🇹​​​​​🇺​​​​​🇳​​​​​🇬​​​​​🇪​​​​​ 🇮​​​​​🇸​​​​​🇺​​​​​🇦​​​​​ 🇰​​​​​🇷​​​​​🇦​​​​​🇼​​​​​🇸​​​​​-🇦​​​​​🇭​​​​​ 🇰​​​​​🇭​​​​​🇦​​​​​🇮​​​​​ 🇰​​​​​🇦​​​​​🇳​​​​​🇬​​​​​? -A.W.Tozer

 

‘A ni chu kan bawhchhiatnate avangin hliamin a awm a, kan khawlohnate avangin vuak thitlinin a awm a; kan thlamuanna tura thununna chu a chungah a tla a; A vuakna vualte a tihdamin kan awm ta.’ Isaia 53:5

Phiarrukna mak tak awm ang hrimin tunlai khawvelah hian sual chungchang a leimi te mawhphurna hi sawi kan tih duk mai - kohhran huang chhungah ngei pawh a ni; chu mai a ni lo, rorelna awm tur chungchang te, Pathian thinurna nasa tak leh Chhandamtu khenbeh a tulna thu te hi.

A lehlamah ve thung chuan Isua Krista rorelsak leh khenbehna thua mipuite an mawhphurna laka chhawk thei tur engthawlna siam chungchangah ual au leh chak taka khawvel tuamtu a awm mek thung. Inunauna leh dawhtheihna hmanga tunlai dan siam leh thupuan a pawi ber chu Kristian thurin innghahna hriatfuhlohna hi a ni.

He thu dik tak, mi zawng zawng tan kan Lalpa hliam leh vuak thitlinin a awm a, khenbeh hial a nih thu ah hian a hmei a pa in hliahbovin kan awm tlat mai. Mawhphurna neitu kan nih laiin phatmara midang puhmawh kan tum mek bawk si.

Tawnghmang thiamna in Juda Iskariota emaw Pilata emaw I puh ngawt lovang u. Hmui pet kawh chungin, ‘Sum it vangin a hralh a ni’, tiin Juda thiamloh chantir ngawt suh.

Pilata, dawihzep tak mai kha I khawngaih zawk ang u, engmah tisual lova a puan ngei tan pawh a ding ngam lo a ni si a.

Khenbeh tura Isua hlantu Juda mipuite kha anchhia kan lawh ngawt thei lovang. Khengbettu Rom sipaite mal manin kan dem ngawt tur a ni lo.

An thiltih ah an thiamlo ngei alawm! Mahse he thil tihsualah hian kan thurualpuite an ni asin. Anni leh keini’n kross-ah kan khai kang a, anni tih bik a ni lo. Nangmaha thinurna leh huatna sosang mek ngei khan a khaikang a ni. Hrereng chung si a sorkara I leiman chawi tur I zep then mek khan rinawmlohna bul thum a rawn pho lang a – Kraws-a khaikang tu a ni. Sual, huatna, rinhlelhna, thikthu, dawthei, tisa-na, nuam chen thlakhlelhna – heng zawng zawng mihringa fawkkhawm hian Kraws-ah a khai kang a ni.

I pawm law law teh ang u. Adama thlah tawh phawt chuan kraws-a khenbeh anih thu ah hian mawh kan la theuh si a!

Ka ngaihtuahnaa lo lut fo thin chu, Kristiana inchhal te hian kan Lalpa thihna hriatrengna tura Lalpa zanriah kil tura dawhkan kan pan lai hian, ‘kraws-a khai kang tute zingah khan kei ngei pawh ka tel a ni!’ ti a inpuangin, a tawrhna tawmpui tak zet tu engzat tak awm ang I maw!

I lo hriatnawn ve atana tha pakhat chu, nunna leh khawchhuahna atana pawimawh tak tih fel tur hel nana thildanga inhambuai tlat duhna hi hringnunah hian a bet tlat tih hi.

Khawii hmunah pawh thil hrang hrang sawiho turin a hmei a pa an pungkhawm thin – incheina thar chungchang te leh khawvel thu leh hla ril chaih tur te in. Muanna kan neih makmawh thu te, communist khen thlakna atana kohhran pawimawhnate nen lam sepin a awm thin. Heng chungchang hi sawi zahthlak a ni hauh lo reng a ni.

Amaherawhchu kan thlarau tana pawimawh em em sawiho leh ngaihtuah ho tur thlarau lam thil a awm thu, a huaisen fal deuhin a phuhchhuah palh hlauh erawh chuan, titi a tawp hmak a, ngawih hlawkna tinreng tarlana awm thin te’n hmun an chang sang hle thin a ni. Kan khawtlang invawnna ah hian ziakloh dan inphum ru pakhat sakhuana lam hawi sawi dawn chuan mimal bika lak awih loh ti niawm tak hi a awm a ang hial a ni.

