Midangte (Others)

‘Khawvel puma Chanchintha puandarh hi Pathian thupek a ni a, RAMTHiM tan engmah i thawh ve ngailo anih si chuan, Pathian remruat dodaltu i ni ang.’ - Oswald J Smith

Bible-ah chuan, ’Pathian ram zawng hmasa rawh u’ (Mathaia 6:33) tih ziak a ni. Khawvel danah chuan kan enkawl hmasak turte chu kan chhungte, kan kohhran leh kan lainate niin kan ngai thin. Isua thung chuan thlaraubo man a dah pawimawh ber a, mite duhlohte enkawl chu a rawngbawlna a ni. Kan mit a thim hunah, Pathian leh midangte kan hmangaihna tehfunga hmangin rorelsak kan ni dawn miau si a. Thil sual kan tih ngailoh thu emaw thilmak kan tawnhriatte emaw Pathian hnena hrilh duah khan kawngro a su dawn tlat lo. Keimahni kan inhmangaih lutuk chuan, midangte hmangaih turin hun leh tha kan nei tlem phah dawn a ni.

Outreach Sunday 2024 kan lo thlen leh hian Hmuchhuaktu William Booth-a kamchhuakte hi ilo chhiar nawn leh teh ang.

·         Hmeichhiate an tah chhung chuan, an tan ka thawk ang. Naupang rethei riltam an awm chhung chuan, an tan ka thawk ang. Lungin lut leh chhuak an in sulpelh chhung chuan an tan ka thawk ang. Kawtthlera hmeichhe tleirawl vakvai an awm a, misual vak an awm chhung leh; Pathian chhandamna la changlo an awmchhung chuan an tan ka thawk zel ang. A tawp thlengin hmelma chu ka bei ang.

·         Mi thenkhat thiltum ber chu hausak a ni a, thenkhatin thilmawi ziah te, thenkhatin hmingthanna te an um bawk a, ka thiltum ber chu thlaraubo zawn a ni.

·         Lalpa hmaah thlaraubo pakhat tal ka hruai thlenna tur anih phawt chuan, inrulpui-ludin chunga ka ke-a kutkhuang ben dan pawh ka zir mai ang!

Kum 1908 khan khawvel puma Sipaite hnenah telegram hmanga William Booth-a thu-thawn darh chu 'Midangte (Others)' tih thumal te hi a ni. Tunhma chuan hmun hla taka mite thu-thawnna awmchhun chu telegram a ni a, thumal tinin man a nei zel a, pawisa chawi a tamlohna turin he thumal pakhat awmze ril tak nei hi kan Hmuchhuaktu khan Krismas thuchah atan "thlaraubo zawngtu ralhratte" hnenah a thawndarh a ni.

Chutiang tak chuan Krista rilru a put theih a, chu rawngbawl hna chhunzawm tur chuan, 'Bualfai la, Eitur pe la, Chhandam rawh', tih thupek khauh tak mai dawngtute kan ni. 'Midangte' hi kan dah pawimawh hmasak ber a ngai. Chuvangin, thahnemngai lehzualin min ko-tu duhdana kan awm a tul tak zet a, anihloh chuan chatuan hmuna kan dinhmun leh nihna luah tlak turin thuam kan nilo hlauh dah ange. Kan mamawhloh pui leh neih tullo dila kan theihna kan hman zawh mai chuan, Pathianin kan tawngtaina chhangin, ama tum ngei a phet mai ang tihte a hlauhawm a ni. Kan tisa putlai mek hi awngrawp telh telh mahse, a remruatna puitlin tur hian Pathianin tha tawkah a ngai a ni. Kan taksa boral tur hi hnathawhna hmun atana hmangin chatuan atan kan thlarau siamthat hna Pathianin a thawk thei a, A hnena 'Midangte' hruai thleng tura tlante kan ni si a.

