Self Denial Week

Irish mi John Aiken Carleton-a chuan, a farnu a tihlawm duh vang chauhvin Salvation Army Inkhawmnaah a tel ve a, Salvation Army te'n Ireland rama beihrual an neih tantirh lai a ni. Chumi tuma an inkhawm bang chu a beidawng hle a; Salvation Army leh an Hmeichhe thuhriltute chungah a beidawng a ni lova, ama awmdanah a ni zawk. A inkhawm tumhnihnaah phei chuan amah ngei chu thlarau lama engmah ni lo, misual - thiamloh chang a nih thu a sawi chhuak ta hial.

A lehkhathiamna leh a dinhmun duhawm tak atanga a han thlirin, thlaraubote zawng tura hmeichhe thuhriltu tluk pawh-a a thahnem lo chu a insit ta em em mai a, a Lalpa tan thil engemaw tal tihsak a lo tum ta a ni. In lama a haw chuan, a nupui hnenah a ngaihdan thar danglam tak chu a hrilh ta a, a ni pawh a lo lawm hle mai. Tichuan, 'The Salvation Army' chu an khuaa din ngei an lo tum ta a. Chu chu 1880 kum daih tawh kha a ni.

"Hmeichhe thuhriltute ka ngai thei lo, Salvation Army ka ten, an inkhawmnaa tel hote pawh hi mi a pui pui vek an ni", tia a sawi hnu kum reiloteah Salvation Army chu a lo vuan ve ta a ni. Major John Carleton-a chanchin langsar tak mai chu, kum khat chhunga nitin a 'PUDDING' eina man ai a khawl khawm, Shilling 50 General William Booth-a hnena a pek chungchang hi a ni. Music lamah pawh a duai lo hle a, Salvation Army International Music Board-a Chairman hmasaber niin, a lawina Penge Corps-ah kum 28 chhung Songster Leader a ni bawk.

Kum 1886 August thla khan William Booth-a chuan London Exeter Hall-ah challenge a siam a, Salvation Army-in khawvel hmun hrang hranga a rawngbawlna a tihdarh-zau zel theih na'n thlawp tura ngenna a ni. Carleton-a chuan mipui tam tak zinga mi hausa zawkte thutiam chu a tluk thei dawn lo tih inhria in, Pudding ei bânsan a tiam ta a, “Kum khat chhung nitin pudding tel lova ka awm hian shilling 50 ka humhim thei tih ka chhut a. Hei hi ka ti ang, tun apangin ka tan nghal ang", tiin lehkha eng 'canaries' - intiamna ah chuan ziakin a thehlut a.

William Booth-a chuan Carleton-a thutiam chu mipui pungkhawm hmaah a chhiar a, “Hetah hian ruahmanna tha tak a awm a ni,” tiin a sawi zui a, "kan mite chu kumpui linglet pudding tel lova inhrek tûrin kan ngen tûr a ni lo na-in, reilote tal inphat tûra kan ngen loh chhan tûr ka hmu lo. Kar khat chhung tal - nitin inthuruala inphatin, kan sum hmuhchhuah chu kan hnathawhna atan lakkhawm a ni ang," tiin.

Commissioner John Carleton-a ngaihdan hrul-ah General William Booth-a chuan, kum 1886 khan "Self-Denial Week" (Mahni Inphat Hapta) a tan chhuak ta. General William Booth-a khan Salvationist-te chu khawvel hnena Pathian Hmangaihna hlan tura mahni inphat-a inhlan turin a sawm a ni. Hemi hnu rei vak lovah United Kingdom tan chauh "Self Denial Week" hmasa ber puan a ni a, chutah chuan 4,820 pounds (Dollar tlukpui $24,000) lai a lut a, pawisa nawi te te tlingkhawm a ni. Tichuan, khawvel hmun hrang hranga Salvation Army awmna apiangah kum tin neih a ni chhunzawm ta zel a.

Kan khawvêl retheihna laka chhandam tura ṭanpuina - Krista pawm zawng tak, "Self-Denial Week" (Mahni Inphat Hapta) aia tha siam chhuah a la ni ngai lo. Kumin hmalaknaah hian tun hmaa kan lo thawh aia nasa in kan thawk tur a ni. I chanvo i hlen dawn lo’m ni?

Mi chi tinreng an tel thin. Sumdawng hausate chuan kar khat chhung zet first class coach ai-ah third class ticket la in an zin a; meizu tam tak chuan zuk leh hmuam an bânsan phah a, naupangte chuan an tihtheih tawk hna an thawk a; William Booth ngei pawhin ei leh in tlem zawk a ei thin. Heng a hlawkna zawng zawng hi Self Denial fund-ah a lut ta a ni.