Chutiang a nih mek lai in, chatuan hawlh tlang pawimawh tak pakhat chauh a awm si a – chu chu, ‘kan bawhchhiatnate avangin hliamin a awm a, kan khawlohnate avangin vuak thitlinin a awm a; kan thlamuanna tura thununna chu a chungah a tla a; A vuakna vualte a tihdamin kan awm ta’, kan Lalpa Isua Krista chungthu a thu dik tak hi a ni.

He chang ah hian thumal pahnih dengkhawng tak kan hmu – bawhchhiatna leh khawlohna.

Bawhchhiatna chu dan laka penna, thu dik dodalna a ni. Lei leh vanah hian mihring leh angel tla te chauh khan Pathian rorelna an do dal a, tun thlengin mihring hi chu thuneihna lakah chuan a la hel tlat a ni.

Sappui ho thu malah pawh hian bawhchhiatna leh khawlohna tih thumal aia buk rit leh tawrhhlelhawm, thu dengkhawng hi awm leh chuangin a mawi lo. Nimahsela Pathian remruat leh thuneihna laka mihring tlukna leh bawhchhiatna ah hian, rilru kawi, piangsual, bumhmang leh helhmang zia tarlanin a awm a. Hengte hi an la awm reng a, phat rual a ni lo, Isua Krista kraws a khenbeh a tulzia tichiangtu an ni.

Khawlohna tih thumal hi a ngaihawm lo hle a, kan huatzia pawh Pathian in a hria a ni. Amaherawhchu a thil thlen erawh tlan chhiatsan rual a ni lo.

Kan khawlohna avanga Chhandamtu vuak thitlina a awm thu hi zawlnei hian chiang takin min hriatnawn tir a ni.

“Teuh lo mai”, tiin kan pha ngawt a, mihring kutzia hi a nemnghet tu a ni asin. A kut hnu a hnutchhiah phawt chuan dan lekkawhtute hian misual man theihloh an nei lo asin, mi kutzia an vawngtha miau a. Chuvangin, mihring kutzia te chu hmun thim leh kilkhawr khawikipa pawh a in zam a – mitin kutzia vawnthat a ni, a mal malin Pathianin min hria a ni. Kan thiamlohna tlansan a, kan mawhphurna midanga ban let tum chu thil theih rual a ni lo. ‘Kan khawlohna’ hi mimal thil liau liau a ni e.

Kan bawhchhiatna leh khawlohna avangin hliam leh vuak thitlinin a awm a ni. Hliam a nihna in a tarlan hrilh che hi thil nuam a ni chiah lo. Tihbawlhhlawh leh tihtliahin a awm a, hnuhhniama awmin a hming a hliau a ni. A zahawmna hnuhchhuah sak a ni a, ama thisen leh khawvel bawlhhlawh a tih bawrhbang a ni. Chutichung chuan tumah a thiamlo lova, anchhia a lawh hek lo. A ni chu Isua Krista, hliama awm chu a ni.

Israelte ritphurh leh rorelnaa an tihsual mak tak chu he mi hliama awm , Jerusalem bula tlang pakhata hrem tak a hi, ama sual vang liau liau a tuar nia an ngai tlat hi a ni awm e.

Hun kal tawh a rorel sual palh chungchang hi zawlneiin a lo hmu lawk a, amah ngei pawh Juda mi a ni a. Tihian a sawi, ‘Pathianin a hawisan ah kan ngai a. Ama khawlohna avanga hremna tawk ah kan ngai a, kan bawhchhiatna leh khawlohna avanga Pathianin a tuar tir tih reng kan hre lo’.

Keimahni vangin hmuhsit a tuar a ni. Pathian a minung pahnihna ngei hi kan tan hliamin a awm a, chutichung chuan keini tawmkailo leh hriatna reng nei lo hian kan lo hmusit si a.

Isaia hian, ’thlamuanna kan neih theihna tura thununna’ A chunga a tlak thu a sawi a ni.

He thlamuanna ngei hi – mimal hamthatna, hriselna, himna leh chawikana awma Pathian hmaa min hruai thlengtu chu a ni tih hi engzat takin ngaihtuah ang aw! Kan duh phawt chuan, Pathiana thlamuanna kan chan theihna turin thununna kan aiah a lo paltlang a lo ni. Thununna ah hian hauh zek, hremna leh siamthatna te a tel a. Vantlang mithmuhah Rom sipaite vuak leh tihduhdah a ni. A hnua Paula chunga thleng angin vantlang hmaah an tawng el khum a. Vantlang deu sawhna hmaah hruihruala hlap a ni, a vuakna vual leh thisen chhuak chu khawvel leh mihringte thinlunga thlamuanna hnar a lo ni ta. Kan thlamuanna turin thununin a awm a, vuak a tuar a ni.

