Tablet of My Heart: 𝕎𝕠𝕣𝕝𝕕 𝔻𝕒𝕪 𝕠𝕗 ℙ𝕣𝕒𝕪𝕖𝕣

Kum 1887 khan USA-ah, Pi Mary Ellen Fairchild James-i, Brooklyn, New York-a cheng chuan ramdanga missionary awmte puala tawngtaina hunbik a buatsaih a, a rawngbawlpui Methodist nu hovin rawn zawmin, chu chu World Day of Prayer intanna a sawi a ni. Khawvel hmun hrang hranga hmeichhiate, ram danga Missionary-a thawkte leh inlam atanga lo chhawmdawltute pawh, kohhran hrang hranga awmte'n an theih ang angin heng mite puala tawngtaina hunbik hi an lo siam fo tawh thin a. Chhutianga hun hmang thinte chu lehkhathawn leh chanchinbu hmanga inhriat pawhna neiin, kum 1927 khan khawvel huapa kohhran hrang hrangte tel theihna, Kristian hmeichhiate pual 'World Day of Prayer' (khawvel puma hmeichhiate tawngtaina ni) hi a lo piang ta a ni.

Kum 1927 atang khan National/Regional Committee zelin thupui leh hun hmandan tur an duang thin a, India ram pawhin kum 1932 'Crown rule' hunlai khan "Bang lovin tawngtai rawh", tih thupui hmangin an lo siam ve tawh a. Keini Mizo Salvation Army te hmanna ziaka kan hmuh hmasakber chu February ni 10, 1967 Zirtawpni a Bazar C.O. Bial Home League te hmanna Sipai Tlangau May, 1967 Vol.III No.17-a Major Khualzingi report hi a ni. Hemi kum hian Tongo ram mite buatsaih 'A ramin kinni a nei lovang' tih thupui hmangin tawngtaihona neih a ni a, mi 40 dawn lai an kalkhawm a ni.

Kum 1967-a World Day of Prayer an hmang hi thil hautak tak a nih hmel hle mai, rambuai avangin inkhawmna neih pawh a harsat hun a ni a, hmun hrang hrangah te tlanchhiain an kal darh hlawm a ni. Thenkhat an lo kir leh a, thingtlang atangin mi tam tak an rawn pemluh hunlai ani bawk. Bazar C.O. Bial hian V.C. hrang hrang, veng hla tak tak a huam a, tawngkain an theih ang tawkin he hunbik hmang tur hian an insawmkhawm a ni. Mi 40 bawr vel an kalkhawm thei hi anmahni pawh an lawm hle a, hun harsa leh hrehawm lai taka tawngtaina hun an hmang hi an rinna chawk harhtu anih thu ziah hial a ni.

Kum 1967 thleng khan Lent chhunga Zirtawpni hmasaberah Tawngtaina hi neih thin a ni a, amaherawhchu, vur tlakna rama awmte tan vur tam vanglai anih avangin kalkhawm a harsa a, 1968 atang khan March thla Zirtawpni hmasabera hman a lo ni ta zawk a ni. Tichuan, thupui buatsaihtu ram pualin khawvel ram tinah tawngtaina hun hman thin a ni a, khawvel hmundanga kan unaute Pathian thu dawnsawn dante hriain, an mamawhna zawnah tawngtaina in kan lo dinpui ve thei a, an ram tihdan phungte pawh kan lo hmelhriat phah ve thin a ni.

Kum 1982 khan Ireland rama hmeichhiate'n World Day of Prayer Logo an buatsaih chu hman tan a ni a, thal hmunli a inchhun lem, thingthia tawngtai lai, Celtic kraws leh rinbial hmanga siamin, khawvel hmuntina mi inanglo tak takte, lungrual tak leh thukhat vuaa kan tawngtaihona a tarlang a ni.

World Day of Prayer 2024 ah hian Palestine ram hmeichhiate'n Ephesi 4:1-3 "Ka ngen che... Hmangaihnaa indawh tawnin" tih thu kaltlangin hrehawmna leh nekchepna karah pawh Hmangaihnaa in dawh tawn turin min ngen a ni. Harsatna tam tak paltlangtu heng hmeichhiate hian khawvela an hmeichhiatpuite hnenah indawhtawnna leh lungrualna in danglamna a thlen theih thu an la rawn tlangaupui fan a ni.

World Day of Prayer 2021 kha Vanuatu ramin, Mathaia 7: 24-27 "Chutichuan, hêng ka thu hi hriaa, zâwm apiang chu mi fing, lungpui chunga in satu nên tehkhin tûr a ni. Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a; mahse, lungpui chunga rem tlat a nih avângin a chim lo. Hêng ka thu hi hriaa zâwm si lote erawh chu mi â ṭiauvut chung maia in satu nên tehkhin tûr a ni. Ruah a lo sûr a, tui te a lo lian a, thli te a lo tleh a, chu in chu a rawn nam sawk sawk a, a chim ta a, a sawp rup mai a ni,” a ti a, tih chang hmanga thupui an buatsaih chu khawvel ram hrang hrangah hman a ni ang.

Tawngtaina leh thiltih hi a inzawm tlat a, khawvela danglamna thlentu hmanrua ropui tak a ni. Tawngtai tura lokal khawmte hian a remchan angin thawhlawm an rawn kengkhawm thin a, chung sum leh pai tlingkhawm hmang chuan khawvel hmun hrang hranga hmeichhiate chawikanna turin, project chi hrang hrang hmangin semchhuah leh thin a ni.

“Cyclone Pam II: 13th of March, 2015”

WDP 2021 atan hian lemziak “Cyclone Pam II: 13th of March, 2015”, Vanuatu ramin a cho loh tak thlipui - cyclone Pam kum 2015-a a tawrh chungchang tarlangtu hman a ni a. He lemziakah hian nu pakhat, a fa tana tawngtaia kai-kun mek tihlan a ni. Thlipuite hrangin tuifawn a so bulh bulh a, amaherawhchu, palm kungte hian anmahni venghim turin an lo hliahkhuh a ni. An awmna piah tlanga kros inphun tlarte hian cyclone Pam avanga nunna chantate a entir a ni.

World Day of Prayer 2020 khan Zimbabwe ramin 'Tho la, i awngphah la la, kein kal tawh rawh' (Johanna 5:8) tih thupui hmanga an buatsaih, khawvel ram 170 a hman a ni.