The Salvation Army hnathawhna ram 133-ah Salvationist leh The Salvation Army rawngbawlna thlawptu zawng zawngte chuan, kumtin "Self Denial Week"-a tel theihna hun remchang kan lo nei ta. Kumina Mahni Inphat Hapta (Self Denial Week) hun kan lo thlen leh hian he thu chhiartu leh Self Denial Beihrual hmang zawng zawngte'n thlarau lamah hlawkna in hmuh ka beiseiin ka duhsak che u a ni e.

-Jean Ralte [20.09.2022]

Muktifauj - 141th Anniversary

Hmanlai atang tawhin India ram hian runtu chi hrang hrang a lo tawng tawh a : Persian, Greek, Parthians, Bactrians, Synthians, Huns, Turks, Arab leh European hnam hrang hrangte pawh. Amaherawhchu 19 September, 1882 a inrunna ang reng reng hi a la hmelhriat ngailo. Sipai-rual mi pali chauh : Major Frederick de Latour Tucker, Captain Henry Bullard, Lieutenants Arthur Norman leh Mary Ann Thompson-te, P & O SS Ancona lawnglian-a lo thlengte chu. Sipai rual runtu a lo hmachhawn tawhte zawng zawng khan awpbeh tumin an bei thin a, tun tuma Sipaite erawh chu India rawngbawlsak tura lo thawk an ni tlat thung. Saptawng leh Vaitawng chanchinbu chuan 'India ram run turin The Salvation Army a lo thawk!', tiin an chhuah tlat lawi si.

India rama thuneitute hian Salvation Army-in sipai tawngkam a hmante hrethiamlo in, sipai-rual chak tak buaina nasa tak rawn thlentu tur anga lo hmachhawnin, Bombay lawngchawlhna, Gateway of India kiang lawka awm Apollo Bunder-ah chuan Bombay police tam tak nen alo inralring ran a. Mi pali te tuipui atanga vaukam an lo thlen chuan, police hotupa chuan, 'Engtikahnge in pawlte an lo thlen ang?', a lo ti hau-mai a. Chutah Major Tucker-a chuan, 'Heti zawng hi kan ni e', a han tih chuan, police officer chuan mak ti tak maiin, 'Sipai 1000 rual kan lo beisei che u asin!', a lo ti hem mai.

Major Tucker-a khan chakna chu tam lamin a hrillo tih a hrechiang em em a, Bombay khawpui lun lai tak chu thlarau zangkhai takin a pawlte nen chuan an zawh tan ta. Amahin Army Flag - Catherine Booth-i'n India ram tana a pek chu a pu a, Captain Bullard-a'n cornet kengin a zui a, Lieutenant Norman-a khuang vua leh Lieutenant Mary Thompson-i kutkhuang khawng rite'n an zui bawk a. An tum ang ngeiin mi mit pawh an la zar mai. British mi inchhuang tak leh mi chunga lengte chutiang tak chuan India kawtthlerah hmuh an ni ngai miau lo a. An rimawi tihrik chu thudang ni se, an inthuamna mawlh mai chu a danglam a ni. Vaiho tihdanin mipa zawngin puanin an lu an tuam a, ribbon senah Muftifauj (The Salvation Army) tih a inziak kalh mai a, India puithiamte inthuamna kawrfual eng, an kekawr var chungah an ha bawk a. An nula huaisen Mary Thompson pawhin sari ang deuhvin kawr eng-fual ha-in lukhum-a ribbon sen awm a khim bawk a, an zavaiin boot an bun theuh a ni.

Khuang leh trumpet kenga kawngzawh te chu Bombay-ah chuan mi hmuh than a ni. Kawngpuiah - inneih, in-vui leh sakhaw thila kawngzawhtute chu nitin hmuh tur an awm a, eng teh-ualah an ngai lo. Mite mak tih zawk chu vun-ngo takte thuamhnaw rawn inbel chu a ni. Tucker-a khan mite mit lak a tum ber lo ni ta se, a hlawhtling chiang khawp mai, amaherawhchu an uniform chuan tum pawimawh zawk a nei tlat. India rama an sakhaw puithiamte inthuamna rawng 'eng' vat mai chu India mipuite'n Salvation Army thawktute an hriatbelna atana buatsaih chu a tum bulpui ber a ni thung.

The Salvation Army Hmuchhuaktu General William Booth-a'n, India ram run tura a tirhchhuah dawn khan, hetiang hian a fuih a, "Zirtirte ang khan Lalpa hnena in hruai thlen theih nan mi zawng zawng tan engkim in ni tur a ni. Chumi awmzia chu India mite hnenah chuan India mi diktak in ni tur a ni.', tiin. An thusawi an ngaihthlak theih nan an inthuamna an inbel a, an chunga rinna an nghah theih nan an nunphung an tawmpui a, an thlarau chhandam turin theihtawp an chhuah a ni. Chhandam tawhte pawh midangte chhandam an nih theihna tura thawk zui turin an zirtir zel a. Zirtir siam hi chhandamna chang tawhte hna pawimawh ber a ni reng a, Chhandam tura Chhandamte chuan hmalam an pan zel a ni.