Vantlang hmaa puitling invuak tluka inhremna zah phur mihringte hian an la hmuchhuakin ka hre lo. Tan ina hrem an nih hunchhung hmangzova lo chhuak tam tak hi chu vantlang hian a ngaisang viau thin. Sum tam tak sengin thil tisual, man tawkte an intlan chhuak bawk thin a, an tuar tur paltlang a ngaih tak loh avanga chapo ta viau te pawh hi thil awmlo a ni hran lo. Amaherawhchu, mi tupawh vantlang au elna hmaah, kawr phelh saka naupang sual ang maia vuak tuar chhuak hi zawngin a hmelah uanthuanna leh hawi pirna reng a pu thei tawh lo. Tunhma anga in lak ‘pa’ leh sual kawng zawh a theih tawh loh. Chutianga talhtum hmanga inthununna chuan thlarau a tikehchhia a, thil zahthlak tawp a ni. Rilru hahna ai mahin hnunglama deuhsawhna a tuar hlelhawm zawk thin a ni.

Sual laka thiamchantir, ngaihdam ka nihna leh chutiang mi tam takte aiawhin ti zawk teh ang, he thu hi ka sawi a ni; kan han inlamlet hian Isua Krista kan aiawha A dinna leh A tuarna, hliam leh thununna A tawh hi a si per te chauh kan hmelhriat ve a ni. Mi a inchhir tak zet chuan a sual hlawmpui leh Pathian laka mi hel nih inhriatna khan a nawr let a, chu mi laka zalenna Pathian hnena dil ngam rual a ni lo. Thlamuanna erawh a lo thleng pang mai, Isua Krista chungah thununna nghahin a awm tawh si a – rukru ang maia vantlang hmaah tihmualpho; sual hauh lo kha hliam leh vuak thitlinin a awm, helnaa tel ve hauh lo chungin; mihring zia a khawlohna Siamtu Pathian thinurna tawngbaw tu vangin.

Isaia chuan ‘A vuakna vualte a tihdamin kan awm ta’ tih chanchintha hmangin kan aiawha a tlingtlak thu a tlip a ni.

‘Vuakna vual’ tih tawngkam an hmanna tawngbul ah a awmzia hi a duhawmloh hle a. A sawi tum tak chu hliam leh na a nasat luat avangin, taksa puma duk vual kha vung pakhat ang hlawpin a lang tihna a ni. Khawvelah hian hetiang inhremna rapthlak taka taksa insawisak hi an lo ching fo a ni.Thil tisualtu chu a phu tawk hremna a hmu tur a ni tih hi khawtlang duh dan a ni reng a. An pawikhawih a zirin hremna siam a ni thin. Phuba chi khat – dan lo anga awmte chunga phuba lakna a ni.

Isua Krista chungthu ah erawh a chunga kan sawi angin hremna kalpui a ni hauh lo. A chhan chu A thiltihsual vanga hremna tuar A ni lova, A ma sual thawina thil a ni tlat lo.

Isua tuarna hi siamthatna atan a ni. Keimahni min siamtha in thafamkima kan awm theihna turin tuar a huam a, tuarnaa tana tuarna bawka tawp leh mai lovin, a tuar chhuah hnua damna a hnu a khar leh theihna turin.

Unau duhtak, chu chu kross ropuina a ni e! Chutiang taka tuarna chu a ni rei tak Pathian thinlunga lo inphum tawh chu!  Tlanna ropui, sual simte tana an siamtu Pathian nena remna leh muanna thlentu chu a ni! A tuarna in bul a tan a, kan damna a thlen a ni. A hliam tuarna zarah tihtianghlimin kan awm ta. A vuakna vualte chuan min thian thianghlim a lo ni.

Enge kan inchhirna chu? Kan Lalpa Isua Kristan a tuarna nasa tak inthiamlo taka kan tawmpui ve na hi inchhirna chu ni hian ka hre thin. Chu bakah, inchhir tak tak te chuan Pathian ngaihdamna leh tih thianghlimna an chan hian chuti maiin an theihnghilh hmin der ka ring lo.

Thiamloh chang kan nihna tuar har tak inchhirnaa kan hmelhriat hi lo zuaiin, thlamuanna leh thianghlimna a lo thleng thin a, mahse mithianghlimber pawh hian Pathian beramno in hliam leh thununna kan tana a lo paltlang kha an ngaihtuah let fo in ka ring. Thin pawh a rawn thawng thar fo ngei ang. Mak tihna in a khat thin - a chunga kut lektu tana ngaihdamna leh thianghlimna thlen turin hliamin a awm a ni.

Heng thute hian khawngaihna thlipui kohhran huang chhunga lo tleh – thlarauva thianghlimnaa inhnimphum leh thanlen duhna John Wesley a lo zirtir leh a nun ngeia chhiar theiha awmte kha min hriatchhuah tir a ni.

