kan ni' tiin Sipai Pawl hnathawh mekna ram 80 an rawn entir a. Lamka Corps Cadet Hmeichhe Naupang 7 in 'Inlawmna Lam' an entir bawk a ni. Mualngat leh Bethel Society naupangte'n action song an nei a, Ramhlun Corps, Aizawl thalaite'n 'Pathian hmangaihna ropuizia' hla mawi takin an sa bawk a ni. Khawmpuiah hian palai 1034 an tel a, zaikhawm a nuam em em a, vawi li/vawi nga nawnin, 'Kalvari Disco' a lamin Hriatpuina nung tak tak ngaihthlak a ni.

Bible chang sawia inelna, mal zai, Group Singing, Duet leh Band & Timbrel hmanga intihsiakna te pawh neih a ni. Lamka Hall atanga Eden Street thleng Hriatpuina Kawngzawh neih a ni a, CTS kawtzawlah 'Haleluiah' tia au rualin tihtawp a ni. 28th October, 1984 thleng a awh a ni.

15. 1988 - Aizawl Temple Corps, Tuikual, Aizawl.

11-13 March 1988 chhung hian Youth Congress Aizawl Temple Corps-ah Regional Headquarters, Aizawl bultumin nghah a ni a, thupui chu 'Krista tana Nungin' tih a ni. Youth Congress hawnna hi A.R. Ground-ah March Pass neiin, Khawvel puma Sipai Pawl rawngbawlna ram 86 amite incheina nen thalaite an inlan a, salute hi Territorial Commander Commissioner Manam Samuela'n a lo chhanglet a ni. Palai 1800 bawr he khawmpuiah hian an kalkhawm a, TYS Captain Lalngaihawmi hunlai a ni. Inrinni zan hian Vanapa Hall-ah Musical Night hun hman a ni bawk.

16. 1991 - Saitual

India Eastern Command nih hnua Youth Congress hmasaber chu Saitual Corps-ah ni 3-6 October 1991 chhunga neih a ni. Officer Commanding Colonel Gnanadas te nupa kaihhruaina hnuaiah Captain Vanlalthanga CYS hovin hun tha tak hman a ni, North East India-a state panga - Mizoram, Manipur, Assam, Tripura leh Sikkim-a Corps leh Societies 105 atangin palai 1800 zet fuankhawmin, chhimtute nen inkhawm apiangin mi 2500-3000 an kalkhawm thin a ni.

Speaker 9 hnen atangin thuchah pawimawh tak tak ngaihthlak a ni a, AIDS natna chungchanga inzirtirna hun Fellowship inkhawmah neih tel a ni. Zaipawl item 23 a awm a; Aizawl Temple Corps, Zemabawk Corps, Saitual Corps leh Lunglei Citadel Band & Timbrel atangin Band item benglut tak tum engemawzat ngaihthlak a ni.

17. 1994 - Kolasib (Tumpui field)

India Eastern Territory nih hnua Youth Congress hmasaber Kolasib (Tumpui Field) ah 7-9 October, 1994 neih a ni. Chaltlang Corps Young Crusaders te chuan a bu-a siam tham zaipawl sak mi hla an lo khawlkhawm ta der mai. Youth Congress-a hralh tur hian ‘Fak Hla min pe’ tih hlabu, hla 54 awmna chu buatsaih a ni a, Youth Congress-ah hian Hlabu Rs.15/- man hi zawrhchhuah a ni. Kum 1994 Youth Congress Palai rorel inkhawm October 7 a neihah hian Young Crusaders tih chu Salvation Army Youth tia thlak a lo ni ta.

A hnuaia link-ah hian Youth Congress 1994 Programme kimchang a entheih e.

1994 Youth Congress Programme

18. 1997 - AR Lammual, Aizawl.

Ni 16-19, October, 1997-ah A.R. Lammualah Territorial Congress neih a ni.

19. 2000 - Mizo High School Field, Aizawl.

General & Mrs. John Gowans-a te nen Ni 12-16 October, 2000 chhung khan Millennium Congress High School Field-ah neih a ni.

20. 2002 - Lunglei (Playground No. 2)

26-28 April, 2002 chhungin Lunglei Playground No.2-ah Youth Congress neih a ni a, tuipuiral atanga lokal Captain Basil Meinjeis chu Speaker atan hman a ni.

21. 2005 - Kolasib ( Tumpui Field), Western Division

11-16 October, 2005

22. 2008 - Chaltlang Field, Aizawl

31st October - 2nd November 2008 chhungin Chaltlang Field-ah neih a ni.

23. 2011 - Thenzawl

Ni 4 - 6 November, 2011 chhungin Thenzawl-ah Youth Congress neih a ni.

24. 2014 - Joint YMA Field, Vaivakawn, Aizawl.

8-12, October, 2014 chhung hian Vaivakawn Joint YMA Field-ah Territorial Youth Congress hman a ni. 1954 atangin kum 60 na kum chiah a ni a, Diamond Jubilee lawmna hun ropui tak neih nghal a ni.