Tambourine

Aigupta atanga Israel-te hruaichhuah an nih khan, Arona farnu zawlnei Miriami'n Tambourine a ken thu Exodus 15:20 -ah kan hmu. Lawmna, hlimna, hnehna leh lawm avanga hlim lawmna nen a inzawm thin. Kum zabi 18 na chho-ah khan rimawi khawvelah telh a ni ve thin a, hla siamtu lar tak takte pawhin an lo leklam ve thin. Kum zabi 19 na tawp lama The Salvation Army te'n 'kutkhuang' an han chawilar takah chuan - fakna, chibai bukna leh thlarau indona hmanrua - anihna tur taka hmanin a lo awm leh thei ta!

Kum 1880 March ni 27 War Cry chhuakah chuan, officer leh sipai a tam thei ang berin rimawi tumna hmanrua hmang thiam se a duh thu General William Booth-a'n a ziak a. Rimawiin muallai rawngbawlnaah mipui a kokhawm tha hle tih a hriat avangin. Kum 1881 February ni 17 War Cry-ah zawlnei Miriami 'tambourine' kenglai lem a chuang a, hetihlai hian kutkhuang hi hman a la ni lo. Chu milem chuan Mansfield, Nottingham vawngtu Captain Charles Rothwell thlarau a kaiharh a, thilhlui dahkhamna dawr-a 'Tambourine' a hmuh chu a lei nghal thuai a. A nupui chuan kawngzawhnaah a han thingri ta a le, "Diabola thik tawk a tling a, chanchinbu a al-hneh a, mipuiin (inkhawmna in) barrack-an luah khat thung a, misualte chu damna tuikhuah chhungah hruailuhin an awm zawih zawih bawk!", tih thu hi a lo chhuah phah ta a ni.

 

Tambourine hman chu uar a ni ta deuh deuh a, kum 1882 October ni 7 War Cry chhuakah khan kar-ruk chhung lekin Tambourine 1600 zet hralh chhuah anih thu George Scott Railton-a'n a tarlang. Pakhat chauhva thinrik chu duhtawk lovin, a huhova thinrual dante an zir ta zel a, hun lokal leh zelah phei chuan Corps tin deuh thaw-ah Timbrel Brigade din a lo ni ta. Hriatpuina Kawngzawh leh Muallai rawngbawlna tinrengah Band rual nen Timbrel Brigade te'n thiam tak maia an lo vai rual suau suau han hmuh hi chuan mi mit a la-in, thlir nawn fo a tul thin reng a ni.

Tambourine chungchangah hian Hmuchhuaktu khan thlaraubo a hmangaihna awrawl hetiang hian,"Lalpa hmaa thlaraubo pakhat tal ka hruai thlenna tur anih phawt chuan, inrulpui-ludin chunga ka ke-a kutkhuang ben dan pawh ka zir mai ang!", a lo chhuah bawk a ni.

Mizoram-ah hian hun bul atang khan 'kutkhuang' hi rimawi pakhat anga hman ve nghal anih hmel a. Kum 1921-a Adjutant Edward Walker a lo kal a, an kawngzawh thlalak-ah pawh nu-pakhatin 'Tambourine' hi a lo keng lang va a ni. Inkhawmna leh khawlai rawngbawlnaahte kutkhuang thinrikin a awm thin a, a huhova rual taka kutkhuang vai hi chu kum 1972-a Major Ruby Manuel-i TYS anih khan Aizawl Bazar Corps-ah Corps hrang hrang atanga thlan khawmte a zirtir atanga tan a ni. Hemi hnu hian Commissioner Chianghnuna nupui Commissioner Barbara Chianghnuna (Powell) khan a zirtir chhunzawm veleh a, hun engemawchen chu an chawinung a, anni kaihhruaina hnuaia thiamte chuan Corps dang dang amite an zirtir chhawng veleh ta zel a ni.

