C̲o̲r̲p̲s̲ ̲C̲a̲d̲e̲t̲ ̲-̲ ̲N̲u̲n̲ ̲H̲r̲u̲a̲i̲t̲u̲

Salvation Army nih a nawm em em na pakhat chu kum laklawhte tana Corps Cadet kan nei hi a ni awm e. Mithiamte chhut danah chuan Adolescence period-ah hian kaihruaitu kan mamawh em em a, kan thil tawn leh hriatte hian thui taka kan nun a kawihher theih avangin, fimkhur taka kan nun kan hman a tul a ni. Mihring kan nihphungah pawh kan taksa awmdan inthlak danglam hunlai a ni a, chutiang bawkin kan ngaihtuahna pawh kan awmna mila chak taka a herkual hun a ni.

Kum 1896-a Junior Cadet tia din, February ni 10, 1898 atanga tunthlenga Corps Cadet tih hming lo pu ta, rawltharte kaihhruaina pawl hi Mizoram-ah 1929 khan dil theih a ni ve a. January 1930 atangin – Khualkungi (ka pi Major Khualzingi laizawn), Thanzami, Mungi, Lianchhungi, Di-a, Lalchuanga, Tawia, Senbawnga, Doliana leh Lalnghaki te chuan an chhang tan a ni. Centenary kumah hian India Eastern Territory-ah Corps Cadet 3500 chuang an lo awm ta, Badge of Merit dawng pawh kan tam ta hle mai, Centenary lawmnaa kan General kut atanga dawng kha mi 447 lai an ni.

Kum 2021 hian IET chhungah Corps Cadet zirlai 2960 an awm mek a, a hnuaiah hian Division/District dinhmun tarlan a ni:

Division/District    L.Grade     H.Grade

Central South         584         526

Central North         642         414

Northern                   95           94

Western                  158         197

Southern                 129          19

Eastern                     22           27

Tripura                      13          22

Himalayan                16            2

TOTAL                  1656        1301   

 

Kum 1954 khan Lalramzauvi d/o Lt.Col.K.Khara chu International Corps Cadet Congress palai a ni a, a ni hi Mizo zinga International level-a Corps Cadet Congress chhim awmchhun a la nih hmel. Kum 1971, 3-7 November khan Calcutta-ah Corps Cadet engemawzat Corps Cadet Congress palai niin an kal bawk a, an zingah hian Commissioner Lalngaihawmi Territorial Commander (2011-2017), Pu Vanlalnghaka CS Temple Corps, Pu Joseph Vaikhuma Territorial Envoy, Pu Daniel Chianghnuna CCG Temple Corps, Pu P.Lalthianghlima (PG), Pu R.Dawngliana Band Secy.(Rtd) Temple Corps, Pu M.Dawngliana ACSM Zemabawk Corps, Pi Vanlalmawii Tuikual South Corps, Pu Rozamlovi Sailo (ka nu) Chaltlang Corps, Pi Miriam Moss Australia te pawh an tel a ni.

Kum 12 ka tlin khan phur takin Corps Cadet dilna ka thehlut ve a, pawm ka nih hnuah phur takin thiante nen Corps Cadet class-ah kalin kan zirlaite kan chhang ho thin. Kan rual u zawkte’n an zirlai zir zova Badge of Merit an dawn khan kan zawh ve hun nghakhlel takin kan lo thlir thin. Kan zirlai kaltlangin Bible hriatna lamah hma kan sawn nasa em em a, chhungril lama kan nun kaihruaitu pawimawh tak a ni bawk. Kum 6 zet kan zir hnua Badge of Merit kan ‘S’ form kawrhmaa han thiah kai vang mai kha chu a nuam dangdai ve riau.

Corps Cadet ka nih hunchhung khan Corps Cadet Rally Dinthar Corps-ah ka tel ve a, North Eastern Region tana Corps Cadet Congress hmasaber 2-4 June, 1989 khan Kolasib Corps Hall-ah ka tel bawk a. Khang hunlai khan zan riakin kan inkhawmpui mai thin a, kan thlenin kha ka hrereng fo mai. A tum hnihah khan veng mawng lam zu-zuar inah kan thleng a, kan zirlaiin min duh angin kan thleninah hun hman a ngai si a, kan va huphurh thin em! Amaherawhchu, thuawih takin tawngtaina hun kan hmang a ni, enge ka chham tak erawh ka hrechhuak zo ta lo. Kan thupui ‘I vanglai hian I siamtu hrereng rawh!’, ‘I rawngbawlna kha hlen rawh’ tihte kha bengah a la thum tluk tluk mai.

Sipai Pawl-ah khan mi chhumchhia tete kan lawi khawm a, vengchhunga miten an uksak lem lohte pawh zalen takin kan awm tlang a, hun lo kal zelah hian mite thinhrik kan ni reng bik hauhlo mai. Kan hmuchhuaktu hian alo hmufiah mange aw tiin ka ngaihtuah thin. Salvationists kan lo nih hian khawtlang nunah pawh rahbi thar kaiin kan nun a lo danglam thin a ni. Corps Cadet kan zirchhuah ngat phei chuan nunkawng sual zawh theihna lakah nasa taka venhimin kan awm a lo ni.

Corps Cadet lesson atanga Bible thu kan zirte leh mi hmingthate chanchinte kha ka nunkawng hruaitu pawimawh tak an lo ni. International Headquarters atanga khairual zel niin tunah hian Discovery course A, B leh C zir mek a ni a, Set Book - Heroes of the Faith, Love without nothing, Salvation Army nihphung leh Salvation Army GK te nen. Hengte hi Corps Cadet te’n ngun takin zir ila, kan hmalam hun atana Pathian mi hman ni tura inpuahchahna a ni tih hria in, thinlung takin i bei fan fan ang u.

Jean Ralte