Ka Beisei ISUA

Helna hi dawithiamna sual nen a inang reng a, Luhlulna hi suahsualna leh milem biakna ang a ni. (I Samuela 15:23 KJV)

Mi tam tak sualna tuipuia pilbo mai tur an awm, chhanchhuah an nih loh chuan thihna kut vawtin a man veleh hremhmun panin an herliam dawn; heng mite hian Nang leh Kei, leh Krista an ngai e...

 

He mi hi chhungpui Pa/Nu, Kristian chhungkua din tur a ni asin, nimahsela ngawl veina chuan a taksa eiral mekin, a kuta awm - khuanu laka a rochan duhawm, a chhungkua - bellei iangin a nek keh mek... an thawhchhuah chhunte a lei taksa khawl siam that nan dawitin thang chawkin a luangral; sima hawikir aiin chawl tui ningzu a dawm-kan leh hun tur a la nghakhlel fan zu nia...

Chunnu tel lova tlei-zolo rawlthar, a thawk a phita thiante nena chhum kaih ching, engin nge man bet tlat le? Kulchona alo thlen hma-loh chu a rui ninglo... chunnu leh zuapa chawnban vuana intuaitharin, sum tam tak senna damdawiin run a bel leh thin. Thlaa thlawk leh ta cheng, nun hlui ngaia kir a rel leh si... nunkawng dik kawhhmuhtu tur - Nang leh Kei, leh Krista a ngai e...

Kum engemawchen dawihlo bumin kawng ngil a hrut ta, mahse... kum tam dawi-ata a lo awm aleiah chhungril lam a lo tawih ta si... a lei taksa khawl thawmthat na'n rangka dar a luangral; parlai hun ngaiin a kiau riai e, inchhirin ban a chen ta maw??? Ngai thin mahse, hun liam ta te'n kir-leh-zai an rel si lo. A duhaisam pian nawn leha kawng dik chauh zawh chu thamral maia'n a pamhmai lua e... pachang taka mite kawng dik kawh hmuhtu tal anih theih nan...Nang leh Kei, leh Krista a ngai e...

Thufingte 23:29-35 KJV

Tute nge chungpik thin le?
Tute nge lungngai thin?
Tute nge inhau buai thin?
Tute nge thubuai nei thin?
Tute nge a chhan leh vang awm si lova hliam tuar thin?
Tute mit nge sen rem rum thin?

Zu hmuna tap tlat thin te,
Zu chi hrang hrang chawhpawlh thinte an ni.
Zu sen kak chu thlir reng suh,
No chhunga a phawn berh berha,
A luan thlak zaih zaih lai te chu a melh pawh melh suh.
A tawpah rul angin mi a chu a,
Rulngan ang maiin mi a chu thin.
I mit chuan thil mak pui pui a hmu zut zut ang a,
I ngaihtuahna a buai mup mup ang a, ni lo lovin i rak vak vak mai ang.
Ni e, tuipui chunga mu zal ang lek i ni ang a,
Lawng puanzarna chhipa mu zal ang chauh i ni mai ang.

"Min vua a, a na si lo,

Min vel a, na ka hre hek lo,

Engtikah nge ka lo harh ang a, a ngai bawka ka ruih leh ang?" i ti ang.

Heng mite pual hian a ni ngei ang, Israel Lal Hezekia chuan, tihian a lo ziak a….

AW Lalpa, miten heng hi an nunpui thin a; heng zawng zawngah hian ka thlarau nun pawh a awm a; Chuvangin, mi dinthar leh la, mi tinung leh ang che. Hrehawmna nasa tak ka lo tuar kha, thlamuanga ka awm theihna tur a lo ni si a; Chhiatna khur ata ka nun hi lainat takin mi chhanchhuak a, ka sual zawng zawng i hnung lamah i paih bo daih a. Seol-in lawmthu a hrilh thei lo che a, thihnain a fak thei hek lo che; Leilawta chhuk thlaten i thutak an beisei pha tawh hek lo.

Mi nungten an dam lai ngeiin an fak zawk ang che. Vawina ka fak che ang hian; Pa chuan a fate hnenah i thutak chu a hriattir tur a ni. 'Lalpa chu min chhandam turin a inring reng a; Kan dam chhungin Lalpa inah Tingtang nen fakna hla kan sa tawh ang', tiin.

 

[Eunice Lalngaihsaki]
 

[Diakkawn Pastor Bial Zaipawl]

 

 Ka beisei ISUA (All my HOPE)

David Crowder & Ed Cash

Mizo - Jean Ralte (26.06.2019)

 

Min chelh ka hria Chhandamtu'n

Thlarau thar min chan tir

Chhandamna lui dai kai in

Ka danglam ta, Mibo ka lo kir e

CHORUS:

Isua chauh ka beisei ang

Nunhlui an ral, ka lawm e

Ka sualte min ngaidamin

Thisenin min thlengfai

Lungin bang zut thin kei Misual

Phuar leh cheksawlh fo hi

Ngaihdam ka ni, ka zalen ta

Ka kir tawh lo'ng, nunhlui ka vui liam ta

Zai vawr ka nuam...

CHORUS

Eng emaw tak hian hringnun par thliakin

Thingthi in a sawp thin

Aw keipawh vawi hnih khat chu ka tawng ve ta

Lalpan min kai tho leh in

Nunkawng dik min zirtir ta si

I fak ang u...

CHORUS

Isua chauh ka beisei ang

Nunhlui an ral, ka lawm e

(Aw) Ka sualte min ngaidamin

(Aw A) Thisenin min thlengfai

Jean Ralte