 

Corps mal anga Timbrel Brigade tha taka kalpui hmasaber chu Central Corps an ni a, hun pawimawh leh muallai rawngbawlnaahte thiam takin tambourine an beng thin. Chungte chu - Lalngaihawmi (Commissioner ni a, Mizo hmeichhia Territorial Commander hmasaber chawl ta), Lalchhandami, Zachuailovi, Lalchharliani, Thanpari, Lalsawmi, Remchhungi leh Lalsawmzuali te an ni.  His excellency S.K.Chibber, Lt.Governor of Mizoram anih lai 1974-1977 khan, kan timbrel brigade neih hmasakber te hi, Motherless Babies Home, Aizawl-a naupangte leh Commissioner Chianghnuna te nupa nen Governor chenna tualah hun an hmang a, chumi thlalak chu a hnuaia mi hi a ni a, kutkhuang bengtute chu sash bat-te hi an ni.

Tunlai hunah phei chuan YouTube leh Social Media-ahte ben-dan chi hrang hrang entur a lo awm mai bakah, Mizo irawm-chhuaka bendan te pawh siamchhuah ve zel a lo ni ta. Tleirawl chauh ni lovin, nutling leh patling rualte pawhin timbrel brigade hi an din ta zel a ni. William Booth-a khan, 'Khawvela rimawite hi Diabola ta a ni in ti maw? A ni em? Awle, a lo ni palh anih pawhin ka lak let sak vek ang, a chhan chu music note pasarih zinga note pakhatte-ah mah hian chanvo a nei lo. Note tin, leh strain tin, leh harmony tin te hi Pathian ta a ni a, kan ta a ni", a lo ti hmiah mai.

 

 

 

 

Midangte (Others)

‘Khawvel puma Chanchintha puandarh hi Pathian thupek a ni a, RAMTHiM tan engmah i thawh ve ngailo anih si chuan, Pathian remruat dodaltu i ni ang.’ - Oswald J Smith

Bible-ah chuan, ’Pathian ram zawng hmasa rawh u’ (Mathaia 6:33) tih ziak a ni. Khawvel danah chuan kan enkawl hmasak turte chu kan chhungte, kan kohhran leh kan lainate niin kan ngai thin. Isua thung chuan thlaraubo man a dah pawimawh ber a, mite duhlohte enkawl chu a rawngbawlna a ni. Kan mit a thim hunah, Pathian leh midangte kan hmangaihna tehfunga hmangin rorelsak kan ni dawn miau si a. Thil sual kan tih ngailoh thu emaw thilmak kan tawnhriatte emaw Pathian hnena hrilh duah khan kawngro a su dawn tlat lo. Keimahni kan inhmangaih lutuk chuan, midangte hmangaih turin hun leh tha kan nei tlem phah dawn a ni.

Outreach Sunday 2024 kan lo thlen leh hian Hmuchhuaktu William Booth-a kamchhuakte hi ilo chhiar nawn leh teh ang.

·         Hmeichhiate an tah chhung chuan, an tan ka thawk ang. Naupang rethei riltam an awm chhung chuan, an tan ka thawk ang. Lungin lut leh chhuak an in sulpelh chhung chuan an tan ka thawk ang. Kawtthlera hmeichhe tleirawl vakvai an awm a, misual vak an awm chhung leh; Pathian chhandamna la changlo an awmchhung chuan an tan ka thawk zel ang. A tawp thlengin hmelma chu ka bei ang.

·         Mi thenkhat thiltum ber chu hausak a ni a, thenkhatin thilmawi ziah te, thenkhatin hmingthanna te an um bawk a, ka thiltum ber chu thlaraubo zawn a ni.

·         Lalpa hmaah thlaraubo pakhat tal ka hruai thlenna tur anih phawt chuan, inrulpui-ludin chunga ka ke-a kutkhuang ben dan pawh ka zir mai ang!

Kum 1908 khan khawvel puma Sipaite hnenah telegram hmanga William Booth-a thu-thawn darh chu 'Midangte (Others)' tih thumal te hi a ni. Tunhma chuan hmun hla taka mite thu-thawnna awmchhun chu telegram a ni a, thumal tinin man a nei zel a, pawisa chawi a tamlohna turin he thumal pakhat awmze ril tak nei hi kan Hmuchhuaktu khan Krismas thuchah atan "thlaraubo zawngtu ralhratte" hnenah a thawndarh a ni.