India ram run tura an hmahruaitu Major Booth Tucker-a (Fakir Singh tih hming pek tak) hi a hming tak chu Frederick St. George de Lautour Tucker a ni a. India ram Bihar State-a Monghyr khuaah March 21, 1853 khan a lo piang a, sikul kai rual anihin England-ah thawn let a ni a, a zirchhuah hnu hian India ramah lo let lehin, Indian Civil Service (Tunlaia Indian Administrative Service (IAS) lo ni ta)-ah a inziak tling a. Kum hnih chhung training a neih lai; kum 1875 khan Evangelist ropui D.L.Moody-a leh Sankey-a te Gospel Campaign England-ah a tawngfuh hlauh a, piantharna changin Pathian rawngbawl duhna a nei a. A hna zawma India ram a let leh hnu pawh hian a hunawlah thahnemngai takin India mi hnuaihnungte zingah Chanchintha hril hna a thawk thin a, an hotute zilhna pawh tam tak a tawng hial a ni. India rama tawng chi hrang hrang a thiam-bel tha em em a, Hindi-in a ngaihtuah thin tih hial a ni. Tawngdang thiam lamah hian talent tha tak a nei hrim hrim bawk a ni. 

Ralkhat atangin William Booth-a rawngbawlna chanchin a lo hre thin a, tanpuina pawisa a thawn ve a, a pawisa pekna receipt rual chuan War Cry 1880 Krismas puala buatsaih chu an rawn thawn tel a. Chuta William Booth-a thuziak chuan a hneh ta em em mai a, The Salvation Army zawm turin England lam a pan leh ta a ni. Fiahna tam tak a paltlang hnuin a chhungte phallo chung leh a rokhawm turte kalsan vekin Officer atan a inpe ve ta a, engemawchen a thawh hnuin India rama kal turin buatsaih an ni leh ta a ni. ICS-ah khan kumkhat chhungin Pound 450-a tanin a kaisan zelah Pound 1000 thleng hlawh a, retire hnu pawha nuamsa taka awm thei a ni a, India rama bul tanna atan hian thawhlawm chi hrang hrang khawn anih hnuah Pound 100 lawngin bul an tan thei chauh a ni.      

Tichuan, Khedwadi, Bombay Province-ah inluah hawhin bul an tan ta. A tir phat atang hian thuneitu mingo vekte atangin dodalna nasa tak an hmachhawn a ngai a, lungin bang pawh an zut fo a ni. Tum khat phei chu Obelisk kawng pengthuama kawng an zawh laiin, Police Deputy Commissioner hovin an lo dang a, DSP chuan 'England lalber aiawha India awptu Viceroy hmingin kal-darh nghal turin thu ka pe a che u', a rawn ti a. Major Tucker-a chuan, 'Lalberte Lalber, Lalpa hmingin kawng min kian turin thu ka pe a che!', tiin a lo chhang let ve thung a ni. Major Tucker-a dan hremi a lo nih bakah tanpuitu tha tak tak pekin an awm zel a, a tawpah phei chuan zalen takin muallai rawngbawlna an kalpui thei ta a, pawl-dang missionary-te tan pawh malsawmna a lo ni ta zel a ni. 

India rama missionary lo awm tawhte anglo takin, heng Muktifauj missionary officer-te hian an rawngbawlsaka te zawl tawk zela khawsain, an retheihna tawmpuia an thawh avang hian an chanchin pawh a thang chak hle a. Hmunkhat chauh thlurbing lovin, an daidarh zau hle mai a, nilenga khawlai rawngbawlna leh kawngzawha hun an hman hnuah War Cry chanchin-phek India tawng chi-thum in an buatsaih leh a, chung semdarh chu tulin an hre si a. Rawngbawlna tur sum leh pai awmsa a awmlo bawk nen, an kalna apiangah chaw khawn chawpin, mutbu nei lovin a rem remah an riak mai zel a ni.

 

Gujarat State-a Atmapur  khua-ah phei chuan Fakir Singh-a Tengtere hlim hnuaia a mut thinna chu Muktifauj Heritage pawimawh tak niin, Western Territory te'n an humhalh a, a bulah Biakin an sa mek a, Tengtere kung pawh hi tunthlengin a la hmuh theih. A thuhril zo tlaia a lo haw chu he Tengtere kung (tamarind tree) hnuaiah hian ke thi phungin a hahchawl thin a. "Chhun lamah a ka-in chanchintha a hril a, zan lamah a ke hliamin" tih tawngkam a lo chhuah phah ta a ni.  Fakir Singh-a ke thi phung chu kawnga kalte chuan an hmu a, an en a, an chek tlawk tlawk a, an kalsan leh mai thin. Mahse, chu ke chau tak, chhun lama ke-lawnga thui tak kal tih hriat reng mai chuan a hmutute thinlungah thu a sawi zui tlat thin. 

