𝕋𝕙𝕚𝕙𝕟𝕒 ℍ𝕝𝕚𝕞 ℝ𝕦𝕒𝕞𝕒 𝕊𝕚𝕡𝕒𝕚 𝕄𝕒𝕝𝕥𝕝𝕒

 

En teh Lalpa, kan la in be ngai hauhlo na in,

Tun tum chu, 'I tha maw' tia biak che ka nuam.

Pathian hi a awm tak tak lo, tiin min hrilh thin a,

Finglo takin, ka lo awih thla rawk a.

 

Nizan khan, ka tawmna khur ralti atangin i van khi ka thlir a,

Dawta bum ka ni tih ka hre ve chiah.

I thil siamte hmu turin ka mitte lo len thin ila chuan,

Hreipui hi hreipui ani lo, an ti tlat tih ka hrethiam tur.

 

 

Min chibai ve duh ang em aw? ka ti vawng vawng.

Mi hriatthiamna riau i nei hian ka hre deuh tlat;

I hmel tak ka hmuh ni lo thlen hmaa,

He hmun ralti paltlang a ngai tlat hi, a mak hle mai.

 

A...ka tawng tui tam tawh lo mai ange,

Amaherawhchu, vawiina kan intawng hi ka lawm kher mai.

Ni kin ni pawh a lo thleng tep tawh ang,

Mahse ka hlau lo, ka kiangah i awm si a.

Ralkhel dar a kiu ta riai mai, Ka kal ta'ng e;

I kianga awm ka ninglo tih mi hriatsak la.

E khai! Indona rapthlak tak a ni ngei ang,

Tunge hria, zaninah ngei I hnen ka lo thleng mahna.

 

Tun hmain I lakah ka hawihhawm lo nachungin,

Kawngka bulah mi lo nghak ang em aw? ka ti rilru.

Khai a, ka mittuite a far. Karei! Ka'n tah tak chu le!

Kum tam liam ta-ahte khan lo intawng ni ila aw...

𝘛𝘶𝘯𝘢𝘩 𝘻𝘢𝘸𝘯𝘨 𝘬𝘢 𝘬𝘢𝘭 𝘢 𝘯𝘨𝘢𝘪 𝘵𝘢, 𝘓𝘢𝘭𝘱𝘢, 𝘮𝘢𝘯𝘨𝘵𝘩𝘢 𝘭𝘦;

𝘔𝘢𝘬 𝘵𝘩𝘦𝘪 𝘯𝘨𝘦𝘪 𝘮𝘢𝘪, 𝘯𝘢𝘯𝘨 𝘬𝘢 𝘵𝘢𝘸𝘯 𝘢 𝘤𝘩𝘪𝘯, 𝘵𝘩𝘪𝘩 𝘳𝘦𝘯𝘨 𝘬𝘢 𝘩𝘭𝘢𝘶 𝘵𝘢 𝘭𝘰.

 

Note - He thuziak hi Indopui II-na lai khan Italy rama sipai pakhat ruang atanga Pvt.James Day-a chhar a ni.

 

Lettu - Jean Ralte (11092002)

 

Source - The War Cry (USA) Vol-III No.2, 19th Jan.1991