Kum 2024 ah hian India Eastern Territory-ah, Missionary Sponsor-tu 4840 (kum 2022 khan 4251 a ni) kan awm mek a. Thawktute - Oureach Worker - Kraws Sipai 122, Evangelist Teacher 172, Field Assistant 12, an vaiin 306 nos. (2022 khan 312) Territory chhung Centre 152-ah an inzarpharh a ni. October 2023  - July 2024 chhunga ringthar kan neih zat hi mi 114 (2022 chhungin 80) an tling ta. Chutih rual chuan kan Territory huamchhung State hrang hranga Kristian dinhmun (2022) chu a hnuaia mi ang hi a la ni chauh mai si:

1.      Nagaland- 87.93%

2.      Mizoram- 87.16%

3.      Meghalaya-74.59%

4.      Manipur- 41.29%

5.      Arunachal- 30.26%

6.      Assam- 3.74%

7.      Tripura- 4.35%

8.      West Bengal- 0.77%

Hun tlemte chauh kan nei ta a, kan thawhloh avanga mi tam takte an boral mai zawngin min Tlantu hmel kan hmu ngam dawn em ni? Tun hun ngei hi Pathian lawmzawng ka zawn hun chu a ni. Nakinah a ni lo. Thildang ka tihzawh ah pawh a ni lo – Tunah ngei hian. Tun hunah ngei hian thlamuannaa min chhun khah a duh si a. Dolet tura theihna neilo - 'Midangte', phuarbeh tlatte chhuah zalen a, an dinhmun Krista'n a buatsaih sak chu luah tir turin, I penchhuak ang u khai!

Jeremia 8:20 “Buhseng hun a liam ta, nipui a tawp ta, chhandamin kan la awm silo”, ti-a chiau vawng vawngna a lo thlen hma hian...

 

Buh seng hun a liam a, nipui a tawp hunah

Thuhril leh tawngtai reng a awm tawh lovang.

Khawngaihna thlipui tleh tawh lova,

Chanchintha puanzar a nih tawhloh hunah;

Misual, chu manganna avanga chiaina chu engtinnge i tuar zawh ang le?

Chu beidawnna zan chu i tuarzo ang em?

Buh seng hun a liam hunah,

Nipui a tawp hunah chuan,

Buh tak nge buh lem;

Rorelna a lo thlen hunin,

Aw, engtin tak ni zel ang maw?

When the harvest is past and the summer is over

Author: Samuel Francis Smith

 

1 When the harvest is past, and the summer is gone,
And sermons and prayers shall be o’er;
When the beams cease to break, of the blest Lord’s day morn,
And Jesus invited thee no more:

Chorus:
When the harvest is past,
And the summer is o’er,
With the wheat or the tares,
When the judgment appears,
Oh, which shall it be evermore?

2 When the rich gales of mercy no longer shall blow,
The Gospel no message declare;
Sinner, how canst thou bear the deep wailings of woe?
How suffer the night of despair?

3 When the holy have gone to the regions of peace,
To dwell in the mansions above,
When their harmony wakes, in the fullness of bliss,
Their song to the Savior they love:

4 Say, O sinner that livest at rest and secure,
Who fearest no trouble to come;
Can thy spirit the swellings of sorrow endure,
Or bear the impenitent’s doom?

Jean Ralte [11.09.2022]

Updated on 30 August 2024

Zahngaihna Thutphah (Mercy Seat)

Khawvel puma Chhandamna Sipaite’n, Pathianin Sipaite hnena zahngaihna thutphah a pek hi chiang taka kan hriatfiah a; he khawngaihna kaltlanga Krista awmpuina tihngheh a nihzia leh Corps leh Sipai Pawl rawngbawlna hmun tinah thlarau lam hlawkna  thlenna hmanrua atana kan pawm hi tul a ni.

