Nghilhlohna Par - Ventea pualin

Engtiklai atang khan nge kan lo inkawmngeih em em a, nu hmunlo – pa hrangte kha phuarkhawma kan lo awm le? Pan lai, khawvel lungkhamna pawlh buai hma a ni ngei ang le. Kumkhat chhuak threthraw ang maia thukhat vua khan kan leng za thin. Khiangawilovin tar thlenga, tar chawmna in mawi ho turte khan thu kan thlung tak asin!

Tuan tul vangin tuanna tlang a lo dang a, thenna ram khawvelah kan inthen leh thin. Thansan ngai tam tak vui liamin, a then khiang awia chhungkua dinin kan hmanhlel a, nunhluite khan kir zai reng an rel silo.

Khuahmunloah awm thin mah ila khawvela kan cham chhung chuan intawnni a herchhuak leh ang tiin kan inhnem thin kha ania. Mahse...tunah chuan inhnemna tur a awm ta si lo. Vawikhat chauh tal chaw eiho tura ruahmanna kan siamte kha a thamral ta. Vente... i hmunruak hi tunge luah ta ang le?

Nula leh tlangval ang pawha in enlo, a thlum a al eiza, Bete-i te chhuatlai mawia kan riah tlar dul hunlaite kha mitthlain a chhuikir a - Baby Love, Dance Dance, Grease 1 leh 2, Vai Tarzan...video cassette kan neih kha chuan tlaivar kan huam mai thin anih kha le. Mart-i chow-artui-tomato kan pawlh nena chawhpawlh ngei khan kan hrawk a fahin kan tlai tlang thin asin! Sehhmeh dang reng kan ngailo, nihawichi chipin kan tlingtla mai thin. Midangte pawh khan telve an chak nain min chimloh khan kan hlim viau zel ani.

Ka awmbo chhunga Ventea te inbul hmawng hnuaia ziah thaikawibawm lo thlengte kha ka hrereng mai... Thian hmangaihna chelh dingtu a ni si a. Inkhelh thiam avanga eizawnna thar Vente-a’n a hmuh tuma, a training-na thuam kan sam zante kha o. Fiamthu nen kan hlim tlang teh e. Kan sirah ketlite-a thingpui thlit tur a phanloh chhung chu kan nui za thin.

Kohhran lamah lah a-lai-lum luahtu ang hrimin kan awmkhawmna tawh phawt chu a hulumlai ber a ni zel a, kan vela mite pawh kha an hlim ve phah viau turah kan ngai thin anih kha. Engkim mai phur takin kan hma-ho a, lungrualna nen kan tlingtla thin asin. Awmho kha kan khamlo thin teh e o… chhungte’n ‘kasam paida’ min lo play khum hlau chung chung khan zanrei kan thleng leh nge nge thin.

Mihring hneh rualloh tibuaitu che khan I lei taksa tawihral tir hial mahsela, chatuan daih I thlarau humhim saktu hnena tlu luta, khamlo tak leh theilo chung pawha, A rawng I bawlsaka chuan hlim taka kuangkuahin, A ramah a lo lawmlut ngei ang che tih hriatna hian, I kalsan tak I thiante hi min hnem tak zet a ni.

I ruang thlahnaa I hraichawiin I chungchang thu a sawite khan min tilawm takzet a, Siamtu duh ang ngeia thlah tha tak hnutchhiah theia malsawmna changtu ini hi kan lawmpui takzet che a ni. Van ropuina tem hmasa turin min liamsan ta a, minlo hmuak ngei ang lallukhum mawi sinin…kan lo thlen kim hunah chuan pan lai duhthusam aia tha changho in – tar lovin kan la cheng za ngei ang le…mangtha…

Jean Ralte