Chutiang tak chuan Krista rilru a put theih a, chu rawngbawl hna chhunzawm tur chuan, 'Bualfai la, Eitur pe la, Chhandam rawh', tih thupek khauh tak mai dawngtute kan ni. 'Midangte' hi kan dah pawimawh hmasak ber a ngai. Chuvangin, thahnemngai lehzualin min ko-tu duhdana kan awm a tul tak zet a, anihloh chuan chatuan hmuna kan dinhmun leh nihna luah tlak turin thuam kan nilo hlauh dah ange. Kan mamawhloh pui leh neih tullo dila kan theihna kan hman zawh mai chuan, Pathianin kan tawngtaina chhangin, ama tum ngei a phet mai ang tihte a hlauhawm a ni. Kan tisa putlai mek hi awngrawp telh telh mahse, a remruatna puitlin tur hian Pathianin tha tawkah a ngai a ni. Kan taksa boral tur hi hnathawhna hmun atana hmangin chatuan atan kan thlarau siamthat hna Pathianin a thawk thei a, A hnena 'Midangte' hruai thleng tura tlante kan ni si a.

Kum 2024 ah hian India Eastern Territory-ah, Missionary Sponsor-tu 4840 (kum 2022 khan 4251 a ni) kan awm mek a. Thawktute - Oureach Worker - Kraws Sipai 122, Evangelist Teacher 172, Field Assistant 12, an vaiin 306 nos. (2022 khan 312) Territory chhung Centre 152-ah an inzarpharh a ni. October 2023  - July 2024 chhunga ringthar kan neih zat hi mi 114 (2022 chhungin 80) an tling ta. Chutih rual chuan kan Territory huamchhung State hrang hranga Kristian dinhmun (2022) chu a hnuaia mi ang hi a la ni chauh mai si:

1.      Nagaland- 87.93%

2.      Mizoram- 87.16%

3.      Meghalaya-74.59%

4.      Manipur- 41.29%

5.      Arunachal- 30.26%

6.      Assam- 3.74%

7.      Tripura- 4.35%

8.      West Bengal- 0.77%

Hun tlemte chauh kan nei ta a, kan thawhloh avanga mi tam takte an boral mai zawngin min Tlantu hmel kan hmu ngam dawn em ni? Tun hun ngei hi Pathian lawmzawng ka zawn hun chu a ni. Nakinah a ni lo. Thildang ka tihzawh ah pawh a ni lo – Tunah ngei hian. Tun hunah ngei hian thlamuannaa min chhun khah a duh si a. Dolet tura theihna neilo - 'Midangte', phuarbeh tlatte chhuah zalen a, an dinhmun Krista'n a buatsaih sak chu luah tir turin, I penchhuak ang u khai!

Jeremia 8:20 “Buhseng hun a liam ta, nipui a tawp ta, chhandamin kan la awm silo”, ti-a chiau vawng vawngna a lo thlen hma hian...

 

Buh seng hun a liam a, nipui a tawp hunah

Thuhril leh tawngtai reng a awm tawh lovang.

Khawngaihna thlipui tleh tawh lova,

Chanchintha puanzar a nih tawhloh hunah;

Misual, chu manganna avanga chiaina chu engtinnge i tuar zawh ang le?

Chu beidawnna zan chu i tuarzo ang em?

Buh seng hun a liam hunah,

Nipui a tawp hunah chuan,

Buh tak nge buh lem;

Rorelna a lo thlen hunin,

Aw, engtin tak ni zel ang maw?

When the harvest is past and the summer is over

Author: Samuel Francis Smith

 

1 When the harvest is past, and the summer is gone,
And sermons and prayers shall be o’er;
When the beams cease to break, of the blest Lord’s day morn,
And Jesus invited thee no more:

Chorus:
When the harvest is past,
And the summer is o’er,
With the wheat or the tares,
When the judgment appears,
Oh, which shall it be evermore?

2 When the rich gales of mercy no longer shall blow,
The Gospel no message declare;
Sinner, how canst thou bear the deep wailings of woe?
How suffer the night of despair?

3 When the holy have gone to the regions of peace,
To dwell in the mansions above,
When their harmony wakes, in the fullness of bliss,
Their song to the Savior they love:

4 Say, O sinner that livest at rest and secure,
Who fearest no trouble to come;
Can thy spirit the swellings of sorrow endure,
Or bear the impenitent’s doom?

Jean Ralte [11.09.2022]

Updated on 30 August 2024