  

Tichuan, an hmabak rawngbawlna hlenchhuak zelin, hnam hnufual zawkte chawikan mai bakah, hnam sual siamthat hna thawh kawngah pawh sorkar rin kaiin mi tam tak nunah danglamna an thlen zel a. India mi an chher tharte officer-ah siamin, thawktute pawh an rawn luh belh zel a, India ram dung leh vang-ah an inzar pharh ta a ni. Entawntlaka an awm avangin a-ram-mi huaisen leh ralhrat, eng hrehawmna mahin a tihhnual theihlohte an lo chhuak ve zel a, Ceylon (Sri Lanka) thlengin ramri zauh a ni a, India Independent hnu pawhin ram thendarh Pakistan leh Bangladesh-ah te The Salvation Army chu nghet takin a ding ta zel a ni. India rama Muktifauj dintu Commissioner lo ni ta - Booth Tucker-a, Fakir Singh hming lo pu ta pawh kum 1913 khan India rama chawimawina sang Kaisar-i-Hind tangkapui pek a lo ni ta hial a, 1920 khan The Salvation Army Chawimawina sangber Order of the Founder pek a ni bawk.

Kum 1982 khan India Centenary Bombay-ah lawm a ni a, chumi tuma Centenary Programme chu a hnuaia link-ah hian entheih a ni e-

SA Centenary Programme 1982

Muktifauj-in kum 141-na a lo thlen hian India ramah Territory 6 bakah Kolkotta-ah National Secretariat neiin hmun hrang hrangah zirna in Primary atanga College thleng a awm ta. Mipa leh Hmeichhia awmtha duhlo enkawlna, hnuchham enkawlna, phar enkawlna hmun, mitdel leh bengngawng sikul, Hospital bakah Nurse zirna hmun a awm ta fur mai. Territory tinah officer training college, khawtlang hamthatna tura thawhna hmun, humsual daite enkawlna hmunte, kum-upate enkawlna, mahni ke-a ding tura buatsaihna hmunte siam a ni.

[A hnuaia video hi lo thlir ve ngei ang che]

Mi hrat-khawkheng mi pali chauhvin bul an tan chu, a hnuaia mi ang hi India rama Muktifauj dinhmun a lo ni ta [Year Book 2023]:

Frederick Booth Tucker-a hi Rimawi lamah pawh a lo duailo hle mai. Hmuchhuaktu hla 'Mei tir la' tih thluk hi a siam a ni a, a thluk hmingah 'Tucker' tih a ni. Hla tha tak mai min hnutchhiah bawk a, a hla phuah hian a inpekna a pholang tha hle mai, Muktifauj kum 141-na Anniversary  kan lo thlen hian, kan inhlantharna lo ni ve se a va duhawm dawn em....

1. I bring thee, dear Jesus, my all,
[Ka hlan che Isu, ka engkim]
Nor hold back from thee any part;
[I lakah zak-kep reng nei lovin]
Obedient to thy welcome call,
[I mi kohna duhawm chhangin]
I yield thee the whole of my heart.
[Thinlung hlanin, ka inpumpek]

Refrain:
O speak, O speak while before thee I pray!
[Chhang la, Tawngtaia ka dil lai che hian!]
And, O Lord, just what seemeth thee good
[Aw Lalpa, tha I tih ang zelin]
Reveal, and my heart shall obey.
[Min hriattir la, ka zawm theih nan]

2. Perverse, stubborn once was my will,
[Rilru hel, luhlul ka ni thin]
My feet ran in self-chosen ways;
[Ka duhna lamah ka tlan fo]
Thy pleasure henceforth to fulfil,
[Tunchin I duhzawng hlen turin]
I’ll spend all the rest of my days.
[Damchhung ni ka chhiar tan tawh ang]

3. The doubts that have darkened my soul,
[Rinhlelhna ka nun ti thimtu]
The shame and the fears that I hate,
[Ka duhloh zahna, hlauhna te]
O banish, and bid me be whole,
[Paihbo in, min siam pum lang'in]
A clean heart within me create!
[Thinlung tharin min thuam ang che!]

4. O give me a heart that is true,
[Thinlung dik tak min pe ang che]
Unspotted and pure in thy sight,
[I mithmuha thianghlim leh fel]
A love that would anything do,
[Hmangaihna eng pawh hmachhawn ngam]
A life given up to the fight!
[A tawp thleng a Do-chak nun tam!]

Source: The Song Book of the Salvation Army #762

Jean Ralte [19-09-20022]