 

Kan inkhawmna hmuna Zahngaihna thutphah awm hian, Pathianin a mite A hnena kal fo tura a kohna a tinghet a, Ngaihdamna leh Simna hmun chauh ni lovin, Pathian pawlna leh inhlantharlehna hmun a ni. He hmunah hian Pathian khawngaihna luangliam lo hmelhriat in, a Chhandamna zau tak kan chang thei ang. Zahngaihna Thutphah hi mitinin, engtiklai pawhin, a bik takin Salvation Army punkhawmnaa hman theih a ni a; sawmna chhangin, tupawhin kan Lalpa nena inpawlna duhawm leh tlawm tak kan chang thei a ni. [International Spiritual Life commission statement to the Salvationists]

 

Bible tlawhchhanna chu Exodus bung 25 ah kan hmu. ”Rangkachak hlir hlakin zahngaihna thutphah I siam tur a ni: a dung lam chu tawnghnih leh a chanve ni sela, a vang lam chu tawng khat leh a chanve ni rawh se… Chutah chuan I hnenah ka lo kal ang a, zahngaihna thutphah  chunglam atangin ka rawn be thin ang che”, Lalpan a ti.

 

Khawvelin a hman hmasakber chu kum zabi 19 na tir lamah USA rama harhtharna thlen lai niin mithiam te’n an chhut a. William P Chandler-a sawi hmangin, ‘mipui pungkhawm karah zawngtute an in chhap teuh avangin, pan vek an harsa a, a tangkai hle mai. Hmun khatah kokhawmin tanpuitute’n an mamawh angin an lo dawngsawng thei a ni’. Hetih hunlai hian Lusunna thutphah an ti mai thin. England ramah kum 1849 vel a, Charles Finney a beihrualna hmunah chuan ‘Ngaihchana Thutphah’ tiin an sawi bawk.

 

“Simna Dawhkan” tiin The War Cry chhuak hmasaber [1879] ah ziahlan ani a. Chhandamna Sipai Pawlah hian ‘Zahngaihna Thutphah’ emaw ‘Simna Dawhkan’ emaw tia sawiin angkhat renga hman a ni. Hmuchhuaktu William Booth-a’n a fapa Bramwell-a hnena a lehkha thawnah chuan, ’Ngaichangtute I dawnsawnna kawngah, chhandamna ngai tak zeta sual nih an inhriatchian zet loh chuan, tumah Simna Dawhkan-a kun turin I tilui tur a ni lo. Pathian hmaa insawhkeh tak zeta harhtharte chauh lo chuan Krista chawlhnaa chawlin Rinna an vuan nghet lovang, chutiang mite chu hun lo kal zelah pawh an nghet thin a ni’, tiin a ziak a. Hmuchhuaktu vek hian a tawnhriat a sawinaah, ’Japan rama khawpui lian takah inkhawmna kan nei a, nu pakhat hi Zahngaihna Thutphah-ah a lo kal a. A ma tan ngaihdamna a chan hnuin, a fate pahnih Simna Dawhkan hmaah a rawn hruai leh a, an inkarah thingthiin, a hma lawka Chhandamtu a lo hmuh tak chu a kawhhmuh a ni’, tiin a sawi.

 

Commissioner Wesley Harris-a chuan Battlelines lehkhabu-ah tihian a ziak, ‘Lawmthu sawiin kan thingthi a ni thei, mite dilsakna, mahni inhlantharna leh thlarauva Krista nen inpawlna atan pawh a ni thei, engpawh nise kan mamawhte Pathianin a phuhruk thei tih kan hrereng tur a ni’, tiin. Zahngaihna thutphah hi zahna hmun ni lovin, khawngaihna hmun a ni zawk. Thingthit hian tlawmna a entir, mahni thihna leh Pathian a intukluhna nen. Pathian nen inzawm hnua dinchhuah hian nunthar nei kan nih a entir bawk a ni.

 

By- Jean Ralte [24-10-03]

Lehkhabu rawnte - Holy Bible & Called to be God’s People