“Tih thianghlimna” tih thumal hi Bible a thumal duhawm tak a nih rual in, tunlai kohhrante ah hian hun engemaw chen kha chu lam kan serh deuh tlat a, ‘in la thianghlim’ tih ho zinga chhiar tel kan hlauh vang a ni mahna.

Tunah erawh chuan ‘tih thianghlimna’ lam kan uar mai ni lovin, Pathian lama he thumalin awmzia a neih thukzia ngei pawh a lar thar leh ka beisei a ni. Ringtu kristian, Pathian fa chuan thinlunga thianghlimna leh kut fai neih a thlahlel ngei tur a ni. Chumi atan ngei chuan a ni Isua Kristan zah phura hrehawm tinreng a lo paltlang. Vuak leh hliam nasa tak tuara thununin a awm a, Pathian mite tihthianghlima, thlarau mi, rilru leh ngaihtuahna thiang tak pua kan lo awm theihna turin. Heng zawng zawng hi tuarna a tanin kan thianghlimna in a khar a ni. Vantlang hmuha tuarna leh thisen chhuak khawpa hliam tuarin, a mite’n hlim leh lawm taka rilru thlamuanna leh hahchawlhna kan chan theihna turin a ni a lo paltlang.

He Pathian mizia mak tak – Pathian fapa neihchhunin kan aia rorelna leh thununna paltlang tura a inpekna hi ringtu - nun Krista neitu zawng zawng te chuan mak an ti theuhin ka ring. Mak tihna a awmlo a nih chuan, kan innghahna lungpui chhu kehin bul kan tan that a tul ngei ang.

Mithianghlimberte zinga mi Paula ngei pawh khan he thuhretu nih hi a zak lova, Pathian khawngaihna leh lainatna chu mak tiin a vawng reng a ni. Chatuan atan a sualte Pathianin a hrereng tawh lo tih a hre chiang a ni. Engkim chinfel a ni tawh thu hi thinlung lawm taka pawmin a hrechhuak fo a ni. Chutihrualin, mak ti taka pawmin tihian a puang a ni, ‘Mi tlaktlailo ber kohin ka awm a, A khawngaihna zarah Isua Krista ah chuan thilsiam thar ka lo ni ta’.

Paula’n rinna leh ngaihthatna tak a neih avanga a lawmna ka rawn tarlan duhna chhan chu, chatuan atana tlan kan nih tawh avanga kan intukluhna hian min kiansan a nih hlauh chuan, kan hnungtawlh tan a ni tih min hriattir ka beisei vang a ni.

Kum tam tak chhunga Pathian mite zinga ropuiber pakhat Charles Finney a ngei pawhin a nemngheh tlat pakhat chu, Krista ke bula mite hruai tura thahnemngai taka a beih fanfan laiin ama thinlung a daih hlauh chang a tawng a ni.

Chu thil lo thleng chu Finney a khan a hlamchhiah mai lo. Amah ngeiin a ziak danin, a thiltih lai zawng zawng kalsanin, chawnghei leh tawngtaia dilin Pathian hmel leh Thlarau pawlna thar a beisei fan fan thin a ni.

‘Ka chhunga Mei chhem nuna a awma, Pathian ka tawh hma chu chawl lovin ka tawngtai fan fan’, tiin a ziak a ni. Pathian mi hriat chhuan zawng zawngte tana beih dan tha leh tangkai a va ni em!

Krista taksa neitu, a kohhrante hi Lalpa tana lawmchunga rawngbawltu ni tur chuan englai pawh in thil pahnih kan hriatreng tur a awm.

Hliama a awm avangin kan bawhchhiatna a thai bova, Pathian thlamuanna chu Isuan vuakna vualte a tuar tlang zara pek kan nih tih hi lawm takin I hrefiah ang u. Chumi kaltlang chuan chhunglamah hmantlak kan ni tih Pathianin min hriattir dawn si a. Chutiang taka thlarau nunna ah chuan, min then-thianghlimna famkim vawng nungin, sual leh a hnathawhte kan dodal thei ang.

Heng bakah hian kan Lalpa Isua Krista’n hliam leh vuak kan aiawha a tawrhna ah hian hlim leh lawm taka intulut in I hrereng ang u. Aw,he tlanna hnathawh hi a makin a ropui e – mi pakhat hliamin mi tam tak hliam a tidam a; mi pakhat ser avangin mi tam tak ser a dam a; mi pakhat vuakna vual chu hnamtin damna a ni si.

Hliam leh vuak thitlina kan awm ai chu a chungah a tla a, ama zarah chhandamin kan awm ta!

Lettu - J̅e̅a̅n̅ R̅a̅l̅t̅e̅

https://issuu.com/jeanralte/docs/tunge_isua_kraws_ah_khaikang